Quinquagena III.

101. Ave hortus deitas

Christi quo latebat,
Cum se sua pietas

Carne vestiebat,
Nostra tunc humanitas

Dulciter gaudebat,
Cum se sua pietas

Carne vestiebat.
102. Ave, quam organicis

Laudo melodiis
Cum choris angelicis

Sive hierarchiis,

Fraudibus ab hosticis

Precibus me piis
Libera et lubricis

Mentis phantasiis.
103. Ave, cui opusculum

Huius symphoniae
Affectum per solidum

Cano mentis piae,
Tuere me famulum

Tuum, o Messiae
Mater, ne in scandalum

Cadam in hac die.

104. Ave, felix domina,

Ave ter quaterque,
Cui laudum carmina

Concinunt plerique,
Tua consolamina

Protegant ubique,
Quos turbant molimina

Hostium inique.

105. Ave, virgo gratiae

Donis opulenta,
Nam misericordiae

Semper es intenta,
Consigna cotidie

Manu me extenta
Et tandem clementiae

Divinae praesenta.

106. Ave, consistorium,

In quo celebravit
Trinitas concilium,

Quo deliberavit
Hominis exilium,

Per quod exsulavit,
Solvere et filium

Mittere dictavit.

107. Ave, quae in superis

Es collateralis
Dulcis nati dexteris

Cunctis carens malis.
Laus tua his litteris

Scripta aliqualis
Protegat cum ceteris

Me sub tuis alis.

108. Ave, quam antiquitus

Prophetae scripsere,
Messiam divinitus

Gignere debere,
Mente fac nos penitus

Ipsi adhaerere,
Ut dignetur primitus

Admissa delere.

109. Ave, quam altissimi
Matrem theoria
Scripit et verissimi
Vatis prophetia,

Mei sis pauperrimi
Tutrix, virgo pia,

Quem perturbat pessimi
Hostis phantasia.

110. Ave, natu nobilis,

Stirpe nam regali
Genita describens

Voce prophetali,
Dono tuis famulis

Sapientiali,
Succurre a maculis

Mundans omnis mali.

111. Ave, honorifica

Imperatrix mundi,
Quam laudant per cantica

Animo iucundi,
Auferas tristifica

Hostis furibundi,
Qui optat pro lubrica

Culpa nos confundi.

112. Ave, o munifica

Mater pietatis,
Munera mirifica

Dans a te amatis,
Igne me califica

Tuae caritatis,
Qui ob mundi lubrica

Algeo peccatis.

113. Ave, quae fons veniae,

Stella quoque maris
Et misericordiae

Mater nuncupans,
Filiis ecclesiae

Dona largiaris,
A quibus cotidie

Digne veneraris.

114. Ave, quae conventui

Praesidens sanctorum
Gratularis plausui

Carminum eorum,
Consolamen luctui

Praebe defunctorum,
Hos iungendo caetui

Regni supernorum.

115. Ave, sidus rutilum,

Ave, radix Iesse,
Produxisti surculum

Quae de caeli messe,
Cum me, tuum famulum,

Mori est necesse,
Per te istum iubilum

Peto tunc adesse.

116. Ave, honorabilis

Omni christiano,
Quam his laudum titulis

Colere propono,
Solve me a vinculis,

Precor, tuo dono,
Me commendans singulis

Horis summo bono.

117. Ave, apis utile

Dans mellificamen,
Quod mentis culpabile

Solvit religamen,
Da per huius nobile

Cantici libamen
Mihi tui stabile

Nominis amamen.

118. Ave, temperantiae

Forma exemplaris
Et oboedientiae

Norma singularis,
Speculum iustitiae

Recte praedicaris,
Mater sapientiae

Es et nominans.

119. Ave, virgo, nuntia

Dei pietatis,
Cuius mundum gratia

Solvit a peccatis,
Succurrat nunc mitia

Tua tribulatis
Praebens his solacia

Tuae bonitatis.

120. Ave, stella lucida,

Cuius per micamen
Mens maerore lurida
Sumit delectamen,

Tua luce fulgida
Des astipulamen,

Fugem mente provida
Hostis quo fraudamen.

121. Ave, stirps salvifica

Ferens medicamen,
Per quod plebs catholica

Sumit recreamen,
Mentis reaedifica

Meae laceramen,
Fraus quod infert hostica

Frequens per luctamen.

122. Ave, Christi Domini

Mater et ancilla,
Per quam dantur homini

Tempora tranquilla,
Sectas tuo nomini

Adversas sugilla,
Contra te quas inferi

Construit anguilla.

123. Ave, cui mittito

Dulce salutamen,
Quaerens modo debito

Tuum adiuvamen,
Infunde, te flagito,

Gratiae stillamen,
Quia mente fluito

Noxae ob gravamen.

124. Ave, quam clementiae

Vitaeque honestas
Exornat et gratia

Summaque potestas,
Passiones ascia,

Deprecor, funestas,
Quis causantur vitia

Et mentis egestas.

125. Ave, praeamabilis,

Cuius hilaramen
Nobis tuis famulis

Praebet consolamen,
Largire christicolis

Illud per effamen
In cunctis periculis

Tuum sublevamen.

