71. De sancta Katharina.

In 1. Vesperis.

In 1. Nocturno.

Antiphonae.

1. Triumphanti concordando

Militans ecclesia

Katharinae clara colat

Festa cum laetitia.

2. Haec producta ex Graecorum

Radice florigera

Venustate vernat morum

Aetate sub tenera.

3. Quam in flore iuventutis

Florem mundi spernere

Flos totius spes virtutis

Suo fecit munere.

4. Huius factus est amator

Formae sponsus virginum,

In conflictu conservator,

In triumpho praemium.

Ad Magnificat.

A. Tange lyram, sona laudes,

Digne namque tota gaudes,

Graecorum provincia,

Per quam coli ierarchia

Nova gaudet harmonia

Katharina socia,

Quam hac die laude plena

Caeli vexit ad amoena

Caelestis militia.

Ad Matutinum.

Invitatorium.

Convenite, iubilemus

agno sine macula,

Katharina cui plaudit

turba cum iuvencula.

Antiphonae.

1. Flores hortus dat conclusus

diversorum generum,

Quas in hortum transplan-

tandos

producit aethereum.

2. In hoc horto flos excrevit

mirae pulchritudinis,

Orbem terrae qui replevit

odore dulcedinis.

3. Novo florens in virore

sub novella plantula

Crescit tacta caeli rore

candens sine macula.

4. Haec est illa Katharina,

Costi regis filia,

Rosam vincens per odorem,

per candorem lilia.

5. Quae colendo Deum verum

carnis in se iacula

Trucidavit exponendo

corpus ad pericula.

6. Minas sprevit haec tyranni

virtute constantiae,

Iura legis infidelis

in annis infantiae.

Responsoria.

1. Gemma Graeca Katharina,

Costi regis filia,

Spe consurgens in divina

Haec contemptibilia

Sprevit, nolens in ruina

Quaerere stabilia;

V. Florem mundi

contemnit florida

Virgo florere

gliscens in gloria.

2. Cogit Caesar Christi servos

libare daemonibus,

Sed tyranni virgo iussa

voce damnat libera,

V. Saevit hostis innocentes

perimens atrociter.

3. Argumenta Katharinae

Fulta legis et doctrinae

Sanae testimonio

Deum non concludi iine

Probant, menti nec ferinae

Satisfacit ratio,

V. Non enim corpus

peccans nec anima

Fit sapientiae

sedes malevola.

4. Virgo flagellatur

crucianda fame relegatur,

Carcere clausa manet,

lux caelica fusa refulget,

Fraglat odor dulcis,

cantant caeli agmina laudes;

V. Sponsus amat sponsam,

salvator visitat illam.

In 2. Nocturno.

Antiphonae.

1. Poenas mortis haec elegit

Morte mortem superans,

In se totam se collegit

Soli Deo militans.

2. Ex regali stirpe nata

Regem regum coluit,

Cui mente copulata

Tota iungi studuit.

3. Sponsi fervens in amorem

Poenas non extimuit,

Poenam ferens graviorem,

Quod dilecto caruit.

4. Praedicante Katharina

Verbis et miraculis

Cum Porphyrio regina

Fit in fide stabilis.

5. Furit Caesar et utramque

Crudeli martyrio

Vita privat temporali

Coniuncto Porphyrio.

6. Martyr ut oravit

gladium subit, aethera scan-

dit,

Sponsus honorque datur,

cum Christo deliciatur.

Responsoria.

1. Sponsa Christi gloriosa

gaudet inter verbera,

Nulla movent hanc promissa

nec terrent supplicia,

V. Caritate vulnerata

tendit ad caelestia.

2. Christus sanctam tenebroso

reclusam ergastulo

Miro satis atque blando

confortat eloquio;

V. Salve, virgo benedicta,

quam Christi praesentia.

3. Gaudet martyr in tormentis,

Sponsum gerens purae mentis

Clausum armariolo,

Etsi panis huic doloris

Detur, tamen de amoris

Potatur alveolo;

V. Saevit lupus

trux in oviculam,

In pullum milvus,

grus in aviculam.

In 3. Nocturno.

Ad Cantica.

A. Deo nostro sit iucunda

Decoraque laus, qui munda

Corda replet gratia,

Qui divisa maris unda

Viam suis per profunda

Pandit ad caelestia.

Responsoria.

1. Surge, virgo, et nostras

sponso preces aperi,

Tua vox est dulcis

in aure Domini,

Quae pausas

sub umbra dilecti

Ab aestu mundi,

Transfer nos

ad amoena paradisi;

V. Pulchre, Sion filia,

Pro mortali tunica

Agni tecta vellere

Et corona gloriae.

2. Ense caeso virginali

Collo signo speciali

Sponsam sponsus virginum

Inter sponsas honoravit.

Lacte vulnus cum manavit,

Rosae iungens lilium.

V. Pape, serta Katharina

Cum ornatu vario

Cumulata portat trina

Fructu centenario.

3. O Christi pietas,

o virtus atque potestas,

Virginis ex membris

sacri fluit unda liquoris,

Unde fides aegris

infundit dona salutis;

V. Virginis ob meritum

manet hoc memorabile sig-

num.

4. O mater nostra,

ter sancta quaterque beata,

Cum prece devota

famulantum suscipe vota,

V. Iam Christo iuncta

sponsoque tuo sociata.

In Laudibus.

Super Psalmos.

A. Regnans regnat Dominus,

Mundo factus comminus

Carnis per materiam,

Katharinam virginem

Qui per luctam celebrem

Transvexit ad patriam.

Ad Benedictus.

A. Benedictus Dominus

omnis creaturae,

Ultra cursum filius

virginis naturae,

Katharinam virginem

hodie secure

Qui locat post proelium,

Triumphi dum gaudium

Dat vitae futurae.

Per Horas.

Ad Primam.

A. Ave, virgo gloriosa

clarior sideribus,

Cuius vultum et decorem

concupivit Dominus,

Funde preces creatori

pro tuis supplicibus.

Ad Tertiam.

A. Ave, gemma claritatis

ad instar carbunculi,

Ave, rosa paradisi,

more fraglans balsami,

Katharina, virgo felix

gloriosa meritis,

Assistentes tuis festis

caeli iunge gaudiis.

Ad Sextam.

A. Exspecto pro te gladium,

iesu, rex bone,

Tu meum da

paradiso spiritum

Et fac misericordiam

Meam agentibus memoriam.

Ad Nonam.

A. Quod sitivit, contemplatur,

Contemplando delectatur,

Delectanto fruitur

Et fruendo satiatur,

Satiata non gravatur,

Dum sitit, quo pascitur.

In 2. Vesperis.

Ad Magnificat.

A. Virgo, decus mundi,

species fidei, gemebundi

Te petimus, te pulsamus,

te corde rogamus,

Gemma tui sexus,

peccati solvito nexus.