52. De s. Iohanne Baptista.

In 1. Vesperis.
Super Psalmos.

1. Vox iucunda, cor exsultans,
Vultus laetus nil occultans
In se maesti, tanti festi
Psallant in obsequium,
Quo fit caelo gaudium.
2. Haec est dies, quam sacravit
Praecursoris et beavit.
Mors pretiosissima,
Mors aeterna laude digna,
Mors, quam vitae probant
signa,
Signa praeclarissima.
3. Carcer in palatium,
Luctus in solacium
Iohannis mutatur,
Festum in supplicium,
In luctum dominium
Herodis firmatur.
4. Ave, dulcis patriarcha,
Fluctuantes nos in arca

Iugi sub diluvio,

Morte vitam da beata

Terminari, quam beata

Subsequatur visio.

Ad Magnificat.

A. O Christe mirabilis,
Cuius inscrutabilis
Via sapientiae,
Decus innocentiae,
Iohannes Baptista,
Vitae magisterium,
Factus improperium,
Legis agonista,
Cuius in derisum

Petulantis feminae
Caput est praecisum.

Ad Matutinum.
Invitatorium.

Agno Dei, regi magno,
Quem Iohannes praedicavit,
Iubilemus Domino.

In 1. Nocturn o.

Antiphonae.

1. Vir beatus zelo legis
Arguit nefarias
Nuptae fratris nuptias
Et incestum regis.

2. Rex adversus aequitatem
Legis subsannator,
Adversatur veritatem,
Sceleris amator.
3. Insurgit hinc nequitia,
Virtus tribulatur,
Capitur iustitia,
Pietas ligatur.
4. Conturbatur Herodias
Et in sanctum Dei
Gravi corde meditatur
Dolos et insidias.
5. Herodes, vir sanguinum,
Vitiorum fautor,
Patronus facinorum,
Criminis est autor.
6. Deus admirabilis,
Qui post ignominiam
Donas sanctis gloriam
Et per patientiam
Humiles coronas.

Responsoria

1. Mysterio mirabili,
Quo conceptus sterili

Caelitus donatur,
Ex grandaevis nasciturus,
Quantae puer sit futurus
Gratiae, monstratur,
V. Cuius ad indicium
Editus ab angelo
Nomen et officium.
2. Salutis puerperae
Salutantis reddere
Gestiens adfatus,
Exsultat in utero
Ac adludit puero
Puer salutatus;
V. Virginis in gremio
Sciens esse Deum,
Quod nequit eloquio,
Gestu prodit eum.

3. Iohannes dum nascitur,
Mundo novus oritur

Lucifer diei,
Lucescentis nuntius,
Viae factor praevius

Et praecursor Dei,
V. Fide patrum imbuens

Corda filiorum
Ostendit incredulis

Semitas iustorum.

4. Vox clamantis in deserto
Dum Iohannes in aperto

Herodis incestum
Arguendo frustra studet,
Induratur et non pudet

Sceleris scelestum;
V. Innocens in carcere

Clausus adligatur,
Cui furor adulterae

Mortem machinatur.

In 2. Nocturno.
Antiphonae.

1. Rex natalis sui cenam
Primis et maioribus

Magnam fecit et amoenam

Galilaeae ducibus.
2. Apti diem temporis

Videns Herodias
Impudici pectoris

Intendit argutias.

3. Exsecratur sanctitatem
Absorpta deliciis
Et infamat castitatem
Delectata vitiis.
4. Testem vitae detestata,
Iohannem in carcere
Face mortis inflammata
Non timet occidere.
5. Postulata iusti nece
Insana laetatur,
Quando caput pro mercede
Filiae donatur.

6. Cuius mox discipuli
Corpus asportarunt
Et honore tumuli
Terrae commendarunt.

Responsoria.

1. Rex profanus dum servandum
Morte iusti iusiurandum

Putat, peius peierat,
Quando sacrum sacramento
Necans dono tam cruento

Saltantem remunerat.
V. Ius irridet, fas non videt,

Nefanda religio,
Dum per iocum praestat locum

Iurans homicidio.

2. Mira dispensatio

Feminae ludibrium,
Saltatricis praemium
Fit baptista Dei,
Obstupescit ratio,
Disciplinae speculum
Fieri spectaculum
Ebriae diei,
V. Castitas opprimitur,
Profanatur sanctitas
Veritas damnatur.

3. Ortus sui diem festum

Rex convivis instruit,
Sed non laute, dum incaute

Nece iusti destruit
Et fas et honestum;
V. Quis non recte dixerit

Gaudium furorem,
Ubi vino miscuit

Crapula cruorem?
4. O iubar laetitiae,

Titulus virtutis,
Qui solem iustitiae,

Dominum salutis,
In secretis uteri

Sentiens gaudebas
Et ad portas inferi

Laetus praecurrebas,
Spem redemptionis

Mortis in caligine
Nuntians absorptis;
V. Angelus officio,

Spiritu propheta,
Gabriele nuntio

Natus ex effeta.

