76. De sancto Kentigerno.

In 1. Vesperis.

Antiphonae.

1. Laudent Deum parvuli,

puer quod conceptus

Kentigernus gratiam

summam est adeptus.

2. Omnes gentes, Dominum,

linguae, plebs, laudate,

Dum nutrit puerulum

Servanus beate.

3. Lauda, dulcis anima,

lauda, Kentigerne,

Deum, qui te patriae

praefecit aeternae.

4. Laus et decus Domino,

psalmus, vox sonora;

Kentigerne, petimus,

pro nobis exora

5. Urbs lauda Ierusalem

Deum, Sion, gaude,

Kentigernum exaltet

Christus summa laude.

R. O sacer antistes,

regis clarissima proles,

Per quem Laudonia

nitet et iam Cumbria tota,

V. Magnaque pars Scotiae

fidei convertitur almae.

Ad Magnificat.

A. O Kentigerne,

gemma nobilis,

Pastor praepollens,

praeco salutis,

O dispensator

Christi fidelis,

Tuis succurre,

quaeso, servulis,

Lumen ut tecum

cernant in superis.

Ad Matutinum.

Invitatorium.

Machina trina Deum

verum veneretur et unum,

Qui Kentigernum

sibi sumpsit ad aethera

sanctum.

In 1. Nocturno.

Antiphonae.

1. Felix vir, qui fidei

Factis gloriatur

Et in lege Domini

Crebro meditatur.

2. In timore didicit

Deo deservire

Et mandatis studuit

Eius oboedire.

3. Montem Dei caelitus

Scandit Kentigernus,

Ambit, ornat, suscipit

Coetus hunc supernus.

Responsoria.

1. Dat vitae volucrem,

gelidas conflavit in ignem

Frondes, quem comitum

exstinxerat ira nocentum,

V. Culros stirps regia

dedit haec primordia prima.

2. Suscitat inde coquum

puer almus morte sepultum,

Hinc fugit admonitus,

sequitur Servanus alumnum,

V. Sed pede quo iuvenis

ferit aequor, diffluit amnis.

3. Iussit arare lupum,

placuit cui iungere cervum,

Fert ager Cererem,

praesul cum spargit arenam,

V. Et dumus insolitas

brumae dat tempore bacas.

In 2. Nocturno.

Antiphonae.

1. Splendor vultus gloriae

Lumenque probatum

Est, praesul sanctissime,

Super te signatum.

2. Scuto fortitudinis

Christi stat protectus

Kentigernus humilis,

Pontifex electus.

3. O quam admirabile

Et quam gloriosum

Est in terris hodie

Nomen pretiosum.

Responsoria.

1. Dum negat annonam

populo trux regulus aptam,

Ad loca pontificis

subito ruit area messis,

V. Cluda fluctus Christum

novit non invidus ipsum.

2. Dum famulum Domini

pede percutit ira tyranni,

Membra rapit misera

dolor ingens, dira podagra,

V. Posteritas recolit,

quod adhuc pes improbus

egit,

3. Fit subito caecus

rex Melchon, vir trucu-

lentus,

Cui prece pontificis

reparantur et organa lucis,

V. Vallia quo viso

credit cum principe Christo.

In 3. Nocturno.

Antiphonae.

1. Nunc in tabernaculo

Christi requiescit

Pastor pius, providus,

maculam qui nescit.

2. Stat corona aurea

lapidis venusti

In signum victoriae

super caput iusti.

3. Paret terra Domino

cunctis imperanti,

Kentigerno cathedram

praebens praedicanti.

Responsoria.

1. Cum confessa suum

plangit regina reatum,

Pisciculum prendi

vult praesul, et annulus

auri

V. Redditur, obstupuit

rex, sic infamia fugit.

2. Dum veniunt una

Kentigernusque Columba,

Aurea lux capiti

visa est descendere sancti,

V. Angelus huic rutilam

defert cum luce coronam.

3. Cum octogenos

centum quoque quinque vir

annos

Compleret sanctus,

est Glasgu funere functus,

V. Nunc super astra satus

residet regnaque beatus.

In Laudibus.

Antiphonae.

1. Visitat alma pii

vice septena loca Petri

Praesul, campana

cui servit in aethere sacra.

2. Pallia pontificis

numquam nivibus rigat aut

nix,

Nec vis ulla viro

tempestatis nocet almo.

3. Sponte ferae celeres

variaeque caeli volucres,

Kentigerne, tuum

se subdunt praesul in usum.

4. Res miranda, gregem

vervex comitatur ovantem,

Truncato capite

latet hic sub imagine petrae.

5. Excidium--------

sacrae iubet esse capellae,

Sed prohibet mutus

divinitus ore locutas,

Nunc tibi laus potior

manet et reverentia maior.

Ad Benedictus.

A. Felix confessor,

flos tui germinis,

Lampas Laudoniae,

lucerna luminis,

Almifice

pollens prodigiis,

Sis gratus subditis

et pius miseris,

Kentigerne,

doctor mirabilis.

In 2. Vesperis.

R. Vertitur in lapides

compressi copia lactis,

Forma dum prisca

[Lactis] manet atque figura,

V. Fons tenet aeternum

liquidus per saecula nomen.

Ad Magnificat

A. Iubar caeleste,

lux clari sideris,

Gaudet, en, Glasgu

per te, dux humilis,

Bonis immensis,

o rosa celebris,

Nobis fer opem

trusis in tenebris

Assisteque servis.