126. Ave, decus hominum

Omnisque facturae,
Tu via ad bravium

Perducens secure,
Nos in aedificium

Caelicae structurae
Coapta per filium

Tuae geniturae.

127. Ave, stirps iustitiae

Fructum ferens divum,
Praebentem laetitiae

Credulis olivum,
Roga, mater gratiae,

Pro me Deum vivum,
Ut misericordiae

Mihi fundat rivum.

128. Ave, turris aurea

Bene moenitata,
A cohorte Stygea

Nunquam expugnata,
Haec dicta carminea

Per me decantata,
O mater virginea,

Tibi exstent grata.

129. Ave, arbor gratiae

Abundans olivis,
Succurrens cotidie

Mortuis et vivis,
Repleas clementiae

Divinae nos rivis
Filiis ecclesiae

Nectens adoptivis.

130. Ave, quae facetia

Carminis praeclari
Dixeras humilia

Corda exaltari,
Tua fac me gratia

Sic humiliari,
Ut in caeli gloria

Queam sublimari.

131. Ave, quam profiteor
Genetricem Dei,
Unde nunc te veneror
Plausu cordis mei,

Da mihi, te deprecor,

Et progeniei,
De qua carne orior,

Locum requiei.

132. Ave, sidus gloriae

Splendens plus quam luna,
Omnibus per gratiae

Dona oportuna,
Credentis familiae

Post Deum spes una,
Lapsos per discordiae

Virus coaduna.

133. Ave, cui pusillitas

Mea et conamen
Laudes reddet debitas

Per hoc modulamen,
Tua det maternitas

Mortuis solamen,
Quos premit acerbitas

Poenae vel gravamen.

134. Ave, securissima

Navis navicilla,
Qua fidelis anima

Navigat tranquilla,
Haec, mente promptissima

Quae pango, mixtilla
Placent, quem purissima

Lactasti mamilla.

135. Ave, o nubecula,

Cuius per gestamen
Natus fugit scandala

Regisque fraudamen,
Momenta per singula

Mihi sis tutamen,
Quo vitem per saecula

Hostis machinamen.

136. Ave, o victoriae

Signum Gedeonis,
Clipeus tu Iosue,

Victrix Pharaonis,
Huius fanti strenue

Carmen cantionis
Fortiter da vincere

Regem Babylonis.

137. Ave, venerabilis

Et intemerata,
Tu virtutum flosculis

Mire decorata,
Mea mens a vinculis

Carnis liberata
Te laudet cum angelis

In vita beata.

138. Ave, fax luciflua,

Cor obtenebratum
Abigendo nocua

Dans illuminatum,
Per id carmen cernua

Mente decantatum
In vita perpetua

Para mihi statum.

139. Ave, gubernaculum

Christianitatis,
Depellens periculum

Velut firma ratis,
Resolve obstaculum

Meae caritatis,
Quo premor per scandalum

Vivens in peccatis.

140. Ave, o prodigium

Prophetis ostensum,
Tuum qui praeconium

Scribunt in immensum,
Hoc per sacrificium

Laudisve incensum
Placa tuum filium

Peccatis offensum.

141. Ave, cuius partui

Chori angelorum
Concinebant strenui

Canticum decorum,
Auditum ploratui

Praebe miserorum
Traditorum aestui

Purgatoriorum.

142. Ave, odorifera

Herba dans medelam
Propellentem scelera
Mentisque querelam,

O mater cbristifera,
Da mihi cautelam

Ducasque ad aethera
Meam parentelam.

143. Ave, funda Davidis,

Cuius per iactanien
Philistaeis rabidis

Abstulit solamen,
Mente nobis aridis

Gratiae guttamen
Largire ac pavidis

Tuum adiuvamen.

144. Ave, quam magnifico

Hac oda meapte,
More quam poetico

Concino ornate,
Me, o mater, supplico,

Tua pietate
Fac in regno caelico

Vivere beate.

145. Ave, virgo, pauperum

Clemens miseratrix,
Dei atque hominum

Potens mediatrix,
Tu nostrorum scelerum

Esto expiatrix
Et ad vitae meritum

Sis cooperatrix.

146. Ave, infirmantium

Mente laniena
Gratiarum omnium

Medicinis plena,
Prae peccatis saucium

Cor meum serena,
Alligans in posterum

Legis cum catena.

147. Ave, quam temporibus

Patres primitivis
Coluerunt laudibus

Multum mirativis,
Da, ut in caelestibus

Tuus sim concivis,
Qui laudo concentibus

Modo te proclivis.

148. Ave, quam veraciter

Saeculum primaevum
Contrituram fortiter

Scripsit anguem saevum,
Rogo te suppliciter

Omne fuga laevum,
Odis ut hilariter

Laudem te per aevum.

149. Ave, cui carminum

Laudes luculenter
Conventus caelestium

Canunt et gaudenter,
Praesens infortunium

Turbans nos dolenter
Tu in eufortunium

Commuta clementer.

150. Ave, cui assidue

Sanctorum examen
Canit ac perpetue

Laudis iubilamen,
Peccatorum despue

Meorum fuscamen,
Commendans individuae

Trinitati. Amen.