1086 Acta Apostolicae Sedis - Commentarium Officiale

Post obitum patris die 13 mensis Augusti anno 1944, Hubertus a quovis

pristino militari officio sese animadvertit solutum et domi substitit, cum

aetate ad evocationem adhuc egeret. Anno 1944, Facultati Ingeniariae Me-

chanicae in Universitate Studiorum Bononiensi se adscripsit et, ipso eodem

tempore, ceramicarum apud fabricam etiam exercuit laborem. Die 23 mensis

Iulii anno 1959, lauream in Ingeniaria Industriali summa cum laude adeptus

est ac postea apud cathedram Alchimiae et Technologiae Manufactorum

Ceramicorum in eadem Universitate Studiorum factus est magister.

Die 14 mensis Aprilis anno 1952, Mutinae Gildam Cavedoni duxit uxo-

rem. Primus filius, Marius, anno 1953 natus est, secunda, cui nomen Maria

Teresia, anno 1955; tertius, autem, quem coniuges anno 1958 cum gaudio

exspectabant, in lucem non est susceptus et, anno 1961, Maria Emmanuela

prodiit, quae autem gravi cordis deformatione correpta insequenti anno

mortua est. Familia vero semper praecipui loci potita est in corde Huberti,

qui iam inde ab anno 1953 sese atque propinquos Beatae Mariae Virgini

consecraverat. Sponsus enim fuit et pater pius, specimen institutoris, in le-

gem divinam assidue intentus. Anno 1960, Servus Dei opus suum susceptoris

instituta fabrica iniit, quae subsecutis incrementis eum magna illustravit

peritia quoad ceramicas procudendas. Anno 1971, fornacum etiam studuit

formam ad ceramicarum conflationem necnon earundem curare incepit exse-

cutionem, quae tantae huic industriae sive in Italia sive peregre non modo

renovationem, sed magnum etiam incrementum attulerunt.

Quae susceptoris fruges nihil supremum Servi Dei christianae perfectio-

nis praepedierunt certamen, sed iuge immo eiusdem fuerunt calcar. Anno

1958, exemplum sectans Sancti Pii de Pietrelcina, devotionem suam erga

Mariam Sanctissimam admodum corroboravit, quam adeo ipse publice pro-

fessus est, ut « Ingeniarius Mariae » vulgo cognominaretur, eumque duxit, ut

spiritualitatem Sancti Francisci Assisiensis, penitus intellegeret concurrente

muliere, quae virum suum omnibus in animi praelationibus assectata est.

Die 19 mensis Februarii anno 1967, Tertium Ordinem Sancti Francisci Mu-

tinae plane ingressus est et inde ab anno 1968 Servus Dei in tutela Patris

Raphaëlis de Mestraco, ex Ordine Fratrum Minorum Capuccinorum, mode-

ratoris spiritualis constitit atque exinde pro Sanctuarii Dominae Nostrae a

Salute in vico Puianello, prope Mutinam, renovatione summopere enisus est,

quod mox orationis spiritualitatisque multorumque caritatis et opitulationis

operum nava sedes factum est.