Congregatio de Causis Sanctorum 399

Azúcar profectus est. Iter illud, suapte natura arduum, difficilius exstitit ob constantem et intensam pluviam; quapropter eius iam infirma valetudo ad extremum pervenit. Vespere diei 5 mensis Maii condiciones illius in peius ruerunt. Tunc plene conscius infirmorum sacramentis refectus est. Nocturno iam tempore, crucifixum stringens precesque fundens animam suam Domino tradidit. In Cathedrali templo Montisvidei funebre paratum est cubiculum; ac per triduum multitudo fidelium, dolenter commota, ad feretrum concurrit usque ad diem 11 mensis Maii eiusdem anni 1881, quo exsequiae coram ingenti civium frequentia sollemniter sunt celebratae.

Quandoquidem sanctitatis fama absque intermissione augebatur, inde a die 27 mensis Iulii anno 1935 ad diem 30 mensis Maii anno 1941 apud Curiam ecclesiasticam Montisvidei instructus est Processus Infomativus, quem secutus est Processus Suppletivus a die 12 mensis Martii ad diem 1 mensis Iunii anni 1955, quorum iuridica auctoritas ab hac Congregatione per decretum datum die 28 mensis Februarii anno 1992 est approbata. Apparata Positione, disceptatum est, iuxta consuetam procedendi formam, an Servus Dei heroicum in modum virtutes exercuerit. Die 18 mensis Septembris anno 2014, positivo quidem cum exitu, habitus est Peculiaris Congressus Consultorum Theologorum. Purpurati Patres et Episcopi die 5 mensis Maii anno 2015 congregati in Sessione Ordinaria, cui egomet Angelus Cardinalis Amato praefui, edixerunt Servum Dei heroicum virtutum theologalium, cardinalium iisque adnexarum fastigium attigisse.

Facta demum de hisce omnibus rebus Summo Pontifici Francisco per subscriptum Cardinalem Praefectum accurata relatione, Sanctitas Sua, vota Congregationis de Causis Sanctorum excipiens rataque habens, hodierno die declaravit: Constare de virtutibus theologalibus Fide, Spe et Caritate tum in Deum tum in proximum, necnon de cardinalibus Prudentia, Iustitia, Tempe-

rantia et Fortitudine, iisque adnexis, in gradu heroico, Servi Dei Hyacinthi

Vera, Episcopi Montisvidei, in casu et ad effectum de quo agitur. Hoc autem decretum publici iuris fieri et in acta Congregationis de

Causis Sanctorum Summus Pontifex referri mandavit. Datum Romae, die 5 mensis Maii a.D. 2015.

angelus CarD. amato, s.D.B. Praefectus

L. G S.

G marCellus BartoluCCi Archiep. tit. Mevaniensis, a Secretis