In 3. Nocturno.
Ad Cantica.
A. Christi vates et legista,
Paranymphus et baptista,
Maior natis hominum,
Curae tibi Dominum
Sic sit praevenire,
Ut non nobis noceat
Illa dies irae.

Responsoria.
1. Dira fames, edax invidia
Sanctum mactat inter convivia,
Esurit plus hominem

Impudens regina

Et infelix sanguinem

Sitit inter vina.

V. Maestus vere dies festus,

Funesta societas,

Foedae dapes, iusti caede

Dum madet ebrietas.

2. Triumphator hostium,
Triumpho potitus
Carnis, mundi, daemonum

Derides garritus,
Herodes dominium
Tuum fert contritus.
V. O doctorum speculum,
Martyrum vexillum,
Virginum signaculum,
Portum da tranquillum.
3. Angelus cognomine,
Vere maior homine
Iohannes occiditur,
Pro lege paterna
Dum zelat, exstinguitur
Fidei lucerna,
V. Erat enim sanctitate

Lucens, ardens caritate.
4. Summa legis, praeco regis
Et plus quam propheta,
Via morum, dux iustorum,

Virtutis athleta,
Decollatur, caput datur

Manibus incestae,
Cuius scelus iusti zelus
Damnat manifeste;
V. Herodias imperat,
Impia scortatrix,
Et iussis obtemperat
Filia saltatrix.

In Laudibus.
Super Psalmos.

A. Collaudemus Dominum
Omnis creaturae,
Terrae, maris, hominum,
Et vitae futurae
Regem deprecemur,
Ut exuta carnis mole
Cum baptista vero sole
Amicti laetemur.
R. Per eum, qui constituit
Te maiorem hominibus
Et universis docuit
Praestantiorem vatibus,

V. Te precamur assiduis
Nos iuva precaminibus.

Ad Benedictus.
A. Benedictus es tu, Christe,
Verbum patris, quod baptistae
Prophetavit spiritus,
Digitus monstravit,
In fide sincera
Plebem tibi nos perfectam
In salutis viam rectam
Dirige, lux vera.

Per Horas.
Ad Primam.
A. Salutaris dies ista,

Quam praecursor et baptista

Christi consecravit,
Dum pro veritate legis
Per iniqui manum regis

Mori non expavit;
Angelis laudabilis,
Nobis venerabilis,
Inferis excidium,
Desperatis gaudium
Vere nuntiavit.

Ad Tertiam.

A. Iohannes legis terminus

Et finis umbrarum,
Literae silentium

Et vox prophetarum,
Immolatur feminae,

Quando decollatur
Infestae datus innocens

Et sanctus incestae.

Ad Sextam

A. Ecce, quem divinitas

Ipsa veneratur,
Cui de caelo trinitas

Tota revelatur,
Qui per vitae meritum

Angelus vocatur,
Hic tantus ad lubitum

Feminae damnatur.

Ad Nonam.

A. Scelerati iussu regis
Dum zelator sacrae legis

Morti deputatur,
Imminente passione
Stans erectus in agone

Sic orat, sic fatur:
Meum tibi, Domine,

Spiritum commendo,
Pro cuius me nomine

Moriens impendo.

In 2. Vesperis.

Ad Magnificat.

Magnificemus Dominum,
Quem inter natos hominum

Maior necdum natus

In matre salutatus
Sciens salvatorem

Exsultans ut Domino
Detulit honorem,

Cuius veneranda passio

Nos commendet virginis filio.

1. Infrunitae feminae
Furor inflammatur,
Dum de thori crimine

Iuste proclamatur,

Sed prophetae sanguine

Cruenta placatur,

V. Adversatrix mens virtutis

Vilipendit nec attendit

Monita salutis.

2. Rex aversa facie
Lumini rebellis,
Inimicus gratiae

Vere versipellis

Iure rupto sanguinis

Vim facit naturae,

V. Dissipator foederis,

Adinventor sceleris,

Pacis violator.

In 3. Noct. Super Ps. hat E folgende AA:

1. Hic prophetis altior,
Iste maior homine
Despectae despectior
Merces datur feminae.

2. Arbitrum iustitiae
Temulenti rident

Et lucernam gratiae
Immundi non vident.

3. Triste nimis epulum,
Caput in scutella,
Quod quasi ridiculum
Intulit puella.

R 2. Infrunitae feminae etc. B; in A:
R. Baptista Christi nobilis,
Amicus Christi humilis,

Tu forma sanctitatis
Pro tuis sanctis precibus
Coniunge caeli civibus.
V. Ave, fruens summo bono,
Sedens caeli solio,
Intuens divinitatem
Plenus omni gaudio.

Die 4. lautet:

Rex Iohannem metuebat,
Quia sanctum hunc sciebat,
Cuius quasi stimulis

Verbis pungebatur,
Sed infelix male functus
Tanto viro nec compunctus

Mortem merebatur.