Congregatio de Causis Sanctorum 233

ALBIEN.

Beatificationis et canonizationis Ven. Servae Dei Ioannae Aemiliae de Villeneuve

Fundatricis Sororum ab Immaculata Conceptione v.d. « de Castres » (1811-1854).

DECRETUM SUPER MIRACULO

Serva Dei Ioanna Aemilia de Villeneuve nobili genere nata est Tolosae die

9 mensis Martii, anno 1811. Quae, cum facile moveretur proximi sui necessi-

tatibus, tam spiritualibus, quam temporalibus, religiosae vitae se tradidit,

egenis praesertim deserviens omnibusque illis qui re, corpore vel animo ve-

xabantur. Ad quod propositum assequendum ipsa Congregationem Sororum

ab Immaculata Conceptione, vulgo « de Castres », condidit, quae quidem et in

Gallia et in terris illis, in quibus Evangelium nuntiabatur, paulatim diffusa

est. Humilitate, studio orationis ac simplicitate, flagranti et assidua caritate

eius pietatis cultus floruit. A saeculo migravit die 2 mensis Octobris, anno

1854, cholera morbo oppressa, quo ipsa implicita erat dummodo ingruente

pestilentia aegrotantium curam haberet. Tam inclitam mulierem Ioannes

Paulus II, Summus Pontifex, theologales, cardinales iisque adnexas virtutes

heroicum in modum exercuisse declaravit die 6 mensis Iulii, anno 1991.

Propter eius beatificationem Postulatio Causae sanationem, quae divini-

tus, eadem Famula Dei deprecante, patrata ferebatur, huic Congregationi de

Causis Sanctorum subiecit expendendam. Quae res pertinet ad adulescentu-

lam Mahumetanam, e Monte Leonino, Bintam Diaby vocatam, quae, nitro

caustico absorbito mortem sibi consciscere conata, gravia in variis apparati-

bus sibi detrimenta attulerat. Cum autem aegrota, in valetudinarium Barci-

nonense traducta, nulla interposita mora secta esset, quamvis aliae deinceps

sectiones temptarentur, veterno correpta, in extrema iam phasi esse habita

est. Interea, de hac re a quibusdam mulieribus medicinae addictis certiores

factae, Sorores ac Noviciae ab Immaculata Conceptione, quarum sedes ad-

versum praedictum valetudinarium surgit, novendialibus supplicationibus

Dei Famulam prosecutae, nonnullas ipsius reliquias ad infirmae corpus ap-

posuerunt. Hic vero, qualibet provisione decepta, cito visa est in melius se

inclinare valetudo aegrotantis, quae quidem ad se rediit et perfecte convaluit.

Constat enim concursum temporis et contextum esse inter supplicationes,

quibus Dei Famula invocata est, et sanationem Bintae Diaby adulescentulae,

quae nunc non optima dumtaxat valetudine utitur, sed iustam vitam degere

potest, sive ipsa necessitudinem cum aliis habet, sive suo operi intenta est.