Acta Apostolicae Sedis - Commentarium Officiale532

MEDIOLANENSIS

Beatificationis et Canonizationis Ven. Servi Dei Seraphini Morazzone, Sacerdotis

Dioecesani et Parochi (1747-1822)

DECRETUM SUPER MIRACULO

Venerabilis Servus Dei Seraphinus Morazzone die 1 mensis Februarii anno

1747 Mediolani natus est. Persentiens ad sacerdotalem vitam vocari, sacram

ordinationem accepit die 9 mensis Maii anno 1773 et ipsa die officium parochi

sumpsit in pago vulgo Chiuso, prope Leucum, in Archidioecesi Mediola-

nensi. In exigua paroeciali communitate ex ducentis circiter incolis, Servus

Dei pastorali sollicitudine, simplicitate ac mansuetudine eminuit, sibi conci-

lians aestimationem fidelium et confratrum sacerdotum, qui per antono-

masiam « bonum curionem » eum appellarunt. Mirabili praecelluit cultu erga

Eucharistiam et, dum in pastorale opus incumbebat, fideles hortabatur ut

frequenter ad Sacrum Convivium accederent. Apostolatus eius apud tenuio-

res intensus exstitit: etenim sollicitum se praebuit de pauperibus et pueris,

sua in domo elementariam aperiens scholam gratuitam, et constantem cari-

tatem exercens illo ipso tempore quo pagus Chiuso anno 1799 ab exercitu

Austriaco-Russico vastabatur. Unanimi circumdatus affectu et chorali populi

voce uti « sanctus » acclamatus, die 13 mensis Aprilis anno 1822 placide in

Domino obdormivit. Die 17 mensis Decembris anno 2007 Summus Pontifex

Benedictus XVI heroicas eius virtutes agnovit.

Ad beatificationem quod attinet, Postulatio Causae iudicio Congregatio-

nis de Causis Sanctorum assertum exhibuit mirum eventum, qui ascriptus est

intercessioni Servi Dei. Huiusmodi eventus, qui Leuci patratus est noctu

inter dies 17 et 18 mensis Decembris anno 1960, respicit extraordinariam

sanationem neonati Seraphini Corti a gravi atresia in apparatu digerenti.

Ante unius fere mensis spatium puellus praemature nascebatur et generales

valetudinis condiciones nimis instabiles ostendebantur, et insuper dierum

decursu celeris consumptio notata est ob eius constantem deformationem:

infaustus praevidebatur exitus neonati qui revera in acuto vitae versabatur

discrimine.