83. De sanctis Reliquiis.

In 1. Vesperis.
Antiphonae.
1. Vexilla regis gloriae
Militantis ecclesiae

Laudibus attollantur,
Per quae de mortis nexibus
Mortis confractis viribus
Fideles liberantur.

2. Carnis indutus trabea
Corona Christus spinea

Pro nobis coronatur,
Haec est praeclara galea,
Quam hostis horret framea

Et cadens hebetatur.
3. Cruci, coronae spineae
Sacraeque ferro lanceae

Honorem impendamus,
Haec sunt vexilla regia,
Per quae coronae gaudia

Perpetuae speramus.
4. Vitalem Christi sanguinem,
Catenam et arundinem

Devote veneremur,
Sacram colentes spongiam
Ab ipso nobis gratiam

Collatam meditemur.

5. Lac gloriosae virginis,
Lac immensae dulcedinis,

Lac sanctum honoretur
Nec non et pepli portio,
Ut sic matri cum filio

Lux praesens dedicetur.

R. Te, Christe, laudent supera,
Terra, pontus et aethera,
Quaecunque condidisti,
Patris sedens in dextera
Qui nobis salutifera
Vexilla tribuisti,
V. Nobis remitte scelera,
Patrique nos confoedera,
Pro quibus haec tulisti.

Ad Magnificat.

A. O Christo plebs dedita,
Tot Christi donis praedita
Jucunderis hodie,
Tota sis devota,
Erumpens in jubilum
Depone mentis nubilum,
Tempus est laetitiae
Cura sit remota.

Ecce crux et lancea,
Clavus, corona spinea,
Arma regis gloriae
Tibi commendantur,
Omnes terrae populi,
Laudent auctorem saeculi,
Per quem tantis gratiae
Signis gloriantur.

Ad Matutinum.
Invitatorium.

Regi, qui regit omnia,
Christo confiteamur,

Sacra cujus insignia
Redempti veneramur.

In 1. Nocturno.

Antiphonae.

1. Reges ut vasa figuli
In fine confringentur,
Qui summi regis aemuli
Crucem non reverentur.

2. Adversus Dei filium
Multi insurrexerunt,
Et nocentes innoxium
Cruorem effuderunt.
3. Beati, quorum oculi

Praesentes contemplantur,
Quae tot terrarum populi
Absentes venerantur.

Responsoria.

1. Lux, ecce, fulget hodie
Magnae solemnitatis,
Laudum Utentur hostiae

In ara puritatis,
Ne tantae dona gratiae
Auferantur ingratis ;
V. Laete psallant ecclesiae
Laudantes regem gloriae
Pro donis sibi datis.

2. In Phase quod praecipitur
Moyses immolare,
Sub agni typo creditur
Lex Christum designare,

Cujus sanguis effunditur

In Phase salutare.

V. Hoc aspersus non laeditur,

Nam ad eum non sinitur
Percussor penetrare.

3. Christus in patris vinea
Pro nobis vapulavit,
Dum fructum gens erronea

Petitum denegavit,
Insontis latus lancea
Crudelis perforavit.
V. Felix est cuspis ferrea,
Qua confossus a framea
Fideles liberavit.

In 2. Nocturno.
Antiphonae.

1. Catenae, qua gens impia
Ligavit salvatorem,
Devotum cum laetitia
Impendamus honorem.
2. In tua, Jesu, requie

Nos tecum gaudeamus,
Cujus pannos infantiae
In terris honoramus.
3. Ex Christi tacta facie
Tabella consecrata
Habetur reverentiae
Christicolis collata.

Responsoria.

1. Aeterni tabernaculi
Rex et redemptor saeculi

Vilescit insensatis,
Indutum forma servuli
Spinis coronant aemuli

Dominum majestatis,
V. Haerent in carne stimuli,
Spinarum sordes populi

Fert liber a peccatis.
2. Amici crucis, plaudite,
Qui crucem profitemini

Salutis instrumentum,
Trophea crucis pangite,
Per crucem datur homini

Victoriae crementum.

V. Adversae partes, fugite,
Sumant ministri Domini
Laetitiae concentum.
3. Crucis instet praeconiis

Clerus, quem Christus san-
guine
Effuso consecravit,
In cujus pendens brachiis
Pro mundi se peccamine
Piaculum donavit ;
V. Sic pius se pro impiis
Exponens sine crimine
Supplicium portavit.

In 3. Nocturno.
Antiphonae.

1. Nos tecum, judex saeculi,
Fac demum gloriari,
De parte tui tumuli
Quos modo das laetari.
2. Praeclaro Christus sanguine,
Servos suos ditavit,
Qui de ejus imagine
Percussa emanavit.
3. Digne chorus fidelium
Linteum veneratur,
Quo redemptorem omnium
Praecinctum attestatur.

Responsoria.

1. Dies festa

movet ad gaudium,
Christi colens

cruorem proprium,
Pannos, sceptrum,

coronam, pallium,
Partem tumbae,

crucem, sudarium.
V. Felix dies his ditata,

Quae tot habet Dei grata.
2. Dum leonis immanitas

Latet sub agni vellere,
In insontem atrocitas

Insanit prolis viperae,
Justi latus iniquitas

Letali fodit vulnere;

V. O mira ferri sanctitas

Quod vibratur hoc latere,
Quo vulnerata caritas
Satisfecit pro scelere.
3. Baptistae calvaria,
Simeonis, Blasii
Et Clementis capita

Signa sunt amoris ;
Adsunt et donaria
Pepli, lactis proprii,
Quae prasentat inclita
Mater salvatoris
V. Gaudeat ecclesia
Memor beneficii
Tantis donis praedita
Nostri redemptoris.

In Laudibus.
Antiphonae.

1. Donis praeclaris praediti
Thesauri nobis crediti

Teneremur auctorem,
Qui nobis arma contulit,
Quibus humani perculit

Generis opressorem,

2. Haec lux cum laetitia
Celebris agatur
Et in Christi gloria
Prorsus expendatur.

3. Jesu, redemptor saeculi,
In ejus semper seduli
Praeceptis vigilemus,
Ne segnes operarii
Frustremur spe denarii,
Cujus pignus tenemus.
4. Facta Dei dextera
Benedicant opera

Cuncta creatorem,
Qui dat nobis munera
Ad sananda vulnera
Crucem et cruorem.
5. Terrae reges et populi
Laudent omnes et singuli
Sedentem supera thronum,

Cujus immensa datio,
Ipse sit consummatio
Et laudis et sermonum.

Ad Benedictus.
A. Ortus ante saecula
Nos in servi formula

Christus visitavit,
Nobis dans signacula,
Quibus dirae vincula
Mortis dissipavit.

In 2. Vesperis.

Ad Magnificat.

A. O Jesu, fidelium

Spes et gloriatio,

Per quem tot magnalium
Plebs tua deposito
Digne gloriatur,
Firma fidem mentium,
Crescat et dilectio,
Da speratum gaudium,
Quo pro vitae merito
Te dante fruatur.

Alia Antiphona.

O Jesu, rex omnium,
Finis et principium

Nostrae solemnitatis,
Post festa temporalia
Nos perducas ad gaudia

Tuae perennitatis.