76. De s. Petro Piperacensi.

In 1. Vesperis.

Antiphonae.

1. Harmonizans cantet ecclesia,

Dum recolit Petri solemnia,

Nunc concinat cantica dulcia,

Congaudeat mentis laetitia.

2. Sacrosancti praeconia
Petri confessoris
Psallat haec familia

Vocibus sonoris,
Dignus est memoria.

3. Resonent tripudia
Laudibus canoris,
Petri sunt solemnia,
Dies est honoris.
4. Piperaci coenobium

Gaudet de Petri gloria,
Novum recitat gaudium
Poscens ejus suffragium.
5. Plebem tuam naufragari,
Ubi tot angustiae,
Non permittas in hoc mari,
O defensor patriae.

Ad Magnificat.

A. O Petre, nostrum speculum,
Sis nobis defensaculum,
Protege tuos famulos
In tua laude sedulos ;
O Petre, petra solida,
Nos fragiles consolida,
Hic confer nobis gratiam
Et post aeternam gloriam.

Ad Completorium.
Super Nunc dimittis.

A. Petrum magnificet

haec praesens concio,
Gratias referat

virginis filio,
Nam de valle miseriae

Ad coeli gaudium
Petrum sustulit hodie

Reddendo bravium.

Ad Matutinum.

Invitatorium.

Regenti cuncta saecula
Psallamus mente sedula,
Qui sublimavit hodie
Petram ad montem gloriae.

Antiphonae.
1. Non abiit in viam
Peccatorem,
Sed tenuit semitam
Perfectorum,

Domans carnis lasciviam,
Sprevit mundanam gloriam.

2. Servivit in timore

Domino dominantium,
Ardebat in amore

Totus semper coelestium.

3. In praesenti exsilio

Christus sua protectio,

Scandit ad montem gloriae

Per viam poenitentiae.

Responsoria.

1. In coelesti palatio

Nova petra erigitur,
In sanctorum collegio

Sanctus Petrus recipitur ;
Gaudet accepto bravio

Post hoc praesens exsilium,
In coelesti rosario

Floret ut vernans lilium.
V. Ignis divini spiritus
Arsit in eo penitus
Omnem carnis rubiginem,
Dans boni plenitudinem.

2. Maceratur jejunio.
Induitur cilicio,
Offert se Deo hostiam,
Anhelando ad patriam,
Vitam duxit angelicam,
Rotam despexit lubricam.
V. Nutu divino praevio
Fungitur sacerdotio,
Ut stella matutina
Praefulsit in doctrina.

3. Multis refulgens titulis
Petrus claret miraculis,
Mulieri redditur visio
Habitu[que cessat] privatio ;
V. Magna micant merita,
cujus fuit inclita vita,
Hunc sua facta virum

demonstrant optima mirum.

In 2. Nocturno.
Antiphonae.

1. Crucis facit signaculum,
Venenum pellit noxium,
Sanum reddit corpusculum,
Carnis fugat incendium.

2. Jam sanatur dupliciter
Pulso veneno noxio
Mulier mirabiliter,
Mentis curatur vitio.

3. Monstrat sibi divinitus,
Locum Domini spiritus
Aptum orationibus,
Quo vacat Dei laudibus.

Responsoria.

1. Canonicum

assumit habitum,
Hujus mundi

deserit spiritum,
Duos fratres

sibi confoederat,
Fructum parat

sicut conceperat,
Augmentatur

fratrum solatium
Et numerus

crescit fidelium,
Juxta praeceptum

Augustinicum
Victum sequuntur

apostolicum.
2. Exauditur

ejus oratio,
Liberatur

domus incendio,
Ignem suis

exstinguit precibus,
Multis fulget

clarus miraculis.
V. Ardor ignis exstinguitur.
3. Catervatim

ruit plebs sedula
Ad videndum

ejus miracula,

Et corpora

curat languida,
Multis donat

morbis remedia.
V. Erigit templi fabricam,
Ubi plebem famelicam
Reficit spiritaliter,
Hostem vincit viriliter.

In 3. Nocturno.
Antiphonae.

1. Operatus justitiam

Tandem venit ad gloriam
Fruens aeterna requie
Regno coelestis patriae.

2. Non fuit desiderio
Fraudatus sive praemio,
In Domino lactabitur,
In coelis coronabitur.

3. Innocens corde, manibus,
Perfectus in virtutibus
Ascendit ad coelestia,
Ubi sunt vera gaudia.

Responsoria.

1. Parat delere funditus
Inceptum aedificium
Frendens malignus spiritus
Per saxi praecipitium ;
Saxum de monte corruit,
Sed hostis non praevaluit,
Rupes in terra figitur
Et in lapsu comprimitur.

V. Petras saxum retinuit,
Signum crucis opposuit,
Mira Dei potentia
Renovat mirabilia.

2. Hic Guidonem canonicum
Sanavit paraliticum,
Confert medelam corporis
In brevi hora temporis.

V. O sacerdotum gloria,
Audi nostra suspiria,
Pelle nostra facinora
Et da quieta tempora.

3. Orat pro naufragantibus
Vir Dei cum gemitibus,
Victus populi precibus
Subvenit pereuntibus,
Sacerdotis praeconia
Ostendunt tot prodigia.

V. Fac nunc, quod olim gesseras,
Pastor, gregem non deseras,
Subveni naufragantibus
Portum desiderantibus.

In Laudibus.

Antiphonae.

1. Signis in morte claruit,
Corpus inventum splenduit,
Ut balsamum redoluit,
Animae coelum patuit.

2. Post viri Dei transitum
Planctum magnum et gemitum
Ejus agunt discipuli
In sua morte quaeruli.

3. Ad tactum sui tumuli
Manus sanat discipuli,
Salutis beneficia
Sibi dat et auxilia.

4. Petrus febribus imperat
Et claudis gressum reparat
Et mutis dat fecundiam
Et surdis audientiam.

5. Caeci vident, muti fantur,
Oppressi doloribus
Et infirmi liberantur
Variis languoribus.

Ad Benedictus.
A. Benedictus,

qui fecit omnia,
Qui Petro dedit gratiam
Faciendi

tot mirabilia,
Quem transvexit ad patriam,
Et quos premit

omnis miseria,
Impetret nobis veniam,
Ut fruamur

aeterna gloria.

In 2. Vesperis.
Ad Magnificat.
A. Recordare

tuorum pauperum,
Pastor, gregem

refove tenerum,
Miserere

tuarum ovium ;
Pater, mentes

conforta tristium
Et corpora

sana languentium,
Roga regem

misericordiae
Pro delictis

hujus familiae.