IN CAPUT XV MARCI

ENARRATIO.

" Et confestim mane consilium facientes summi sacerdotes, cum senioribus et scribis,et universo concilio, vincientes Jesum, duxerunt et tradiderunt Pilato. "

Hic incipit agere Marcus de passione

Domini quae vere passio vocatur, quae consistit in vulneribus et doloribus mortis.

Dividitur autem in tres partes : in quarum prima ponuntur ea quae faciunt ad condemnationem ipsius : in secunda, describuntur ea quae circumstant crucifixionem, ibi, v. 20 : " Et postquam illuserunt ei, exuerunt eum purpura, etc. " In tertia autem, ponuntur ea quae circumstant officium sepulturae, ibi, v. 40 : " Erant autem mulieres de longe adspicientes, etc. "

In prima tria dicuntur : scilicet, Christi ad judicium Pilati a Judaeis praesen tatio : secundo, causae pro qua praesentabatur discussio, ibi, v. 2 : " Et interro-gavit eum Pilatus, etc. " Tertio, Domini ad crucifigendum condemnatio, ibi, f. 15 : " Pilatus autem volens satisfacere populo, etc. "

In primo horum quinque dicuntur : scilicet, Judaeorum ad crucifigendum Christum aviditas, concordantium in. condemnationem suam generalitas, crudelitatis eorum malignitas in modo contrahendi Christum, poenarum ipsius societas, et ad condemnandum eum a gentibus Judaeorum obstinata impietas.

Dicit ergo : " Et confestim. " Omnis enim mora prolixa eis videbatur. Proverb. I, 16 : Pedes illorum, hoc est, affectus, ad malum, currant: et festinant ut effundant sanguinem. Psal. xiii, 3 : Veloces pedes eorum ad effundendum sanguinem. Contritio et infelicitas in viis eorum, et viam pacis non cognoverunt : non est timor Dei ante oculos eorum.

" Mane facto. " Job, XXIV, 14 : Mane primo consurgit homicida, et interficit egenum et pauperem. Vide quam sunt solliciti in malo, tota nocte vigilaverant ut facerent homicidium.

" Consiliom facientes, "

Ut nullus a reatu sanguinis esset alienus. Genes. xlix, 5 et 6 : Vasa iniquitatis bellantia. In consilium eorum non veniat anima mea, et in caetu illorum non sit gloria mea. Isa. I, 13 : Iniqui sunt coetus vestri.

" Summi Sacerdotes, " tamquam illius mali auctores. Jerem. xxiii, 15 : A Prophetis Jerusalem egressa est pollutio super omnem terram.

" Cum senioribus, " aetate et malitia pariter provectis. Daniel. xiii, 5 : Egressa est iniquitas a senioribus judicibus, qui videbantur regere populum. Isa. lxv, 20 : Peccator centum annorum maledictus erit.

" Et Scribis, " ne litteratura tanto facinori deesse per consilium videretur.

Jerem, IV, 22 : Sapientes sunt ut faciant mala, bene autem facere nescierunt. Isa. v, 21 : Vae qui sapientes estis in oculis vestris, et coram, vobismeteipsis prudentes !

" Et universo concilio, " ut omnes involveretur. Jerem. xxiii, 10 : Factus est cursus eorum malus, et fortitudo eorum dissimilis.

" Vincientes Jesum. "

Ecce crudelitatis eorum malignitas. Vinciunt enim eum qui omnes a vinculis peccatorum absolvit. Psal. cxlv, 7 et seq : Dominus solvit compeditos : Dominus, etc. Psal. cxv, 16 et 17 : Dirupisti vincula mea, tibi sacrificabo hostiam laudis. Hunc crudeliter vinciunt, quia consuetudo eorum fuit nullum ad condemnandum praesentare potestati publicae, nisi vinctum. Eccli. VI, 30 et 31 : Erunt tibi compedes ejus in protectionem fortitudinis et bases virtutis, et torques illius in stolam gloriae : decor enim vitae est in illa, et vincula illius alligatura salutaris. Et ideo etiam vinciri voluit. Unde in Prosa dicitur : " Teque vinciri voluisti, et nos inferni mortis vinculis eripuisti. "

" Duxerunt, " hoc est, vinctum traxerunt : et in hoc tractu notatur qualiter poenis ejus sunt saturati. Job, XVI, 11 : Satiati sunt poenis meis. Thren. v, 5 : Cervicibus nostris minabamur, lassis non dabatur requies.

