CAPUT II.

De locis in quibus raro et male plantae generantur.

Loca autem in quibus plantae habent generari secundum naturam et convenientiam sui generati, magnam habent diversitatem caloris et frigoris et humoris et siccitatis. Quaedam enim loca recedunt a temperamento generationis plantarum : et in his rarius nascitur planta, et cum nata fuerit, raro ad partum convalescit. Loca enim in quibus abundat humor aqueus salsus grossus cum multa terrestreitate grossa et indigesta, aut non habent plantas, aut habent parvas plantas et paucas imperfectas. Contingit autem hoc propter multum frigus et multam siccitatem. Planta enim in generatione sua duobus indiget, quorum unum est materia ex qua fit : et alterum locus suae generationi conveniens. Locus enim principium est generationis quemadmodum et pater : et materiam impedit loci salsugo, eo quod exsiccatur humidum radicale plantarum. Cujus signum est, quod terrae salsae commixtae vel sale seminatae, steriles efficiuntur. Grossities autem terrae infusa frigido humore aqueo grosso ex frigiditate terrae et aquae exstinguit calorem, quod principium esse debuit generationis plantarum : quamvis enim calidum aliquale in se habeat salsugo, tamen id non est temperans locum, sed potius adurens humidum : eo quod sal non generatur nisi de terrestri combusto et adurente calido, cujus excellentia fracta est in humido aqueo : et ideo calidum adhaerens salsugini talis loci est expulsum a frigore terrae et aqua : propter quod adurens efficitur id in quod expellitur, et remanet multum frigus in circumstantibus aqua et terra, quae impediunt generationem plantarum. Signum autem hujus est, quod quando spirant loca talia, et vapor eorum projicitur ad plantas vicinas per ventum continuae et diutinae sufflationis, siccantur et contrahuntur plantae illae, et arescunt primo folia, et post totae plantae. Vapor enim de natura loci est, et operatur in. plantis vicinis hoc quod locus operatur in generatione plantarum. Sed non latet nos quod in omnibus talibus locis duplex invenitur terra : quaedam enim est gravis descendens etiam sub aquam et salsam : et haec impedit generationem plantarum propter causam primo determinatam. Quaedam autem in eisdem locis invenitur, quae suo nomine ab incolis talium terrarum vocatur terra natabilis : et haec est opportuna valde generationi plantarum parvarum, sicut olerum, et herbarum : et haec terra est levis : et cum fuerit postea super aquam salsam, natat super eam : et cum segregata fuerit a salsugine, aut etiam spisse posita super salsuginem, est opportuna generationi : eo quod est aerea multum, et calida temperata et humida. Generatur autem haec terra in locis salsuginis ex duabus causis, quarum una est putrefactio herbarum et aliarum plantarum ad alia loca per reflexum maris add.notarum. Alia autem est alluvio quae fit in aquis

in mare influentibus. Haec autem alluvio per mare projicitur super littus : et cum profundum cooperuerit salsuginem,efficitur locus opportunus generationi plantarum, dummodo per congestum aggerem impetus et influxus maris ab eo prohibeatur.

Loca autem perpetuis nivibus cooperta omnino non competunt generationi plantarum : quia experimento comperimus nivem a temperamento generationis esse remotissimam, propter frigus glaciale quod est mortificativum. Excessus enim et superfluum frigus est in eo propter recessum loci illius a temperamento complexionis et crasis plantarum secundum genus suum : et ideo in talibus locis plantae minime inveniuntur, sed potius crystalli, et saxa nuda : et talia loca sunt ubi frequenter juga altissimorum montium. In locis tamen nivosis aliquando invenitur imperfectarum plantarum, et animalium quaedam aliquoties imperfecta generatio. Sub nive enim aliquando nascuntur gramina parvula acuta, et animalia quae lumbrici terrae vocantur : rubi etiam parvorum fructuum et herbae parvae amarae oriri inveniuntur sub nive. Sed generatio haec herbarum et animalium non est propter exigentiam nivis secundum seipsam, sed generat ea per accidens. Cujus significatio est, quod, sicut diximus in Meteoris ubi scientia excelsorum tradita est, nix generatur in figura fumi et vaporis, descendit rara et mollis disgregata vento et calore nubis, et congelata quam constringit aer frigidus vaporem circumstans, et in raritate partium ejus multus aer calidus includitur et retinetur : et cum calefit aut ex sole,aut forte ex eo quod cum cadit in terram, caliditas dispersa in nube comprimitur in unum, et incipit agere et resolvere humidum,et in tali resolutione exspirans calor secum trahit subtile humidum, sicut fit in re putrefiente : ex hac putrida et subtili aqua quae in se habet aerem et calorem, cum commixta fuerit terrae, efficitur seminarium quoddam parvarum planta- rum, quae ut frequenter acutae sunt et strictae : eo quod calidum circumpositum frigido, non potest spirare nisi in figuram acutam et strictam : quae etiam herbae amarae sunt, propterea quod expulsum calidum in humefacto talem saporem operatur, sicut scitur ex alibi a nobis determinatis. Animalia autem lumbricalia

