Quinquagena III.

101. Ave, quam summa bonitas
Et humana obliquitas
Matrem Dei constituit,
In te carnem cum induit.

102. Ave, prae mulieribus
Glorificata omnibus,
Nos tuum iungat meritum
Cohorti caeli militum.

103. Ave, enixa subolem
Angelis venerabilem,
Ad sanctorum duc praemia
Haec promentes servitia.

104. Ave, paradisicola,

Sed olim terrae accola,
Absolve me a compede
Hostis, qua stringor valide.

105. Ave, conclusus hortulus
In quo ortus est flosculus,
Cuius mira fraglantia
Mundi replevit spatia.

106. Ave, stella, quae iubare
Alto fulges in aethere,
Nos reducas ab invio
Tuo splendore praevio.

107. Ave, quam universitas
Collaudat et divinitas,
Dum corpore et anima
Te tulit ad altissima.

108. Ave, virgo eximia,
Cuius mentis confinia
Acer confodit gladius,
Cum moreretur filius.

109. Ave, virga miraculo
Florens in tabernaculo,
Salvatorem concipiens,
Enixa virgo permanens.

110. Ave, quam plurifaria
Laus extollit in patria,
Reduc in stolam gratiae
Me dono sapientiae.

111. Ave, cuius per operam
Recuperamus superam
Sedem ac dona gratiae
Per opera iustitiae.

112. Ave, cuius praeconia
Replent mundi confinia,
Perpende laudes debitas,
Quas mea fert pusillitas.

113. Ave, quae es prophetico
Ore atque angelico
Nuntiata Emanuel
Mater et regis Israel.

114. Ave, vas pigmentarium,
Dulcorem servans varium,
Da tuam per dulcedinem
Defunctis meis requiem.

115. Ave, pincerna gratiae,
Vinum propinans veniae,
Precantis mente sedula
Disrumpe noxae vincula.

116. Ave, regina gloriae
Laudanda plurifarie
A cunctis mundi populis,
Praesertim a christicolis.

117. Ave, o fortis mulier,
Qua tortuosus coluber
Percussus exstat valide
De monte caeso lapide.

118. Ave, virtutum cellula
Legis adimplens singula,
Te extollentes sedula
Laude salva per saecula.

119. Ave, finis miseriae,
Mors infernalis furiae,
Amoris noda funibus,
Fractos irae turbinibus.

120. Ave, quae aspiramine
Misso de caeli culmine
Dum genuisti filium,
Turbatis fers auxilium.

121. Ave, nata feliciter

Vivens quoque normaliter,
Paca me monachiculum,
Ne incidam periculum.

122. Ave, caeleste speculum,
Cuius nunc pascit oculum
Aeternae pacis visio
In singulari gaudio.

123. Ave, cuius clementia
Mihi exstat fiducia,
Me a stagnis sulphureis
Serva et hostis laqueis.

124. Ave, scala, qua scanditur
Regnum caeli et rapitur
Violentis fidelibus,
Quos confortas cum precibus.

125. Ave, gaudens perenniter,
Quam amo singulariter,
Me consolare igitur,
Nam cor meum adfligitur.

126. Ave, domus eburnea
Turri praecincta aurea,
Me fac in bonis vigilem
Et hosti invincibilem.

127. Ave, regis altissimi
Ornati virga balsami,
Ecclesiae primoribus
Succurre in laboribus.

128. Ave, arbor iustitiae

Florem ferens et gratiae,
Nos pugnantes in stadio
Crucis praecinge gladio.

129. Ave, templum munditiae,
Carens peccati carie,
Redde me gratum filio,
Pressam mundi exsilio.

130. Ave, matrona nobilis,
Mundi buius volubilis
Caduca vincens fortiter
Habendo te humiliter.

181. Ave, virgo Iesseica,
Infusa unda caelica
Ad germinandum flosculum,
Qui salvet nos in saeculum.

132. Ave, cella aromatum

Unguen spirans charismatum.
Amoris liga vinculo
Dissutos irae scandalo.

