Unde dicit: " Dedi coram te ostium apertum, " id est, memetipsum, scilicet, ut introeas in ipsum: " quod nemo potest claudere, " scilicet ex quo tibi apertum fuit. Hoc verum fuit in Apostolis quod Judaei nullatenus claudere potuerunt, sicut petit Esther, Esther, xiii, 17 : Ne claudas ora canentium te, Domine.

" Quia modicam habes virtutem, "

Scilicet, humilitatem : et ideo merito eius aperui tibi ostium Scripturae ad intelligendum. Psal. cxviii, 130 : Intellectum dat parvulis, id est, humilibus. Vel sic: " Quia modicam habes virtutem, " id est, tua virtus sola non sufficit, sed ego solus aperio corda et Scripturas.

" Et servasti verbum meum, " id est, constans fuisti in tribulatione. Vel, " Servasti verbum meum, " id est, fidem in corde tuo per meditationem, et in manu tua per operationem.

" Et non negasti nomen meum, " tu positus in tribulatione.

Vel sic : " Et servasti verbum meum, " id est, in corde per fidem, in ore per confessionem, in manu per operationem. Vel sic : " Et servasti verbum meum, " id est, mandata in corde, " et non negasti nomen meum, " scilicet Jesum, scilicet Christianum ore: et ideo non negabo te coram Patre meo. Matth.X, 32 : Qui confitebitur me coram hominibus, confitebor et ego eum coram Patre meo qui in caelis est. Et quia talis es,

" Ecce dabo tibi de synagoga Satanae, "

Id est, aliquos de illis qui tibi adversantur, convertam ad (idem per praedicationem tuam.

" Qui dicunt se Judaeos esse, " scilicet credentes Deum esse et confitentes, " et non sunt ,Sed mentiuntur, " quia Christum blasphemant in suis synagogis. Vel sic : " Qui dicunt se Judaeos esse : " verum dicunt genere: " et non sunt " fide, " sed mentiuntur, " quia dicunt se habere fidem Abrahae, et legem Moysi tenere.

Secundum Glossam, cum dicit: Ecce dabo de synagoga Satanae, " loquitur de novissima persecutione, quae fiet tempore Antichristi, quando aliqui de Judaeis deceptis, monitione Eliae convertentur ad fidem. Vel specialiter loquitur de quibusdam Judaeis, qui in Ecclesia istius monebant legalia servari cum Evangelio, quos promittit Dominus convertendos ad fidem praedicatione ejus.

Et dicit : " Dabo, " quia conversio ad fidem donum Dei est. Unde Augustinus : " Posse habere fidem, est omnium : credere autem, gratia fidelium. " Vel, fuit hic prophetia de futura subjectione Judaeorum Ecclesiis et principibus Catholicis : sicut est modo, et fuit a tempore Titi et Vespasiani, imperatorum.

Moraliter : " Synagoga Satanae, " sunt principes mali qui adversantur Ecclesiae, ejus bona dissipando. item, haeretici qui adversantur ei, fidem destruendo. item, fratres falsi, bonos mores per malum exemplum corrumpendo. item, mali advocati, pacem Ecclesiae auferendo, falsas causas defendendo. Et isti sunt ranae quae usque ad mensam Pharaonis, id est, regum et praelatorum ascendunt. Sed de istis ranis dicitur, Exod. VIII, 14, quod collectae sunt in immensos aggeres, et computruit terra. Sic isti colligentur in judicio, vel de mundo : et computrescent in inferno.

" Ecce faciam illos ut veniant, et adorent ante pedes tuos : et scient quia ego dilexi te.

Quoniam servasti verbum patientiae meae, et ego servabo te ab hora tentationis, quae ventura est in orbem universum tentare habitantes in terra. "

Hic notatur modus conversionis. Et primo tangitur collatio gratiae ex parte Dei. Secundo, effectus gratiae in ipsis : qui est duplex, et quantum ad actum interiorem, et quantum ad actum exteriorem.