Congregatio de Causis Sanctorum 1085

MUTINENSIS-NONANTULANA

Beatificationis et Canonizationis Servi Dei Huberti Mori Christifidelis Laici et

Patrisfamilias (1926-1989)

DECRETUM SUPER VIRTUTIBUS

« Bonum mihi lex oris tui super milia auri et argenti » ( Ps 118, 72).

Antiqui verba psalmistae Israelis propositum vitae Servi Dei Huberti

Mori summopere effingunt, christifidelis laici, mancipis prosperrimi, sponsi

et patrisfamilias eximii. Novorum enim praepollentiumque instrumentorum

ad industriam pertinentium sollers excogitator, cuivis humano commercio

legem divinam, necnon suipsius christianae vocationi fidelitatem et operum

caritatis usum semper anteposuit.

Servus Dei die 28 mensis Ianuarii anno 1926 Mutinae e coniugibus

Mario et Aedmea Scabazzi ortus est. Infantia eius continuis atque innume-

ris migrationibus signata est patris, qui e ductoribus erat ex artillariorum

exercitu et, anno 1940, secundo totius mundi bello grassante, militum prae-

fectus generalis nominatus est atque ad frontem belli missus. Anno 1943,

universa familia, quae tum Veronae commorabatur, ad vicum vulgo dictum

Monticello di Levizzano Rangone prope Mutinam demum rediit, ubi Servus

Dei studia classica in Lycaeo perrexit.

Mense Augusti eiusdem anni, pater, brevis ab officiis vacuitatis tempo-

re, apud Valetudinarium Castrense receptus est, ubi diagnosis ei dicta est

tumoris cuiusdam iam provecti, sed praefectura Reipublicae Socialis eum ni-

hilominus in servitium revocavit, quapropter Servus Dei, attenta gravissima

patris valetudine, pro eodem sese obtulit succedaneum, licet modo decem

et septem annos natus esset. Hac commutatione autem accepta, Hubertus

primum Nonantulam destinatus est, dein Papiam ad breve, at numquam

vero impetibus vel subitis interfuit belli, sed plurimum muneribus secretarii

ac telephonis addicti functus est. Paulo post indutias diei 8 mensis Sep-

tembris anno 1943, dum Nonantulae apud castra se habebat, colloquio per

telephonum habito fortuito audito, severo cum discrimine vitae providum

peremptoriumque suum per intercessum centum et septem puerorum vitas

servavit iudaeorum, qui e deportatione ac morte certa ita ante adventum

militum elabi valuerunt.