Congregatio de Causis Sanctorum 607

Desperatis rebus sic stantibus, parentes et amici eius inceptum

precationum promoverunt, ut Dominus, Venerabili Serva Dei intercedente,

sanationis donum largiretur iuveni aegrotanti, cuius amita sodalis erat

quoque Sororum a Caritate Sanctae Ioannae Antidae Thouret. Post

celerem processum quo mors evidenter instabat, moles tumoralis confestim

evanuit et aegritudo prorsus esse destitit; itaque iuvenis mulier die 19 mensis

Februarii anno 1994 e valetudinario dimissa est et ulterius studentis vitam

resumpsit. Deinceps non sunt revelatae morbi sequelae, quae ex contrario,

iuxta medicorum sententiam, intra breve temporis spatium plerumque

prodire solent.

Chronologica congruentia et nexus evidenter apparuerunt inter invoca-

tionem ad Venerabilem Servam Dei et sanationem Stephaniae Copelli.

De hoc eventu, miro iudicato, apud Curiam Archidioecesanam Mediola-

nensem a die 28 mensis Maii ad diem 29 mensis Iunii anno 2002 instructa est

Inquisitio dioecesana, cuius iuridicam validitatem agnovit Congregatio de

Causis Sanctorum decretum edens die 12 mensis Martii anno 2004. Consi-

lium Medicorum Dicasterii, in Sessionibus habitis die 18 mensis Februarii et

die 28 mensis Octobris anno 2010, edixit sanationem celerem fuisse, perfec-

tam et constantem atque sub lumine hodiernae scientiae medicae inexpli-

cabilem. Die 14 mensis Ianuarii anno 2011 actus est Congressus Peculiaris

Consultorum Theologorum, ac die 1 sequentis mensis Martii in Sessione

Ordinaria Patres Cardinales et Episcopi congregati sunt. Et in utroque

Coetu, sive Consultorum sive Cardinalium et Episcoporum, posito dubio

an de miraculo divinitus patrato constaret, responsum affirmativum

prolatum est.

Facta demum de hisce omnibus rebus Summo Pontifici Benedicto XVI

per subscriptum Cardinalem Praefectum accurata relatione, Sanctitas Sua,

vota Congregationis de Causis Sanctorum excipiens rataque habens, hodierno

die declaravit: Constare de miraculo a Deo patrato per intercessionem Venera-

bilis Servae Dei Henricae Alfieri (in saec.: Mariae Angelae), Sororis Professae

Congregationis Sororum a Caritate Sanctae Ioannae Antidae Thouret, videlicet

de celeri, perfecta ac constanti sanatione iuvenis Stephaniae Copelli a « sarcoma

di Ewing/PNET plurimetastatico ».