Acta Benedicti Pp. XVI 741

Ante omnia memoretur oportet sublimis dignitas theologica et ecclesialis

huius precationis. Nam « in Liturgia Horarum Ecclesia, sacerdotale Capitis

sui munus exercens, ''sine intermissione'' (1 Thess 5, 17) Deo hostiam laudis

offert, id est fructum labiorum confitentium nomini eius (cfr. Heb 13, 15).

Haec oratio est ''vox ipsius Sponsae, quae Sponsum alloquitur, immo etiam

oratio Christi cum ipsius Corpore ad Patrem'' ».222 Concilium Vaticanum II de

hac re affirmavit: « Omnes proinde qui haec praestant, tum Ecclesiae officium

explent, tum summum Sponsae Christi honorem participant, quia laudes Deo

persolventes stant ante thronum Dei nomine Matris Ecclesiae ».223 In Liturgia

Horarum, tamquam publica Ecclesiae oratione, ostenditur christianum pro-

positum sanctificationis totius diei, qui modulate volvitur auditione Verbi

Dei et oratione psalmorum, ita ut omnis actuositas in laudem Deo oblata

suam inveniat rationem.

Qui ob vitae statum Liturgiae Horarum recitatione tenentur, hoc munus

fideliter vivant in totius Ecclesiae beneficium. Episcopi, presbyteri et diaconi

ad sacerdotium aspirantes, qui ab Ecclesia celebrandi eam mandatum rece-

perunt, singulis diebus cunctas Horas absolvere debent.224 Quoad obligatio-

nem huius Liturgiae in Ecclesiis Catholicis Orientalibus sui iuris, sequendae

sunt indicationes iuris proprii.225 Hortamur insuper communitates vitae

consecratae ut sint vere exemplares in Liturgia Horarum celebranda, ita

ut exemplum fiant et inspiratio pro spiritali et pastorali vita universae

Ecclesiae.

Synodus expressit desiderium ut magis diffundatur in Populo Dei hoc

orandi genus, praesertim Laudum et Vesperarum recitatio. Huiusmodi

incrementum non poterit non augere inter fideles familiaritatem cum

Verbo Dei. Extollendum est etiam pondus Liturgiae Horarum quae

proponitur in primis vesperis Dominicae et Sollemnitatum, potissimum

apud Ecclesias Catholicas Orientales. Ad hunc finem commendamus ut, ubi

id fieri potest, paroeciae et communitates vitae religiosae huiusmodi

orationem cum participatione fidelium foveant.

222 Institutio generalis de Liturgia Horarum, III, 15. 223 Const. de sacra Liturgia Sacrosanctum Concilium, 85. 224 Cfr. Codex Iuris Canonici, cann. 276 § 3; 1174 § 1. 225 Cfr. Codex Canonum Ecclesiarum Orientalium, cann. 377; 473 §§ 1 et 2, 1º; 538 § 1; 881 § 1.