generantur ex humore viscoso extrinsecus in pellem constante, interius spiritu pulsante, sicut in quarto Meteororum dictum est : et sunt animalia talia sicca multum et dosiccantia propter parvum humidum et mixtum desiccans calidum quod est in eis : propter quam causam etiam longam et acutam et strictam et per totum corpus annulosam accipiunt figuram : propter quod etiam pulvcrizata multum desiccant vulnera, et apostemata, et hujusmodi. Sic in talibus locis fiunt plantae : et, sicut diximus, quando affuerit calor amplians et resolvens qui dispersus fuit in vapore nivis, et accesserit aliquis calor solis adurentis eum, exspirat calor secum ducens humidum subtile, sicut fit in putrescente re : et tunc constabit illa humiditas in se retinens calorem solis, et tunc fit materia generationis : et si locus ille ad quem distillat talis humiditas, coopertus fuerit nive, ita quod evaporare non possit, sed potius reflectatur ad locum ad quem fit stillicidium, fiunt in loco illo plantae acutae strictae sine foliis, et sine floribus, et sine fructu, propter recessum loci a temperantia terrae quae est verus generationis locus plantarum et mater earum, quae terra homogenialis et connaturalis est commercioni quae exigitur ad plantarum origines : etenim folia et fructus habent fieri in talibus herbis minutis quae miscentur in locis temperatis secundum proprietates aeris et aquae : et ideo pauca sunt folia et flores in plantis quae nascuntur in locis, quae aut semper aut frequenter sunt nivosa.

Oportet autem scire, quod si locus in se temperatus in hyeme frequenter nivibus sit coopertus, iste ex nive foecundita-

tem accipit tribus de causis : quarum prima est, quod nix terrae evaporans reflectitur saepius ad terram propter nivis cooperimentum. Alia autem est, quia nivis respersa caliditas ad terram illam spirans conveniens generationi distillat superioribus partibus, vigorem nativitatis plantarum continuo infundit.Tertia causa est, quia nix frigiditate sua locum circumstante, vigorem principiorum generantium plantam continet ne evaporet, et continet terrae superficiem ne emittat intus in visceribus terrae vapores generatos, qui congregati ad superficiem ingrediuntur radices plantarum, et praestant eis nutrimentum et fomentationem, et generationem materiae quae ingreditur plantarum commixtionem. Sicut autem diximus, quod locus perpetuus in frigore propter nivositatem non convenit generationi plantarum. : ita etiam eodem modo in locis salatis et siccis non apparet multum generatio plantarum propter remotionem locorum a temperamento. Haec enim loca multam salsedinem habentia, multae sunt siccitatis, et per consequens etiam multae frigiditatis : eo quod calor complexionatis non convalescit, et retinetur, nisi in humido temperamento : et si alius calor sit aliquando in talibus locis, est adurens,. et talis calor non remanet, sed evolat, et remanet adustus frigidus et mortificans ea quae forte nasci debuissent : et signum hujus terrae est, quod minoratur et contrahitur ex siccitate et frigiditate : quia elongatur a calido et humido quae elevant et faciunt crescere et exaltare loca : propter quod terra dulcis quae abundat in calido dissolvente et in humido vaporante, frequentius elevatur in colles et montes, et terra salsuginis multae deprimitur et inferioratur.