72 Acta Apostolicæ Sedis - Commentarium Officiale

Soror continuo et sponte intercessionem imploravit Venerabilis Servi Dei Aloisii a Maria Consolata, quem tunc viventem illa cognoverat eum- que in opere erat quoque comitata. Quaedam consorores et familiares eius precibus se sociarunt ad sanationis donum impetrandum. Infirma in se- dem chirurgicam ad incisionem exsequendam gestata, medici detexerunt tumorem omnino evanuisse. Aliquot post dies Soror e valetudinario dimitti potuit. Temporis congruentia evidens exstitit ac nexus inter supplicationes ad Venerabilem Dei Servum et sanationem infirmae, quae statim bona frui potuit valetudine et facultate iuxta humanas necessitudines vitam gerendi.

De sanatione, quae mira est habita, apud Curiam Ecclesiasticam Tauri- nensem instructa est Inquisitio dioecesana a die 10 mensis Martii anno 2006 ad diem 16 mensis Ianuarii anno 2007, cuius iuridicam auctoritatem haec Congregatio approbavit per Decretum die 27 mensis Iunii anno 2008 editum. Periti Medici Dicasterii in sessione habita die 20 mensis Iunii anno 2013, edixerunt sanationem celerem, perfectam, constantem fuisse et secundum ho- diernam scientiam medicam inexplicabilem. Die 3 mensis Decembris eodem anno Consultores Theologi in Peculiari Congressu se congregarunt. Et die 1 mensis Aprilis anno 2014 locum habuit Sessio Ordinaria Cardinalium Patrum et Episcoporum, cui egomet, Angelus Card. Amato, praefui. Et in utroque Coetu, sive Consultorum sive Cardinalium et Episcoporum, posito dubio an de miraculo divinitus patrato constaret, responsum affirmativum prolatum est.

Facta demum de hisce omnibus rebus Summo Pontifici Francisco per subscriptum Cardinalem Praefectum accurata relatione, Sanctitas Sua, vota Congregationis de Causis Sanctorum excipiens rataque habens, hodierno die declaravit: « Constare de miraculo a Deo patrato per intercessionem Ve- nerabilis Servi Dei Aloisii a Maria Consolata (in saec.: Andreae Bordino), Fratris Professi Congregationis Fratrum a S. Iosepho B. Cottolengo, videlicet de celeri, perfecta ac constanti sanatione cuiusdam sororis a « carcinoma ve- scicale uroteliale-papillare G1-G2 a sviluppo superficiale e micro papillare ».

Hoc autem decretum publici iuris fieri et in acta Congregationis de Causis Sanctorum Summus Pontifex referri mandavit.

Datum Romae, die 3 mensis Aprilis a.D. 2014.

AngeluS CArD. AmAto, S.D.B. Praefectus

L. G S.

G mArCelluS BArtoluCCI Archiep. tit. Mevaniensis, a Secretis