84. De sancto Leonhardo.

In 1. Vesperis.
Super Psalmos.

A. Beate confessor Christi,
Leonharde, ecce, nomen
Tuum fulget per saecula
Petimus ergo, ut tuis
Sacris precibus mereamur
Adiuvari a Domino.

R. Sanctus pater Leonhardus,
iesu Christi famulus,
Postquam fulsit in hac vita
signis et virtutibus,

Hodie in regno Dei
iunctus est caelestibus,
V. Placens Deo factus dilectus.

Ad Magnificat.
A. Inclita festa celebrantes
Beati Leonhardi,
Christum exoremus regem,
Ut conservet suum gregem.

Ad Matutinum.
Invitatorium.
Venite, laudemus regem
Christum, regum dominum,

Qui per sanctum Leonhardum
Vincla solvit hominum.

In 1. Nocturno.

Antiphonae.

1. Sanctus puer Leonhardus,

lux totius Galliae,

Ex [nobilium] praeclara

natus est progenie.

2. Baptizatus puer sanctus
beato Remigio,
Adhaerere contendebat
iugi ministerio.

3. Postquam factus adolescens
evasit infantiam,
Frequentare temporalem
noluit militiam.

Responsoria.

1. Beatus vir Leonhardus,
Clara stirpe generatus
A puerili aetate
Excrevit in sanctitate,
V. Susceptus de sacro fonte
A beato Remigio.

2. Videns sanctus Leonhardus
captivos in carcere,
Hos per regem Clodovaeum
non tardat eruere,
V. Intuens vinctos in urbe
pressos ferri pondere.

3. Infirmi percipientes

sancti viri sanctitatem,
Ad hunc multi confluebant
resumentes sanitatem,

V. In suis corporibus

habentes debilitatem.

In 2. Nocturno.

Antiphonae.
1. Ut crescebat in aetate,
sic in sapientia,
Quoniam spiritus sancti
plenus erat gratia.

2. Miseros a carcerali
liberat ergastulo,
Ad veniam flectens regem
potentem in saeculo.

3. Sanctitatis ejus fama
crescente in Gallia,
Multi ab illo sumebant
salutis remedia.

Responsoria.

1. Beatus Leonhardus relinquens
Promissa regis Francorum
Adcinxit ad militiam
Se regis angelorum,
V. Exsulans pro Domino
A vicinitate
Civium suorum.

2. Venerunt ad virum Dei
ipsius discipuli,
Quibus fontem dedit Christus
prece sui famuli,
V. ''Fluminis impetus laetificat
civitatem Dei.''

3. Liberati ex ergastulis
Per beatum Leonhardum
Multi de longinquis eum
Regionibus vincla ferentes
Requirebant locum
Et confluebant ad eum;

V. ''Gratias agentes Beo altissimo
magnificabant sanctum Leon-
hardum.''

In 3. Nocturno.

Antiphonae.

1. Advenit Aurelianum

verbum Dei praedicans,
Maximino servo Dei
se vir sanctus indicans.

2. Cum quo conversatus fuit
aliquanto tempore
Anhelans ad regnum vitae
sitibundo pectore.

3. Revelante sibi Deo
venit Aquitaniam,
Caecos, surdos, mutos, claudos
plures sanans per viam.

Responsoria.

1. Homo Dei a caelesti
transmissus oraculo
Salvavit reginam dire
mortis a periculo,

V. Quoniam Deus erat cum ipso.

2. Revertentem peregrinum

a sancti memoria
Homines malignae mentis

torquent in Alvernia,
Flagellatum carcerali

artantes custodia,
Quem eduxit vir beatus

in forti potentia.
V. ''O mira erga miserum eius
misericordiae viscera.''

3. O pater insignis,

rutilans per saecula signis,
Te, cui vota damus,

Leonharde beate, rogamus,
Aufer ab his poenas,

in carcere solve catenas;
V. Esto memor memorum,

nexus dissolve reorum,
Sintque triumphantes

natale tuum venerantes.

In Laudibus.
Antiphonae.

1. O sancti Leonhardi

Praedicandam clementiam,
Qui apud urbem Nanetem
Hominem ad se clamantem
Videntibus custodibus
Pie solvit a carcere.

2. O quanto tripudio

vir ille laudandus est,

Qui ad fidelem suum

cum luce intravit,
Arcam, in qua iacebat,

super custodes revolvit
Et quasi mortuos

in sepulcro reposuit,
Vinctum eduxit.

3. O virum mirabilem,
Cuius nutu peregrinus

absolvitur,
Castello corruente

scelesta plebs obruitur,
Tyrannus fractis

cruribus reservatur.

4. O virum per saecula
Gloriosum, qui et caeco
Pauperculae filio
Lumen reparavit
Et de corpore
Infelicis feminae
Septem daemonia
Effugavit.

5. O quam pius, quam benignus
Est beatus Leonhardus,
Qui et Rhodanum
Inundantem separavit
Et, ut siccis vestigiis
Per medium graderetur,
Suo fideli imperavit.

Ad Benedictus.

A. O virtutum Domine,

Per saecula benedicimus te,
Qui famulo tuo Leonhardo
Specialiter dedisti in carcere
Catenas confringere,
Sedentes in tenebris
Ad lumen educere,
Desolatos relevare,
Dignare
Plebem tuam
Ejus intercessione
In pace visitare.

In 2. Vesperis.

Ad Magnificat.

A. Ave, pater Deo digne,
Ave, dulcis et benigne,
Ave, hodie scandens polum,
Leonharde, vincens solum,

Qui solvis in carcere
Catenas captivorum,
Nostra fac quieta tempora
Ab incursionibus inimicorum,
Ut te in ore, te in corde
Semper habeamus
Et tecum ante thronum Dei
Sine fine gaudeamus.