376 Acta Apostolicae Sedis - Commentarium Officiale

LOIKAVENSIS

Beatificationis seu Declarationis Martyrii Servorum Dei Marii Vergara Sacerdotis Pontificii Instituti pro Missionibus Exteris et Isidori Ngei Ko Lat Christifidelis Laici et Catechistae († 25.5.1950)

DECRETUM SUPER MARTYRIO

« Narrabo nomen tuum fratribus meis, in medio ecclesiae laudabo te »

( Ps 22, 23).

Haec psalmistae verba in vita atque in morte Servorum Dei Marii Vergara

et Isidori Ngei Ko Lat resonant: qui miti cum fortitudine nomen Domini

in hora quoque examinis nuntiaverunt et in media persecutionis efferitate

auctores facti sunt reconciliationis ac pacis.

Servus Dei Marius Vergara Fractae Maiore apud Neapolim natus est die

18 mensis Novembris anno 1910, novem filiorum ultimus. Duos post dies in

ecclesia parochiali Sancti Sossii Levitae et Martyris baptizatus est. Ludis

litterariis perfectis, in Seminarium Aversanum admissus est; postea vero,

vehementer tractus a studio fidei praedicandae, in Pontificium Institutum

pro Missionibus Exteris (PIME) Mondiciae ingressus est. Mox autem propter

gravem valetudinis confectionem coactus est in familiam redire; quapropter,

etiam cum convaluisset, se offerre frigido Italiae septentrionalis caelo non

oportere censuit atque studia recoluit Neapoli in Seminario Campano Pau-

silypi. Dein, ingressus iterum in Pontificium Institutum pro Missionibus Ex-

teris, disciplinas theologicas ultimi anni didicit, atque die 26 mensis Augusti

anno 1934 a Beato Cardinale Ildephonso Schuster ordinatus est sacerdos.

Sine mora Pater Marius missus est in Birmaniam, hodie Myanmar. Ad

urbem Toungoo pervenit et ab initio in studium incubuit linguarum tribuum

Carianarum. Aliquot post mensibus ei assignatum est territorium oppiduli

Citaciò, quod novem et viginti pagos numerabat. Servus Dei, neglegens in-

commodorum ac innumerabilium periculorum quibus infirmam valetudinem

suam subiciebat, negotia capessiit et in omnibus amorem erga se movit:

sacerdos erat et praeceptor et medicus et administrator nec raro et iudex;

mirum in modum beneficus, parvulos aegrotosque maxime diligebat; omnes,

nec solum catholici, ad eum fidenter refugiebant.

Ineunte autem secundo bello universo, Italici praedicatores fidei in odium

venerunt apud regnum Britannicum, cuius in patrocinio erat Birmania, et a