133. Ave, quae caeli patria
Summa intrasti gloria,
Tuis astantem crebrius
Attende, clemens, laudibus.

134. Ave, nubes fructiferum
Solum reddens Canopicum,
Quando Christus simulacra
Fregit eiusque delubra.

135. Ave, virgo, qua remige
Mentes salvantur naufragae,
Fluctuanti in fluctibus
Mihi succurre precibus.

136. Ave, quam vocis organo
Laudo cordeque consono,
Mentem meam illumina
Per lacrimarum flumina.

137. Ave, cuius humilitas
Atque carnis integritas
Deum de caeli curia
Traxit pro nostra gloria.

138. Ave, qua venit novitas,
Quam nescivit antiquitas,
Virum complecti femina,
Qui caeli regit numina.

139. Ave, vas sapientiae,
Vas decoris et gratiae,
Hostis nos ab insidiis
Tuis serva praesidiis.

140. Ave, cuius est facies
Devotis magna saties,
Amoris ob indicium
Hoc sume sacrificium.

141. Ave, misericordiae
Fons et vas p udicitiae,
Da, ut nobis sit portio
In sanctorum consortio.

142. Ave, in cuius nomine
Desudo hoc in carmine.
Succurre mihi igitur,
Quem hostis trux persequitur.

143. Ave, o carens carie,
Benedicta primarie
Prae cunctis mulieribus
In mundo habitantibus.

144. Ave, mater deifica
Et gratia magnifica,
Nostris finem fac vitiis,
Ne tradamur suppliciis.

145. Ave, cuius conamine
A peccati ligamine
Tui solvuntur famuli
Te venerantes seduli.

146. Ave, virgo, flos redolens,
Pia corda refidens,
Animac meae vitia
Pelle tua fraglantia.

147. Ave, o Dei filia,
Cuius intratis cubilia
Gaudes ineffabiliter
Ipsum laudans perenniter.

148. Ave, quam honorifice

Turmae laudant angelicae,
Atque creata omnia
Tua dicunt praeconia.

149. Ave, quae caeli gloriam
Nacta es per victoriam,
Hostis, mundi et sanguinis
Vi superni spiraminis.

150. Ave, virgo, quam inclitus
Angelorum exercitus
Laudat et conventicula
Beatorum per saecula.

Parerga.
Super Beati immaculati.

l.Ave, virtutum cellula,
Legis adimplens singula,
Te extollentes sedula
Laude salva per saecula.

2. Ave, rosa o caelica,
Cordis mei spes unica,
Me virtute deifica
Peccatorem iustifica.

3. Ave, pudoris lilium,
Enixa Dei filium,
Quem nobis in auxilium
Ostende post exsilium.

4. Ave, o David filia,
Quae mentis cum vigilia
Mundi fugisti vilia
Naturaeque debilia.

5. Ave, filia Israel,

Quam nuntiavit Gabriel
Matrem fore Emanuel,
Quo reductus est Ismael.

6. Ave, o stirps Davidica,
Compta lege Mosaica,
Conserva me ab bostica
Fraude et diabolica.

7. Ave, quae caeli foribus
Sublimaris honoribus,
Praesta tuis memoribus,
Solamen in maeroribus,

8. Ave, cuius mirabilis
Partus est ineffabilis,
Forma desiderabilis,
Virtus est invincibilis.

9. Ave, virgo deifera
Et caelorum signifera,
Serva me ab ephimera
Mentis ac gente effera.

10. Ave, decus ecclesiae,
Mater misericordiae,
Motum aufer superbiae,
Quae me vexat cotidie.

11. Ave, norma iustitiae
Atque fons pudicitiae,
Nos certantes in acie
Dono conforta gratiae.

12. Ave, roratum Gedeon
Vellus virgaque Aaron,
Turris firmata in Sion,
Recte dicta theotocon.

13. Ave, lignum dulcifluum,
Fructum ferens perpetuum,
Fontem quoque irriguum,
Melle et lacte profluum.

14. Ave, vas Dei gratiae
Materque sapientiae,
Onus aufer tristitiae
Sanctae matris ecclesiae.

15. Ave, stirps castimoniae,
Florans florem iustitiae,
Me pollutum aspergine
Labis munda peccamine.

16. Ave, o venerabilis

Mundo et sanctis angelis,

O natu exspectabilis,

Ad bonum fac sim habilis.

17. Ave, mater mirabilis,
Cuius est inscrutabilis,
Partus et ineffabilis
Tamen superamabilis.

18. Ave, virgo, qua media
Mentis fugit inedia,
Pelle mundana taedia
Dans gratiae remedia.

19. Ave, caelorum ianua,
Per quam iusti ad pascua
Inducuntur perpetua
Mala nostra evacua.

20. Ave, norma humilium
Deique domicilium,
Tuum dilectum filium
Da lapsis in auxilium.

21. Ave, salus quae mentium
Es pro culpis dolentium,
Me in terram viventium
Duc pressum vi nocentium.

22. Ave, Abrahae filia,
Mundi spernens mobilia,
Me currentem per devia
Duc ad prolis ovilia.