Acta Apostolicae Sedis - Commentarium Officiale890

HISPALEN.

Beatificationis et canonizationis Servae Dei Mariae ab Immaculata Conceptione

(in saec.: Mariae Isabellae Salvat y Romero) Antistitae Generalis Sororum Socie-

tatis a Cruce (1926-1998)

DECRETUM SUPER VIRTUTIBUS

« Fili mi, ne obliviscaris legis meae, et praecepta mea cor tuum custodiat;

longitudinem enim dierum et annos vitae et pacem apponent tibi. Miseri-

cordia et veritas te non deserant » (Prv 3, 1-3).

Vetus sapiens Israel discipulum suum hortatur ad traditam doctrinam

servandam uti praeoptabilem thesaurum, quoniam in eo propositum vitae

fecundum, abundans et ditans pro se ipso aliisque reperiet. Vigor huius pro-

positi, ex humana experientia profluens et divina inspiratione illuminatus,

prorsus efficaciter congruit vitae, spiritualitati et operibus Servae Dei Mariae

ab Immaculata Conceptione Salvat y Romero.

Serva Dei die 20 mensis Februarii anno 1926 Matriti e familia bene con-

stituta orta est. Sequenti die ad fontem baptismalem paroeciae Dominae

Nostrae a Conceptione ducta est, ubi Mariae Isabellae nomen assumpsit. In

domestico ambitu sensu religioso firmiter solidato, praeter litterarum rudi-

menta christianos quoque valores didicit, quos penitus auxit per maiorem in

dies conscientiam, frequentans ab infantia Matritense Beatae Virginis Mariae

Collegium, Sororum Hibernarum curationi commissum. Quod ad formationis

iter attinet, ad primum Sacrum Convivium accessit ac deinde ordinarium

studiorum curriculum perfecit. Anno 1936, civili bello exardescente, familia

eius in Lusitaniam se transtulit; attamen, duobus post annis, in patriam

rediit, ubi prius Sebastianopoli, Vasconica in regione, ac deinde iterum

Matriti est commorata.

Horum annorum decursu Maria Isabella magis magisque dotes personales

perficiebat et culturales, ut vitam socialem plene sibi indulgentem, deinde

alto ordine burgensium firmatam provehere posset. Ipsa tamen congrua per-

spicuitate vocationem ad vitam religiosam ita percipere coepit, ut, post ad-

motam petitionem, Hispali anno 1944 uti postulans in Institutum Sororum

Societatis a Cruce sit admissa. Sequenti anno religiosum induit habitum,

nomen assumens Sororis Mariae ab Immaculata Conceptione a Cruce, et in

Novitiatum excepta est.