81. De sancto Privato.

In 1. Vesperis.

Super Psalmos.

A. Praesens hortatur gaudium

Oris solvi silentium,

Privati cum solemnia

Anni reduxit orbita.

Ad Magnificat.

A. Aeterno regi pariter

Agamus omnes gratias,

Privati sancti martyris

Adest praesens solemnitas)

In festo hujus militis

Laudetur rex altissimus,

De regis quoque laudibus

Miles exsultet extremus.

Ad Matutinum.

Invitatorium.

Regi regum altissimo

Laudes canamus Domino,

Qui Privatum antistitem

Coeli fecit participem.

In 1. Nocturno.

Antiphonae.

1. Antiquo quodam tempore

Rei praeerant publicae

Valerianus impius

Et Gallienus socius.

2. Amborum sub imperio

Exorta est seditio,

Ipsorumque nequitia

Confusa est ecclesia.

3. Cultores Dei capiunt,

Captos poenis afficiunt,

Afflicti per supplicia

Coeli migrant ad atria.

Responsoria.

1. Solemnitatem martyris,

Sancti Privati praesulis,

Psallamus cordis vocibus,

Dignis agamus laudibus,

Qui carnis per martyria

Poli regnat in gloria ;

V. Pavorem vitans populi

Ante conspectum Domini

Studebat preces fundere

Pro subditorum requie.

2. Montis manens tugurio

Orabat jugi studio,

Corpus domans jejuniis

Praecedebat solemniis,

Docere prolem subditam,

Rectam tenere semitam.

V. Quam alloquens sermonibus

Post peracta colloquia

Grata petit latibula,

Vita fovet et moribus.

3. Biennium transierat,

Quo plebs obsessa fuerat,

Cum fama prodens detulit,

Quod barbaros non latuit,

Pontificem sanctissimum

Non esse inter populum ;

V. Ad exquirendum igitur

Coetus malignus mittitur,

Privatum ut exhibeat

Suisque captum proferat.

In 2. Nocturno.

Antiphonae.

1. Cornelius quidem Romae,

Cyprianus Carthagine

Tunc laureati martyres

Effecti vitis palmites.

2. Alamanorum populus,

Sub Croco rege positus,

Plures vastans provincias

Urbes subintrat Gallicas.

3. Barbarus hostis saeviens,

Gabalitanum irruens

Parabat omnes perdere

Deos nolentes colere.

Responsoria.

1. Privatus orans saxea

Inventus est in cavea.

Ducitur in monticulum

Mimati vico proximum,

Hortatur per interpretem

Ad plebis interniciem;

V. Minis monent et precibus,

Ut fiat hostis civibus,

Quos Deus liberaverat,

Subjectas eis proferat.

2. Sanctus praesul intrepidus

Sic respondit gentilibus:

Miror vestram prudentiam

Tantam fari stultitiam,

Ut me dicatis perdere,

Quos debeo eruere ;

V. Non est dignum vel competens,

Ut liber fiat serviens,

Et quae mihi consulitis,

Haec non sunt mei ordinis.

3. Fustibus ergo caeditur,

Dehinc ad vicum ducitur,

Gentiles aras instruunt,

Quae sceleratis congruunt,

Ut thura det daemonibus,

Monetur vir egregius.

V. Componunt sacrificia

Legi nostrae contraria,

Ad exsecrandam rabiem,

Invitant Christi praesulem.

In 3. Nocturno.

Antiphonae.

1. Christianorum populi,

Colentes nomen Domini,

Gredonem montem possident,

Quos Alamanni obsident.

2. Quem occidebat carnifex,

Erat populi pontifex,

Privatus tunc sanctissimus,

Vir moribus eximius.

3. Hic sedem, quam habuerat,

Mimati jam reliquerat,

Rupem cavatam habitans,

Terrenis nullis inhians.

Responsoria.

1. Divina fretus gratia

Privatus inquit talia:

Quae semel dixi, credite,

Aut quidquid vultis facite.

Insurgunt hostes acrius,

Plagis, flammis ardentibus,

V. Novo poenarum genere

In patris fremunt funere ;

Constantia pontificis

Fit fortior suppliciis.

2, Lictores lassi denique,

Cum nil possint proficere,

Sanctum Privatum martyrem

Relinquunt jam exanimem ;

Pace facta cum civibus

Hostilis cedit cuneus.

V. Egressi cives protinus

Patris volvuntur genibus,

Inflicta lambunt vulnera,

Oscula dant innumera.

3. Miles Christi laudabilis,

Privatus, martyr nobilis,

Inter fletus plangentium

Coelo reddidit spiritum,

Quem digne sub terrenea

Plebs sepelivit fovea ;

V. Carnis solutus vinculis

Intercedat pro famulis,

Ut per ipsius merita

Regnemus super sidera.

In Laudibus.

Antiphonae.

1. Festum diem recolimus,

Quo martyr Dei inclitus

Post cruciatus corporis

Conjunctus est coelicolis.

2. Qui dum viveret saeculo

Deo gratus et populo,

Florebat ejus sanctitas,

Carnis et mentis castitatis.

3. Gratia morum praeditus

Arverno fuit editus,

Privatus dictus nomine,

Privatus exstans opere.

4. Sermone quidem rutilans,

Voce vita non discrepans,

Caute regebat subditos

Actus frenans illicitos.

5. Sancte Private domine,

Defende nos a crimine,

Ut per tua suffragia

Vehamur ad coelestia.

Ad Benedictus.

A. In laudem tanti martyris

Tellus exsultet et gaudiis,

De cujus transitu sacro

Coeli laetatur concu;

Privatus enim hodie

Exuto carnis onere

Supernum intrat atrium,

Magno ditatus munere

Excipitur ab angelis,

Stola vestitus gloriae,

Corona fulget aurea,

Quae est signum victoriae.

In 2. Vesperis.

Ad Magnificat.

A. O venerande pontifex,

Private, pater clebris,

Famulos tuos erue

A mundi hujus tenebris

Nostrorum enim premimur

Peccaminum gravamine,

Unde tuo deposcimus

Suffragrari munimine,

Ut cum agnorum fuerit

Ab hoedis separatio,

Nos adunari facias

Beatorum collegio.