Congregatio de Causis Sanctorum 891

Hac quidem formationis periodo, Serva Dei sollertia eminuit, spiritu sa-

crificii et virtutum exemplo. Peculiarem in modum in ea ostendebantur, mira

cum simplicitate, affectus erga paupertatem, humilis se gerendi modus nec

non spiritus consciae oboedientiae ulla absque propria utilitate. Anno 1947

temporaria vota nuncupavit.

Perspecta eius humana et spirituali experientia, huic iuveni sorori mode-

ramen Collegii oppidi Lopera, prope Giennum, concreditum est, cui muneri

alia summi momenti accesserunt in urbibus Vallisoleto et Estepa. Anno 1966

Hispalim arcessita est in Primariam Domum, prius uti auxiliaris apud Novi-

tiatum, deinde tamquam Novitiarum Magistra. Duos post annos constituta

est Moderatrix Provincialis, postea Consiliaria Generalis, deinde Praeposita

communitatis Hispalensis oppidi vulgo Villanueva del Rı́o y Minas, et anno

1977 electa est Suprema Instituti Antistita. Immo, de Sanctae Sedis licentia,

per alias tres periodos reelecta est ad hoc onerosum munus, quod trepidum

efficiebatur difficilioribus annis illis protinus post Concilium Oecumenicum

Vaticanum II, quo tempore Serva Dei magnopere incubuit in novandas

Instituti Constitutiones, intuitu pristinum eius charisma tuendi ac roborandi,

per restauratam fidelitatem erga Evangelium Ecclesiaeque Magisterium, per

intensiorem Eucharisticam et Marianam dimensionem, per sapientem tradi-

tionis aptationem ad nova Ecclesiae et societatis postulata.

Praecipuus sese gerendi modus actuosa aequabilitate ditatus est: Soror

Maria fidelitatem exercuit non veluti taediosam formularum approbatarum

iterationem, sed uti desiderium creativitatis ut obviam iret exigentiis a

Domino sibi significatis. In omnibus rerum adiunctis, oculos convertere

consueverat ad Sanctam Angelam a Cruce, Conditricem Congregationis,

tamquam ad fontem perennem congruentis continuationis versus debitam

renovationem.

Sollicitam maxime se praebuit de permanenti consororum formatione, ac

potissimum earum quae in discrimine animique defectione versabantur, ita

ut illis annis, in quibus omnia temptabantur et immo saepe incerta videban-

tur, eius testimonium vitae plurimis ex illis appareret uti securum vitae

signaculum. Sedulo curavit vocationum promotionem, cuius fructus tali mo-

do visibiliter maturuerunt, ut Serva Dei inducta sit ad fundationem novarum

domuum religiosarum provehendam in aliis Hispanicis urbibus, quales sunt:

Puertollano, Huelvia, Gades, Lugus, Linaria, Castrum Sancti Ioannis. In

Italia quoque anno 1984 in urbe Regio Iulii domum erexit.