70. De sancta Katharina.

In 1. Vesperis.

In 1. Nocturno.

Super Psalmos.

A Iucundare,

superna patria,

Laeta tibi

assunt sollemnia,

Plaude, tota

mater ecclesia,

Katherinae

promens praeconia,

Nam regina

florens munditia

Iam cum rege

regnat in gloria.

Ad Magnificat.

A. Scandit sponsa

regis ad solium,

Lux ad solem

pugil ad bravium,

Carpit virgo

convallis lilium,

Emit morte

vitae solacium.

Ad Matutinum.

Invitatorium.

Laudes dignas opifici

Psallat mater ecclesia,

Qui regni tam mirifici

Dat Katharinae praemia.

Antiphonae.

1. Virgo stirpe

regia genita,

Katharina

mundo sic oritur,

Doctrix vera

et martyr inclita,

Tamquam rosa

decora cernitur.

2. Cordis innocentia

Lexque veritatis

Locant hanc in patriam

Regni claritatis.

3. Urbis tu Alexandrinae

Flos, decor et gloria,

Dum martyris eximiae

Per te praefert insignia.

Responsoria.

1. Adest almae

matri ecclesiae

Dies festus

grandis laetitiae,

Dum haec virgo,

vas sapientiae,

Collocatur

in regno gloriae;

V. Haec doctrina

pollens mirifica

Sinae vecta

manu angelica.

2. Christi fide

pugil accenditur,

Cum nefandus

ritus dignoscitur,

Duris verbis

regem adgreditur,

Factus amens

iudex deluditur;

V. Stans invicta

clauditur carcere,

Non terretur

verbis nec verbere.

3. O plena Deo anima,

Quae tot doctores superas,

Dum Dei pandis intima

Ad ipsum cuncta revocas;

V. Cultum namque

negantes numinum

Unum Deum

fatentur Dominum.

In 2. Nocturno.

Antiphonae.

1. Scorpione laniatur

Taetro manens carcere,

Visu Dei confortatur

Et cibatur munere.

2. Prece rotam dissipat

Dire laniantem,

Saeva morte cruciat

Turbam fatigantem.

3. Regina dum prosilit

Fidei praeconio,

Vitae palmam suscipit

Capitis supplicio.

Responsoria.

1. De excelsis

beata agmina

Missa curant

suscepta vulnera,

Dum deorum

contemnit numina,

Lapsa caelo

cernuntur munera;

Tunc regina

subit certamina

Toto corde

tendens ad aethera,

V. Hanc coronans

virgo corroborat

Adepturam

palmam denuntiat.

2. Felix virgo,

in cuius labia

Tanta caelo

funditur gratia,

Quod doctorum

alta consilia

Imitantur

Dei fastigia,

V. Cum de Deo

celsa mirifica

Ipsis lingua

pandit angelica.

3. Rubus quondam

ardens recolitur,

Dum plebs docta

igni subicitur,

Pilus vestis

in nullo laeditur,

Rosae decor

facie promitur;

V. Hi odorem

dantes mirificum,

Sic mercantur

praemium caelicum.

In 3. Nocturno.

Antiphonae.

1 Regno Vasti aequiparas,

Rachelem pulchritudine,

Esther rogatu superas

Et Iudith fortitudine.

2. Sponsa regis curiam

Intrat gaudiosa,

Nam palmae victoriam

Praefert gloriosa.

3. Rosa de spina legitur,

De nube sol dirigitur

Dum virgo martyr caeditur

Et Christo sponso iungitur.

Responsoria.

1. Virgo poenis

caesa innumeris

Decollanda

pergit alacriter,

Post triumphum

diri certaminis

Caeli cives

facta perenniter;

V. Lactis unda

fusa pro sanguine

Beatorum

regnat in agmine.

2. Sina montis

sita in culmine,

Sacer liquor

manat ex tumulo,

Unde multos

pio iuvamine

Sanat virgo

salutis poculo,

Sic beata

suo certamine

Dona praestat

peccanti populo;

V. Venerantes

tuam memoriam

Audis pia

et praebes gratiam.

3. O matrona,

cuius auxilio

Sanitatum

dantur solacia,

Nunc devotis

dulci praesidio

Da foveri

divina gratia,

Ut transacto

tristi exsilio

Perfruamur

beata gloria.

V. Opem iam pro-

missam de superis,

Te precamur,

largire miseris.

In Laudibus.

Antiphonae.

1. Celebremus cum iubilo

Diem tantae laetitiae,

Virgo de carnis nubilo

Migrat ad thronum gloriae.

2. Post plurima supplicia

Iugulanda crudeliter

Praestanti beneficia

Laudes solvit alacriter.

3. Exspectans palmae gladium

Caelo locari postulat,

Colentibus martyrium

Opem de caelis impetrat.

4. Vox de supernis mittitur:

Veni, dilecta, propera,

Thalamo sponsi sistitur,

Ubi sunt cuncta prospera.

5. Te venerantes hodie

Devotionis laudibus

Christi commenda gratiae,

Ut det frui caelestibus.

Ad Benedictus.

A. O rosa rubens

cruore martyrii

Candensque lilium

expers contagii,

Tu namque magistra

sancti consilii

Es facta consors

divini consortii.

In 2. Vesperis.

Ad Magnificat.

A. Splendor mentis,

decor munditiae,

Tortor caedens,

flos eloquentiae,

Aulae tibi

contemptus regiae

Palmam praebent

caelestis curiae.