Acta Apostolicae Sedis - Commentarium Officiale216

Ob diffusam sanctitatis famam, a die 5 mensis Decembris anno 1994 ad

diem 7 mensis Iunii anno 1995, apud Curiam Antananarivensem dioecesana

Inquisitio est instructa, cuius iuridica auctoritas per decretum diei 20 mensis

Octobris anno 1995 a Congregatione de Causis Sanctorum est recognita. Parata

Positione, die 29 mensis Ianuarii anno 2002 actus est Congressus Historicus.

Disceptatum est deinde, ad suetas normas, an Servus Dei virtutes heroico modo

exercuisset. Die 24 Februarii anno 2006 Peculiaris Consultorum Theologorum

Congressus, positivo cum exitu, evenit. Die 5 mensis Decembris anno 2007

Patres Cardinales et Episcopi, Ponente Causae Excellentissimo Domino Lino

Fumagalli, Episcopo Sabinensi-Mandelensi, edixerunt Servum Dei Raphaëlem

Aloisium Rafiringa heroicum in modum virtutes theologales et cardinales iis

adnexas excoluisse.

Facta demum de hisce omnibus rebus Summo Pontifici Benedicto XVI per

subscriptum Cardinalem Praefectum accurata relatione, Sanctitas Sua, vota

Congregationis de Causis Sanctorum excipiens rataque habens, hodierno die

declaravit: Constare de virtutibus theologalibus Fide, Spe et Caritate tum in Deum

tum in proximum, necnon de cardinalibus Prudentia, Iustitia, Temperantia et

Fortitudine, iisque adnexis, in gradu heroico, Servi Dei Raphaëlis Rafiringa (in

saec.: Aloisii), Religiosi Professi Instituti Fratrum Scholarum Christianarum, in

casu et ad effectum de quo agitur.

Hoc autem decretum publici iuris fieri et in acta Congregationis de Causis

Sanctorum Summus Pontifex referri mandavit.

Datum Romae, 17 mensis Decembris A.D. 2007.

Iosephus card. Saraiva Martins

Praefectus

L. e S.

e Michaël Di Ruberto archiep. tit. Biccarensis, a Secretis