294 Acta Apostolicae Sedis - Commentarium Officiale

HELIOPOLITANA GRAECORUM MELKITARUM

Beatificationis et Canonizationis Servi Dei Romani Bottegal Sacerdotis Professi Ordinis Cisterciensium Strictioris Observantiae Eremitae (1921-1978)

DECRETUM SUPER VIRTUTIBUS

« In medio Amoris - in medio Universi - in ultimo loco; Minima crea-

tura, laetus de micis; Ut pastor bonus - ut Mater omnium, ut omnes sint

consummati in unum, consummati in gaudio Silentii Aeterni Amoris ».

Famuli Dei Romani Bottegal ut universam vitam et christianam pieta-

tem, sic intaminatum sacerdotium brevissima haec dicta illuminant, quae

pariter eius lucem in rei mysticae fines mittunt.

Hic Dei Famulus in pago Sancti Donati, prope Lamonem, in agro Bellu-

nensi, sex liberorum extremus a parentibus pauperrimis genitus est die 28

Decembris anni 1921. Doctrina imbutus puerili, totum se ad statum clerica-

lem rite instituendum dedit, primum in seminario minore Feltriensi, deinde

in maiore Bellunensi; ibique non modo prorectore, verum etiam praeceptore

usus est Albino Luciani, Dei Famulo, qui multis post annis arcano Dei

consilio ad Apostolatum assumptus Ioannes Paulus, huius nominis primus,

voluit appellari. Post completum decimum octavum aetatis annum perpetuae

castitatis votum emisit. Dum vero theologiae vacat, persuasum habuit sese

ad umbratilem capessendam vitam, caelestium rerum contemplationi dedi-

tam, divino quodam instinctu vocari; hortantibus tamen cum superioribus,

tum ipso pietatis magistro, aliquid spatii sumpsit ad deliberandum, donec

ad excelsam sacerdotii dignitatem ascendit die 29 Iunii anni 1946.

Posthac relicta dioecesi cum abbatiam trium fontium ad Aquas Salvias,

in alma hac Urbe, esset ingressus, primum anno 1951 perpetuis nuncupatis

votis se obligavit, deinde in Gregoriano Athenaeo licentia theologiae potitus

est. Idem deinceps conversorum novitiorumque magister, cantor ac coenobii

antistes fuit.

Anno autem 1961 adfuit abbati Latrunensi in Israel, qui, cum sodalita-

tem esset Cisterciensium Strictioris Observantiae ritus maronitae in Libano

conditurus, voluntariorum opis indigebat; ibique non linguarum dumtaxat

arabicae et syriacae, sed liturgiae orientalis studiis se dedit. Minime vero

procedente consilio, Oriente propinquo discedens anno 1963 abbatiam trium

fontium ad Aquas Salvias repetivit; ibique concessit ei abbas, quippe qui