Quinquagena II.

51. Ave, radix gratiae,

Ave radix viva,
Qua misericordiae

Nascitur oliva,
Adveni clementiae

Mater tempestiva,
Hostilis versutiae

Pellens turbativa.

52. Ave, mater gratiae,

Mater verbi Dei,
Mater indulgentiae,

Mater sanctae spei,
Aufer ignorantiae

Ac segnitiei
Causas et superbiae

A fundo cordis mei.

53. Ave, caeli gloria

Iustorumque rectrix,
Pugnantum constantia,

Pauperum susceptrix,
Protegat me gratia

Tua, mi dilectrix,
Ne concupiscentia

Fallat me deceptrix.

54. Ave, virgo, puteus

Consolationis,
Quo fluit nectareus

Potus plenus bonis,
Mihi, precor, clipeus

Sis. absconsionis,
Ne me premat puteus

Intentionis.

55. Ave, quae virtutibus

Cunctis insignita
Nunc es in caelestibus

Iuxta natum sita,
Seda tuis precibus

Bella tripartita,
Quae mea frequentius

Mens fert imperita.
56. Ave, mater gratiae

Materque divina,
Quae misericordiae

Diceris regina,
Precibus ecclesiae

Auditum inclina,
Praesentis tristitiae

Salvans a ruina.
57. Ave, fons, quo profluunt

Pietatis rivi,
Quibus frui cupiunt

Mortui et vivi,
Te laudare gestiunt

Corde amativi,
Quam infirmi fugiunt

Serpentes nocivi.
58. Ave, venerabilis

Mater ac sincera,
Semper tuis famulis

Laudanda revera,
Serva me ab aemulis,

Rogo mente mera,
A peccati vinculis

Et a Stygis fera.

59. Ave, virgo pallium

Splendens iacintinum,
Involvens candelabrum

Nutum per divinum,
Allevet auxilium

Tuum me supinum,
Deiectum per hostium

Impetum caninum.

60. Ave, invincibilis

Gratiae turella,
Ignorans terribilis

Inimici bella,
Praesta, venerabilis

Dulcisque puella,
Uti stem immobilis

In mundi procella.

61. Ave, mater gratiae,

Mater pietatis,
Tu mater iustitiae,

Mater veritatis,
Donum indulgentiae

Impetra peccatis
Culpa fraudulentiae

Per me perpetratis.

62. Ave, fons clementiae,

De quo mens pusilla
Sumit potum gratiae,

Unica vel stilla
Meae conscientiae

Sitim refocilla,
Donum ut laetitiae

Semper sit in illa.

63. Ave, ferens gladium

Christi passionis
Iuxta vaticinium

Iusti Simeonis,
Da mihi praesidium

Consolationis
Timenti obsidium

Pessimi praedonis.

64. Ave, caeli domina,
Summa prole feta,
Per quam cuncta crimina
Mundi sunt deleta,

Virtute per carmina
Haec me locupleta,

Hostis ut molimina
Mente vincam laeta.

65. Ave, luna indicans

Nobis caeli festa,
Ubi laus est iubilans

Cunctaque modesta,
Per id carmen elegans,

Mente rogo maesta,
Aufer scelus irrogans

Omnia molesta.

66. Ave, mundi domina

Et illuminatrix,
Per quam deflet crimina

Anima peccatrix,
Me per ista carmina

Tua, mi amatrix,
Ducat ad intermina

Trinitas creatrix.

67. Ave, quae es caelitus

Mira prole feta,
Quam et post hominibus

Genuisti laeta,
Nobis decertantibus

Sis agonitheta
Superis agminibus

Angelorum freta.

68. Ave, quae dulcedinis

Mater exstitisti,
Cum virtute flaminis

Christum concepisti,
Sed amaritudinis

Plena tunc fuisti,
Rivos sacri sanguinis

Quando conspexisti.

69. Ave, cunctis firmior

In adversitate
Caeloque stabilior

Mentis firmitate,
Ecce, nimis anxior

Mea pravitate,
Subveni, te deprecor,

Cum celeritate.

70. Ave, quam nativitas

Decorat regalis,
Nec non morum probitas

Vitae virginalis,
Thesauri potentias

Intra divinalis,
Affectus dans gratias

Mihi maternalis.

71. Ave, o fons imbrium,

Gratiarum stilla,
Corda innocentium

Faciens tranquilla,
Fluat stillicidium

Tua de mamilla,
Quod vim pellat hostium

Stygis cum anguilla.

72. Ave, quam per sedulum

Cultum veneramur,
Cum per mentis iubilum

In te iucundamur,
Satanam in nihilum

Redige, precamur,
Ne post istud saeculum

Per hunc confundamur.

73. Ave, contus conterens

Caput Sataninum,
Ut fert auctor proferens

Praeceptum divinum,
Impetum sis auferens

A nobis caninum,
Blandimentum conferens

Pium ac agninum.

74. Ave, refertissima

Navis institoris,
Dona ferens optima

De caelorum foris,
Aufer ab ecclesia

Calicem maeroris,
Patitur quae plurima

Intus atque foris.

75. Ave, suavissimum
Nomen o Maria,
Quod devotum animum
Reficit in via,

Per hoc hostem pessimum

Abige, maestia
Qui me vexat plurimum,

Turpi phantasia.