" Et tradiderunt Pilato, " in quo notatur obstinata Judaeorum impietas. Sapient. XII, 11 : Semen erat maledictum ab initio : Et, paulo supra, v. 10 : Nequam est natio eorum, et naturalis malitia ipsorum, et quoniam non poterat mutari cogitatio illorum in perpetuum.

" Et interrogavit eum Pilatus : Tu es rex Judaeorum? A,t ille respondens, ait illi : Tu, dicis.

Et accusabant cum summi saoerdotes in multis.

Pilatus autem rursum interrogavit eum, dicens : Non respondes quidquam ? vide in quantis te accusent.

Jesus autem amplius nihil respondit, ita ut miraretur Pilatus. "

Hic ponitur causae pro qua praesentabatur captivus Dominus discussio.

Dicuntur autem hic quatuor : in quorum primo accusationis quae principalior, inquisitio : in secundo, ad multitudinem frivolarum accusationum, Domini patiens et taciturna dissimulatio : in. tertio, a Pilato quaesita Domini liberatio : in quarto, innocentiae Domini ostensio.

Dicit igitur : " Et interrogavit eum Pilatus, " quia a Judaeis non probabatur. propter hoc a Domino quaerebatur : " Tu es, " hoc est, si tu es " Rex Judaeorum. " Accusaverunt enim Sacerdotes Jesum in tribus principaliter : scilicet, quod gentem subverteret, quod tributa dari prohiberet, et quod se regem faceret. Luc. xxiii, 2 : Hunc invenimus subvertentem gentem nostram, et prohibentem tributa dare Caesari, et dicentem se Christum regem esse. Sed de primo tamquam superstitioso Pilatus non curavit : de secundo, audiverat quod dixerat : Reddite quae sunt Caesaris Caesari . Et ideo quaerit de tertio, quia tunc non licuit alicui se regem facere nisi per Romanorum auctoritatem. Joan. XIX, 12 : Si hunc dimittis, non es amicus Caesaris. Omnis enim qui se regem facit, contradicit Caesari.

" At ille, "

Ut confessor veritatis, " ait illi, " Pilato: " Tu dicis, " supple, id quod sum. Tamen, sicut additur, Joan. xviii, 36 : Regnum meum non est de hocmundo : si ex hoc mundo esset regnum meum, ministri mei utique decertarent ut non traderer Judaeis, Et ideo etiam huic accusationi Pilatus non multum insistebat : quia nec exercitum videbat, nec pecunias, nec tumultum concitavit contra potestatem Romanorum. Et ideo cito destitit etiam ab hac accusatione, praecipue quia audierat id quod dicitur, Joan. VI, 15, quod cum cognovisset Jesus quia venturi essent ut raperent eum, ei facerent regem, fugit in montem ipse solus,

" Et accusabant eum summi sacerdotes, "

Qui prae caeteris instabant ad mortem ejus. Luc. xxiii, 10 : Stabant autem principes sacerdotum, ei Scribae, constanter accusantes eum,

" In multis : " quae tamen rationem non habebant, quia nulla fuerunt. Psal. cviii, 2 et 3 : Os peccatoris et dolosi super me apertum est. Locuti sunt adversum me lingua dolosa, et sermonibus odii circumdederunt me, et expugnaverunt me gratis.

" Pilatus autem, "

Volens investigare causam, " interrogavit eum, " Jesum, " dicens. " Job, XXIX, 16 : Causam quam nesciebam, diligentissime investigabam.

" Non respondes quidquam. " Ac si dicat : Respondendo te statim defenderes : quia licet multa sint, tamen frivola sunt quae tibi objiciuntur. Matth. xxvii, 62 : Nihil respondes ad ea quae isti adversum te testificantur ?