82. De sancto Raphaele.

In 1. Vesperis.

Ad Magnificat.

A. O Raphael archangele,

Nostrae salutis medice,

Vota tuorum suscipe,

Deum pro his precare assidue,

Quod peccatis possint carere

Et dono perfrui perpete.

Ad Matutinum.

Invitatorium.

Summi patris filium

Adoremus Dominum,

Qui mundo archangelum

Raphaelem dedit languido.

In 1. Nocturno.

Antiphonae.

1. En Raphael archangelus,

Salutis nostrae medicus,

Medelam aegrotantibus

Qui novit ferre coelitus.

2. Hic namque sordes hominum

Prece tergit peccaminum,

Ut athleta fortissimus

Depellit hostem longius.

3. Cujus caeci medicina

Illuminantur divina,

Cujus habentes solatio

Nempe laeti sunt jubilo.

Responsoria.

1. In hac aula Dei

Lumen vitae percipite, caeci

Et qui sine divino estis lumine,

Ad salutaris medicinam currite.

V. Ejus opem quaerite,

Ut sibi vivamus perpete.

2. Hic est Raphael archangelus,

Salutaris noster medicus,

Qui medicinam omnibus

Novit ferre coelitus,

V. Cujus protecti auxilio

Liberemur ab hoste maligno.

3. Nos, medicus orbis,

A nexu solve mortis

Et sis hic hospes

Terendo fortiter hostes,

V. Tuo freti munimine

Coelo possimus vivere.

In 2. Nocturno.

Antiphonae.

1. Nos, medice orbis,

A nexu solve mortis

Et sis hic hospes

Terendo fortiter hostes.

2. Salva, defende, protege,

Salutum nostrarum medice,

Quos, pie sator optime,

Tuo redime sanguine.

3. Esto nobis semper, archangele

Fidissime, sodalis unice,

Quo nos ad patris gratiam

Ovantes ducas inclitam.

Responsoria.

1. Hujus Tobis suffragio

Lumen sumpsit in Domino,

Quem ejus medicina

Sanavit virtus divina.

V. Esse videbatur, quod non erat,

Et non esse, quod erat.

2. Nos, Raphael archangele,

Tuo sacro defende munimine,

Ut Deo vivamus libere,

V. Ad coelos virtus divina

Tua ducat medicina.

3. Tuo freti munimine,

Nostrarum salutum medice,

Nos a mortis solve laqueo

Sacrae medicinae merito,

V. Alis tuis protege,

Quo signati simus in aethere.

In 3. Nocturno.

Antiphonae.

1. Nos, pervigil medice,

Custodi, Raphael, assidue,

Quo cum sanctis vivere

Possimus cuncti inclite.

2. Leviathan gurgitibus

Nos sacris trahe precibus

Atque supernis

Conjunge coetibus.

3. Tuo medicamine

Contritionem admone,

Ut angelico munimine

Convivamus in aethere.

Responsoria.

1. O vitae gemma inclita,

Virlute salva nos uranica,

Quatenus coelesti solio

Angelorum simus jubilo,

V. Cum ipsis cantantes gloriam

Deo patri hymnidicam.

2. Hic sordes hominum

Prece tergit precaminum

Et ut athleta fortissimus

Depellit hostem longius,

V. Leviathan gurgitibus

Tuos trahe precibus.

3. Te nunc precamur, archangele,

Vocibus nostris annue,

Precatus tui adjuvent,

Ne nos reatus maculent,

V. Acceptis votis supplicum

Pectus medere languidum.

In Laudibus.

Antiphonae.

1. Missus est angelus Raphael,

Nostrae salutis medicus,

Ad Tobiam, Dei famulum,

Sacris actibus assiduum.

2. Quam virtus divina

Ejus sanavit medicina,

Nam ejus medicamine

Est luci datus libere.

3. Hujus Tobias suffragio

Uxorem duxit tripudio,

Munimine angelico,

Legum juris titulo.

4. Hic hominis effigie

Videbatur omnino

Sodali adminiculo

Famulantis obsequio.

5. Laudent cuncti Dominum,

Qui nobis salutis medicum

Raphaelem dedit archangelum.

Ad Benedictus.

A. Humanae salutis medice,

Sancte Raphael archangele,

Languores nostros amove,

Ut tecum omnes vivere

Possimus semper aethere.