76. Ave, de qua meditor

Hac in hymnodia,
Quae mihi suavior

Est omni melodia,
Miserere, deprecor,

Mei, virgo pia,
Omnibus miserior

Miseris sum quia.

77. Ave, arbor caelicae

Benedictionis,
Quae ecclesiasticae

Congregationis
Populum magnifice

Cibas tuis donis,
Gratia me refice

Absolutionis.

78. Ave, quam nobilitas

Commendat regalis,
Prophetalis dignitas

Et sacerdotalis,
Sublevet hos pietas

Tua liberalis,
Deprimit quos gravitas

Culpae criminalis.

71). Ave, stella radians,

Stella luminosa,
Virtute illuminans

Corda tenebrosa,
Esto reaedificans

Mea criminosa,
Quae ferus exterminans

Fecit vitiosa.

80. Ave, mater caelici

Horreum frumenti,
Quo vivunt catholici

In vita praesenti,
Tuae des hymnidici

Consol amen menti,
Ictum diabolici

Impetum timenti.

81. Ave, virgo, medium

Hominis et Dei,
Unde patrocinium

Tuum quaerunt rei,
Meae adiutorium

Des progeniei,
Grratiae praesidium

Largiendo ei.

82. Ave, luna clarius

Lucens cunctis stellis,
A devotis mentibus

Tenebras quae pellis,
Modo crebrescentibus

Finem pone bellis,
Ne suis credentibus

Noceant procellis.

83. Ave, mons o frugifer,

Mons securitatis,
Quem ignorat pestifer

Auctor pravitatis,
Meis, sancta mulier,

Impetra cognatis
Vivere perenniter

Cum praedestinatis.

84. Ave, quae laetitiam

Angelis fecisti,
Mundi priscam gratiam

Cum reinvenisti,
Mihique des veniam

Peccatori tristi,
Olim plurifariam

Cui benedixisti.

85. Ave, quae feliciter

Christum genuisti,
Tamen mirabiliter

Virgo permansisti,
Per viam hilariter

Duc me, quam transisti,
Quando laudabiliter

In mundo vixisti.

86. Ave, Dei filii

Civitas munita,
Caelestis praesidii
Manu custodita,

Dono me consilii

Praemioque dita
Sempiterni gaudii

In futura vita.

87. Ave, mater, hydria

Caelicae farinae,
Praestantis praesidia

Plebi peregrinae,
Sacra eucharistia

Ciba me in fine,
Cum cessabunt varia

Artis medicinae.

88. Ave, fons laetitiae

Fonsque pietatis,
Fons misericordiae

Ac benignitatis,
Rigorem iustitiae

Sanctae trinitatis
Placa, mater gratiae,

Finem dans peccatis.

89. Ave, stirps, divinitus

Pulchrum gignens florem,
Qui devotis mentibus

Mirum dat odorem,
Sed tibi prae omnibus

Largiter decorem
Et nunc in caelestibus

Laudem et honorem.

90. Ave, virgo, tristium

Clemens consolatrix
Ac tuos laedentium

Dira comminatrix,
Esto te colentium

Pia reparatrix,
Multum quos per vitium

Laesit Stygis natrix.

91. Ave, mater generans

Nobis redemptorem,
Qui scelus exterminans

Aufert et auctorem,
Nobis reconcilians

Esto creatorem,
Mentes nostrans reparans

Eius per amorem.

92. Ave, privilegiis

Matris decorata,
Ideo collegiis

Sanctorum praelata,
Mea mens a vitiis

Multum deturpata
Te petit pro gratiis,

O mater beata.

93. Ave, o navicula,

In qua transfretavit
Christus, cum pericula

Mundi degustavit,
Corpore et anima

Te laetificavit,
Cum te super agmina

Caeli exaltavit.

94. Ave o hausarium

Aquae fontis vitae,
Per invitatorium

Clamitans: Venite,
Sitis adiutorium,

Gratiam haurite,
Gaudenter ad proprium

Locum sic redite.

95. Ave, nobilissimum

Decus puellare,
Quam istud per canticum

Conor exaltare,
Nam est suavissimum

Mihi te amare
Tuumque praeconium

Cunctis propalare.

96. Ave, quae virtutibus
Multis decorata
Nunc es in caelestibus
Multum exaltata,

Laus in his carminibus

Tibi decantata
A te venerantibus

Auferat peccata.

97. Ave, cui attentius

Caeli hierarchiae
Tubis in ductilibus

Psallant omni die,
Te laudantes plausibus

Huius melodiae
Visita frequentius,

O mater Messiae.

98. Ave, o sacrarium

Dei virginale,
Cuius quoque solium

Es imperiale,
Meum aufer varium

Pondus criminale,
Post ne me incendium

Urat gehennale.

99. Ave, porta clavibus

Nullis reserata,
Virtutum divinitus

Gemmis decorata,
Meis genitoribus

Subveni beata,
Quos forte in ignibus

Detinent peccata.
100. Ave, caeli lilium,

Cuius odoramen
Saepe mulcet filium,

Patrem atque flamen,
Cum erit iudicium,

Mihi da solamen,
Ne feram excidium

Cum damnatis. Amen.