Acta Benedicti Pp. XVI 753

ad quod diaconus ex officio praedicandum vocatus est et quidem ita, ut quod

proclamat credat, doceat quod credit atque vivat quod docet ».271 Diaconos

igitur hortamur ut propria in vita lectionem credentem sacrae Scripturae

studio et precatione nutriant. Introducantur in sacram Scripturam et in eius

rectam interpretationem; ad mutuam relationem inter Scripturam et Tradi-

tionem; praesertim ad usum Scripturae in praedicatione, in catechesi et in

actione pastorali in genere.272

b) Verbum Dei et candidati ad Ordinem sacrum

82. Synodus peculiare pondus decretorio operi Verbi Dei dedit in vita

spirituali candidatorum ad sacerdotium ministeriale. « Discant candidati in

sacerdotium divinum Verbum amare. Fiat Scriptura velut anima eorum

theologicae educationis et in propatulo collocetur circulus ille, qui exegesin,

theologiam, spiritualitatem, missionem in orbem percurrit ».273 Adspirantes

ad sacerdotium ministeriale ad altam personalem necessitudinem vocantur

cum Verbo Dei, praesertim in lectione divina, quia eiusmodi necessitudine

ipsa alitur vocatio: sub luce subque virtute Verbi Dei reperi, intellegi,

amari et duci potest propria vocatio atque adimpleri propria missio, in

corde nutriendo Dei cogitationes, unde fides, uti responsio ad Verbum,

evadat novum iudicandi et aestimandi criterium erga homines et res, erga

eventus et quaestiones.274

Haec sollicitudo de oranti Scripturae lectione nullo quidem pacto

dichotomiam quandam alere debet quatenus ad institutionem exegeticam

tempore formationis postulatam. Synodus hortata est ut sacrorum alumni

efficaciter iuventur ad percipiendam necessitudinem inter biblicam

institutionem et precationem cum Scriptura. Scripturarum scrutatio efficere

debet maiorem conscientiam mysterii divinae revelationis et alere gestum

orantis responsionis Domino qui loquitur. Praeterea, authentica quoque

vita orationis facere non poterit quin in anima candidati augere valeat

desiderium magis in dies cognoscendi Deum qui suo in Verbo se revelavit

tamquam infinitum amorem. Maxima igitur adhibenda est sollicitudo ut in

vita sacrorum alumnorum haec reciprocitas inter institutionem et orationem

271 Ibid., 74: Ench. Vat. 17, n. 263. 272 Cfr. ibid., 81: Ench. Vat. 17, n. 271. 273 Propositio 32. 274 Cfr. Ioannes Paulus II, Adhort. ap. postsynodalis Pastores dabo vobis (25 Martii 1992), 47:

AAS 84 (1992), 740-742.