Quinquagena I.

1. Ave, radix gratiae,

Ex qua crevit fructus,
Humanae miseriae

Quo sanatur luctus,
Adam cum progenie

Per quem est reductus,
Olim per fallaciae

Auctorem seductus.

2. Ave, mater figuli

Universitatis,
Contra quem increduli

Fremuerunt gratis,
Aurem praebe servuli

Tui praedicatis,
Quibus te et angeli

Laudent cum beatis.

3. Ave, virgo gloria

Tibi devotorum,
Providens ex gratia

Saluti eorum,
Non timebo milia

Adversariorum,
Si assis praesentia

Munerum tuorum.

4. Ave, ager proferens

Benedictionis
Fructum, qui reficiens

Est nos summis bonis,
Esto mei miserens

Tempore agonis,
Larvas turpes abigens

Barathri draconis.

5. Ave, fons dulcissime

Super omni melle,
Quae tenes iustissime

Nomen maris stellae,
Mundialis adime

Impetum procellae,
Quae decurvat animae

Meae bonum velle.

6. Ave, mater gratiae,

Mater divinalis,
Regis caeli curiae

Thronus principalis,
Laus tuae clementiae

Haec nos specialis
Reddat innocentiae,

Redimat a malis.

7. Ave, quam nunc adeo

Hac bymnologia,
Nam te laude censeo

Dignam, o Maria,
Unde tibi spondeo

Servitutem, pia,
Interim quod transeo

In huius vitae via.

8. Ave, admirabilis

Cunctis o femella,
Quam voco literalis

In his, maris stella,
O mater amabilis,

Pro me interpella
Stante in periculis

Mundique procella.

9. Ave, Iudith fortiter.

Hostes quae prosternis,
Corpus cum viriliter

Truncas Holofernis,
Adeo flebiliter

Te nunc, mater, cernis,
Uti me hilariter

Mundes in internis.

10. Ave, stella nobilis
Stellaque serena,
Cunctis carens maculis
Gratiaque plena,

Alliga nos vinculis
Et legis habena,

Servens a piaculis
Stygisque hyaena.

11. Ave, quae es pauperum

Mater liberalis,
Tuorum hos munerum

Protegens sub alis,
Libera me miserum,

Deprecor, a malis
Daque locum superum

Vitae aeternalis.

12. Ave, sidus aureo

Rutilans fulgore,
Modo cuius ferveo

Pius in amore,
Lustra me virgineo

Tuo cum splendore
Tinctum fuligineo

Scelerum colore.

13. Ave, quam alacriter

Mentis acutela
Laudo et sinceriter

In ista loquela,
Pellatur celeriter

Per te corruptela,
Indidit pellaciter

Quam Stygis muscela.

14. Ave, tabernaculum

Summae trinitatis.
Pauperis umbraculum,

Pausa fatigatis,
Sis nobis latibulum

Multum tribulatis.
Auferens piaculum

Nostrae pravitatis.

15. Ave, prudentissimi

Salomonis nata,
Filii dulcissimi

Dextris sociata,
Mei sis pauperrimi

Clemens advocata,
Nec permittas perimi

Me propter peccata.

16. Ave, mater inclita

Sempiterni regis,
Quae per tua merita

Culpas nostras tegis,
Populum civilita

Christiani gregis
Ipsumque habilita

Ad mandata legis.

17. Ave, cunctis sanctior
Sanctis, o Maria,
Cui libens famulor
Hac in poetria,
Laqueis praeoccupor

Positis in via,
Hos disrumpe, deprecor
Te, o virgo Maria.

18. Ave, regis caelici

Thalamus pudoris,
Vinea tu Engaddi,

Balsamus odoris,
Esto mei lubrici

Clibano ardoris
Calorem deifici

Tribuens amoris.

19. Ave, cuius filii

A patre legamen
Hominis exsilii

Fuit relevamen,
Tortis per incendii

Stygis da purgamen
Clementis subsidii

Tui consolamen.

20. Ave, prae carbunculo
Splendens margarita,
Per quam huic saeculo

Vera venit vita,

Mea mens oraculo

Tuo sit munita,

Ne hostili vinculo

Cadat irretita.

21. Ave, cuius animum
Pressit maestitudo,
Cum gravavit filium
Poenae gravitudo,

Tua tuum famulum

Salvet lenitudo,
Quem perturbat plurimum

Cordis amaritudo.

22. Ave, stella clarius

Radians quam luna,
Tibi famulantibus

Praebens opportuna,
Deo tuis precibus,

Quaeso, me aduna,
Caleo interius

Qui peccati pruna.

23. Ave, quam nunc praedico

Per divinum nutum
Carmine poetico

Dominam virtutum,
In procinctu bellico

In hostem versutum
Statim mihi illico

Precis praebe scutum.

24. Ave, in quam fortius

Post Deum confido,
Per quam cordis citius

Pellitur formido,
Me cum temptat acrius

Honoris cupido,
Suggere velocius

Poenas, quas formido.

25. Ave, stirps eximia,

Ex qua fructus crevit,
Mundi qui confinia

Odore replevit,
Carnis luxum expia,
In me qui desaevit,
Et nunc ex frequentia
Quasi inolevit.

