Quaestio XVIII.

Cur Fratres permittant, ut plures praedictarum non recipiantur sine pecunia.

Cum ergo sitis informatores earum, quare permittitis, quod plures apud eas impure, id est per pecuniam, recipiuntur? Quae, si nihil secum ferrent, nullatenus reciperentur: et aperte simonia videtur.

Respondeo. Quodsi illud alii iaciunt, de hoc non a nobis, sed ab illis est ratio exigenda. Sed tamen , ut satisfaciamus quaerentibus, sciendum, quod quantum spectat ad hanc materiam, quadruplex est forma recipiendi ad Ordinem qualemcumque: prima, quando aliquis recipitur nec pro pecunia nec cum pecunia, sed pure pro Deo: et ista est purissima coram Deo et hominibus.

Secunda, quando aliquis recipitur non pro pecunia, sed cum pecunia,

ita ut si nihil afferret, tamen reciperetur pro Deo: et similiter hoc purum est coram Deo, sed est caute agendum coram hominibus, ne detur eis occasio scandali, et ne sit ibi affectus avaritiae infectus ex spe lucri. - Tertia, quando quis recipitur non pro pecunia, nec tamen reciperetur sine pecunia, eo quod non habent aliter ei qui eum recipiunt in necessitatibus corporis providere, cum tenues facultates domus vix sufficiant iam receptis, nec ad eos audeant plures recipere et istos suis necessitatibus spoliare, ita quod talis persona, quae sic recipitur, si abundaret locus, sine pecuniis reciperetur. Similiter aliquis duxit uxorem propter divitias eius vel nobilitatem, quae habet nasum: nec tamen propter hoc duxit eam, quia nasum habet, quam tamen, si naso careret, nullatenus duxisset: et hoc non est impurum, licet non appareat forsitan pulcrum.

Quarta, cum aliquis recipitur amore pecuniae, ita quod, si possent illam pecuniam habere sine persona ista, non reciperent personam, sed ut habeant pecuniam , personam recipiunt; et hoc penitus impurum est et simoniacum, quia ibi pecunia causa est receptionis personae et non e converso. Ubi ergo recipitur persona propter pecuniam, simonia est, quia ibi venditur spirituale, id est consortium spiritualis societatis, pro temporali, scilicet pro pecunia. Et hoc plerique faciunt, etiam ex mera inopia optantes , aliquem venire cum pecunia, quem reciperent, ut eorum inopia repararetur, vel debita contracta solverentur, vel bona concupita emerentur, vel aedificia construerentur: Ecclesiastici vigesimo septimo : Propter inopiam multi deliquerunt. Ubi vero pecunia recipitur propter personam, quam alias libenter reciperent, si haberent unde eam pascerent; non videtur esse simonia, dummodo forma cum intentione concordet. Et hoc modo sustinemus, quod Sorores sanctae Clarae recipiunt pecuniam cum personis, si quando oportet, eas plures personas recipere quam de facultatibus monasterii congrue valeant sustentari.