61. De sancto Ioseph.

In 1. Vesperis.

Antiphonae.

1. Ioseph exortus regia

De stirpe praedicatur,
Dignus regali gloria
In caelis comprobatur.

2. Nam sponsus erat virginis,
Quae caeli est regina,
Mater Dei et hominis
Et mundi medicina.

3. Senex expers libidinis
Puellam desponsavit,
Et virtus sacri flaminis
Hos coniuges sacravit.

4. Sine carnali copula
Coniugium servatur,
Et germen sine macula
Divinum procreatur.

5. Haec plebs Deum magnificat
Pro Ioseph dignitate,
Qui sponsum Christum typicat
In sua castitate.

Ad Magnificat.

A. Gaude, Ioseph, fili David,
Quem tam magno decoravit

Deus privilegio,
Ut sis suae matris custos,
Computatus inter iustos;

Credens Dei nuntio
Non relinquis desponsatam,
Sed in fide commendatam

Observans puerperam;
Obsecra Mariae natum,
Ut se nobis det placatum

Collocans ad dexteram.

Ad Matutinum.

Invitatorium.

Ioseph iustus vigilavit
In timore Domini,

Christo nato iubilavit
Congaudendo virgini.

In 1. Nocturno.
Antiphonae.

1. Impiorum consilium
Beatus vir despexit,
A verbis malignantium
Sponsam suam protexit.

2. Dum Christum natum perdere
Herodes cogitavit,.
Hunc in Aegyptum propere
Sanctus Ioseph portavit.

3. De regno suo filius
Mariae profugatur,
Nec murmurat egregius
Ioseph dum comitatur.

Responsoria.
1. Dum virgo votum faceret,
Ut virum non acciperet,

Praesul templi tristatur,
Orans Deum consuluit,
Quis desponsare debuit
Puellam, revelatur:
V. Qui tenet sceptrum virgulae
Florentis, hic puellulae
Pro sponso comitatur.

2. Accepit Ioseph virginem
Nullam habens libidinem,
Praeceptis pariturus,

Nazareth virgo rediit,
Bethlehem Ioseph transiit

Nuptiis provisurus.
V. Ioseph quidem ignorante

Virgo fecundatur,
Gabriele nuntiante

Christus incarnatur.
3. Ioseph admirans stupuit,

Quis sponsam impraegnavit,
Sed virgo rem exposuit

Et sponso revelavit,
Qui fidem quidem praebuit,

Sed fugam cogitavit.
V. Sicut Petras pertimuit

Dicens: recede Domine,
Sic se indiguum censuit

Ioseph stare cum virgine.

In 2. Nocturno.

Antiphonae.

1. Ioseph vagus cum parvulo
Aegypto commoratur,
Abiectus sic a saeculo
In Deum, delectatur.
2. Faber arte lignaria
Vivebat cum uxore
Acquirens necessaria
Ex manuum labore.

3. Haec est regis familia

Ioseph cum sancta virgine.
Sic degit in infantia

Assumpto Christus homine.

Responsoria.

1. O Ierusalem filiae,
Ecce, regina gloriae

In Bethlehem ascendit,
Quam Ioseph vir oboediens

Deducit et defendit.
V. En, comitiva regia

Tam parva computatur,
Mater regis eximia
Asello deportatur.

2. Ioseph dat Deo gratias
Sacras servans excubias

Nato rege Messia,
Minister fit praecipuus
Et comes individuus,

Ubi pergit Maria.
V. O paupertatis pretium,
Rex exspectatus gentium
Fecit fabrum lignarium
Esse suum nutritium.

3. Hic senex, David filius,
Paranymphus egregius,

Mariae vir electus,
Christi fidus nutritius,
Pro meritis sublimius

In caelis est provectus.
V. Inter patres computatus

Stat antiquae legis,
In conspectu laureatus

Fulget summi regis.

In 3. Nocturno.
Antiphonae.

1. Sanctus senex cum virgine
Tam castus habitavit,
Quod nunquam suo famine
Verbum turpe ructavit.
2. Thorum Ioseph et virginis
Sanctum et impollutum
Rore suae dulcedinis
Sacravit rex virtutum.
3. Christo regi iudicium

Ablatum est, dum exsulat,
Iam tenet regni solium
Et sanctum Ioseph infulat.

Responsoria.

1. Ex Aegypto revertentem
Nazarethque venientem

Ioseph deducit parvulum,
Cum parentibus profectus
Puer illis est subiectus,
Miretur omne saeculum.
V. Pater, mater requirebant
Hunc dolentes triduo,

Christum templo dum vide-
bant,

Congaudebant mutuo.
2. Felix oboedientia,
Cuius virtus eximia

Effulsit incessanter
In matre atque filio,
Parent Ioseph imperio

Et serviunt laetanter.
V. Ioseph sponsam veneratur

Ministrans fideliter,
Virgo sponso famulatur,

Cum nato hilariter.

3. Salve, Ioseph, serve Christi,

Qui constanter contrivisti

Dentes detrahentium,
Pro Maria respondisti,
Cuius promptus defendisti

Castitatis lilium;
Deus summus te amavit
Et te dignum aestimavit

Suum thesaurarium.
V. Confer nobis, Ioseph pie,

Pudoris signaculum,
Offer nato nos Mariae,

Ut det pacis osculum.

Ad Laudes.
Antiphonae.
1. Stola decoris induit

Christus suum nutricium
Et senatorem statuit
Intra caeli palatium.
2. Ioseph in patientia
Servivit in laetitia
Uxor sibi datae,
Iam astat throno gloriae
Et videt clara facie
Deum in maiestate.
3. Promissionum credulus
Messiae regnum sedulus

Sitiebat dicendo:
O si vivens inspiciam
Completam Dei gratiam
Et psallam congaudendo.

4. Messias in infantia,
Crescens aetate, gratia,

Cum Ioseph habitavit,
Tandem bonis operibus
Plenus Ioseph cum patribus

A saeculo migravit.

5. Carnis motus refraenavit
Hostis dolos superavit

Perfecta victoria,
In virtute consummatus
Sanctus senex coronatus
Residet in gloria.

Ad Benedictus.

A. Custos thesauri regalis,
Paranymphus nuptialis,

Eunuchus puerperae,
Pater Christi non natura,
Sed pro nutriendi cura,

Sicut tradunt literae,
Gestans typum praelatorum,
Qui sunt patres populorum

Sponsique ecclesiae
Iuste senex, placa regem,
Ut cum matre ducat gregem

Ad ovile gloriae.

In 2. Vesperis.

Ad Magnificat.

A. Ioseph adcrescens filius
Cum sit Christi nutricius

Fit pater plurimorum,
Mariae sponsus inclitus,
Omni virtute praeditus

Exempla praebet morum,
Carnis motus refrenavit,
Hostis dolos superavit

Perfecta victoria,
In virtute consummatus
Sanctus senex coronatus

Residet in gloria.