26. Ave, virga fertilis

De radice Iesse,
Digna venerabilis

Dei mater esse,
O virgo amabilis,

Menti meae fessae
Mortis in periculis

Digneris adesse.

27. Ave, arbor florida,

Fructus qua divinus
Crevit, sanans morbida

Corda, quae vulpinus
Dolus fecit sordida,

Rogo te reclinus,
Prece tua vivida

Fac, sim columbinus.

28. Ave, cui geniculor

Cordis ex amore,
Nam omni profiteor

Te dignam honore,
Assis mihi, deprecor,

Gratiae madore,
Quia iam destituor

In carnali flore.

29. Ave, quam per grammaton

Huius symphoniae
Matrem homousion

Scribo vel sophiae,
O felix theotocon

Praesta mihi pie,
Ne me urat Phlegethon

In extremo die.

30. Ave, lucernarium

Caeli portans lumen,
Quod per modum varium

Menti dat acumen,
Perduc me in caelicum,

Deprecor, cacumen,
Contempler in saeculum

Ut aeternum numen.

31. Ave, stella rutilans,

Stella matutina,
Quam accendit radians

Semper lux divina,
Esto, precor, miserans

Me, clemens regina,
Quem pungit exterminans

Vitiorum spina.

32. Ave, cui pneumaton
Olim obumbravit,
Matrem homousion
Cum te consecravit,

Aufer, o theotocon,
Pater quam amavit,

Ardorem, quem Acheron
Malis praeparavit.

33. Ave, quam religio

Novi testamenti
Frequenti suffragio

Pulsat in praesenti,
Assis e vestigio

Mihi nunc maerenti
In tuo confugio

Multum confidenti.

Si. Ave, quae devotius

Legis obsequelam
Tenens das credentibus

Exemplum, suadelam,
Te deprecor attentius,

Praesta confugelam,
Qua devitem cautius

Satanae sutelam.

35. Ave, mater afflua

Mentis pietate,
Corda culpis vacua

Replens caritate,
A me, precor cernua

Te humilitate,
Ut propellas nocua

Cum iniquitate.

36. Ave, o columbula

Zeli carens felle,
Sed cluens per saecula

Gratiarum melle,
Aufer cuncta scandala

Credentis turbellae
Nostraque piacula

Penitus evelle.

37. Ave, venerabilis

Virginum regina,
Cunctis praeoptabilis

Gratiae resina,
Meis sis piaculis,

Precor, medicina,
Ne interminabilis

Me premat ruina.

38. Ave, virgo stabile

Fidei fulcimen,
Sub quo vulgus flebile

Recipit munimen,
Tuum delectabile,

Tuum da blandimen,
Mortis cum tristabile

Sum scansurus limen.

39. Ave, quam aggredior

Supplex hac in prece,
Ut me mundes, inquinor

Qui peccati faece,
Tuum natum, deprecor,

Pia mater, mulce,
Ne damnet, quam mereor,

Me secunda nece,

40. Ave, stella, caecitas

Mentis qua fugatur,
Cuiusque serenitas

A nobis amatur,
Per te nam infirmitas

Vetus medicatur,
Et omnis austeritas

Legis temperatur.

41. Ave, hauritorium

Quae es vivi fontis,
In coetum credentium

Per te emanantis,
Sume laudatorium

Modo te amantis,
Ab ipso incendium

Pellens Phlegetontis.

42. Ave, virgo, luminis

Lampas sempiterni,
Quod propellit hominis

Tenebras interni,
Manu me regiminis

Dirige materni,
Ne post vim examinis

Me contingat sperni.

43. Ave, honorifica

Redemptoris mater,
Pietate unica

Qui est nobis frater,

Ipsi nos unifica,
O amoris crater,

Quos fraude sophistica
Hostis vexat ater.

44. Ave, cuius species

A nobis amatur
Nec non et effigies

Iure veneratur,
Nam tu es materies,

Qua praeparabatur
Christo Deo requies,

Cum incarnabatur.

45. Ave, sidus fulgidum

Caelicum dans lumen,
Mundo reddens placidum

Sempiternum numen,
Riga me nunc aridum

Per amoris flumen
Sublevaque rigidum

Ad caeli cacumen.

46. Ave, cui milito

Hac in poetria,
Quam et gaudens recito

Mentis symphonia,
Te honore debito

Precor, o Maria,
Ut me salves merito

Tuo, virgo pia.

47. Ave, cuius nobilis

Genealogia
Proditur a saeculis

Multa prophetia,
Serves a piaculis

Me, virgo Maria,
Qui te laudum titulis

Laudo mente pia.

48. Ave, mater niveo

Praefulgens splendore,
Nam vere virgineo

Emines pudore,
Tuo me calcaneo

Debito honore
Haerentem tartareo

Serves a fervore.

49. Ave, arca foederis

Novi testamenti,
Levigat quod veteris

Pondus instrumenti,
Squamas aufer sceleris

Motas faeculenti,
Qui ab annis teneris

Instat meae menti.

50. Ave, quam glorifico

Istud per dictamen.
Cuius prece sentio

Semper sublevamen,
Placa tuo merito

Patrem, natum, flamen,
Ut ab omni debito

Me absolvat. Amen.