Acta Apostolicae Sedis - Commentarium Officiale606

MEDIOLANENSIS

Beatificationis et Canonizationis Ven. Servae Dei Henricae Alfieri (in saec.: Mariae

Angelae), Sororis Professae Congreg. Sororum a Caritate S. Ioannae Antidae

Thouret (1891-1951)

DECRETUM SUPER MIRACULO

Venerabilis Serva Dei Henrica Alfieri, quae vulgari sermone appellari

solebat Enrichetta, die 23 mensis Februarii anno 1891 in Burgo Vercellarum

nata est. Anno 1911 admissa est in Congregationem Sororum a Caritate

Sanctae Ioannae Antidae Thouret. Studiis expletis ut ad rudimenta

litterarum docenda habilis fieret, Vercellis suae initium dedit missioni qua

magistra. Aliquot post annos in Domum Provincialem regressa est apud

valetudinarium, ubi per quattuor fere annos ad immobilitatem est coacta,

quoniam spondylite tuberculosa afficiebatur. Acerbos inter dolores et in

condicione progredientis paralysis, ad certam mortem pervenire videbatur;

attamen die 25 mensis Februarii anno 1923, postquam pauxillum aquae

Lapurdensis subbiberat, necopinato e lecto omnino sanata surrexit.

Ulterius Mediolanum missa est, ubi Sorores mulieribus in carcere Sancti

Victoris detentis subvenire consueverant. Ibi per duodetriginta annos

morata est, suas insumens vires pro redemptione solacioque captivorum.

Soror Henrica talem circum se profudit amorem ut, obitus die, nempe die

23 mensis Novembris anno 1951, universa urbs Mediolanensis lugeret eam

tamquam «Matrem captivorum Sancti Victoris ». Die 19 mensis Decembris

anno 2009 Summus Pontifex Benedictus XVI heroicum agnovit eius gradum

virtutum.

Beatificationi consulens, Postulatio Causae iudicio huius Congregationis

de Causis Sanctorum coniectam porrexit miram sanationem iuvenis

Stephaniae Copelli. Etenim die 13 mensis Decembris anno 1993, haec

iuvenis, duodeviginti annos nata et athleticae arti addicta, in Polyclinicum

Sancti Marci in Zingonia, Bergomi, ob acutos abdominales dolores festinanter

excepta est. Ex clinicis investigationibus detecta est praesentia tumoris

ignotae indolis, sed ita diffusi ut nulla chirurgica sectio fieri posset. Interea

dolores intolerabiles in dies reddebantur. Medici familiaribus Stephaniae

exiguitatem temporis vitae eius notam fecerunt.