86. De sancto Leonhardo.

In 1. Vesperis.

Super Psalmos.

A. Miles Dei, leo fortis,

Nardus curans plagas mortis,

Afflictorum consolator,

Captivorum liberator,

Nos peccatis catenatos,

Cippo labis vinculatos

Nos absolvas et non tarde,

Precamur, sancte Leonharde.

Ad Magnificat.

A. Alleluia cantet gaudens

Gens fidelis christiana,

Alleluia psallat plaudens

Clerus melodia plana,

Alleluia promat toto

Monachorum concio,

Alleluia dulci voto

Iubilet Christo Deo,

Per quem redolens ut nardus

Fulget sanctus Leonhardus.

Ad Matutinum.

Invitatorium.

Iubilemus regi Deo,

Qui sancto suo Leonhardo

Post mundi certamina

Contulit caelestia.

In 1. Nocturno.

Antiphonae.

1. Leonhardum propheticis

Condecoremus canticis,

Qui tam fulsit prophetia,

Quam et doctrinae gratia.

2. Beatus vere sanctus iste

Pro te, pater Iesu Christe,

Mundi pompas abnegavit

Et os tuum praedicavit.

3. Tu es gloria mea, Christe,

Rogo te, ut omnis iste

Vitam perennem obtineat,

Qui nomen meum invocat.

Responsoria.

1. Florem mundi periturum

Despexit tamquam aridum,

Ut floreat in aeternum

Leonhardus ante Dominum,

V. Pennas sumens ut columbae

Recessit gaudens requie.

2. Alme pater, qui praescius

Tui sacri transitus,

Dum praenotasti fratribus,

Tuere nostros exitus;

V. Per te ducem clarissimum

Habemusque fortissimum,

Dum inde transeamus,

Te obnixe flagitamus.

3. Rex reginam dum lugeret,

Leonhardus et transiret,

Qui rogatus introivit

Et, quod rex ab eo petivit,

Postulavit caelitus;

V. Reginam defunctam suscitavit

Prolemque recuperavit

Dato bino gaudio.

In 2. Nocturno.

Antiphonae.

1. Invocantem exaudivit

In eo, quod concupivit

Christus sanctum Leonhardum,

Virum perfectissimum.

2. Verba mea, inquit, audi,

Pie Christe, et exaudi,

Regem hunc laetifica

Defunctamque resuscita.

3. Domine, quam admirabile

Nomen est amabile

Tuum et in saeculis,

Qui vitam reddis mortuis.

Responsoria.

1. Fugiens episcopatum

Vehemens Aurelianum

Liphardo cum suo fratre

Coepit Christum praedicare,

V. Ad Deum se convertebat

Et cor eius directum erat

Ad evangelizandum.

2. O mira bonitas Christi,

Quae virtutes tribuisti

Tantas tuo confessori,

Leonhardo, sancto patri,

Ut catenis vinculatos,

Subtus terram[que] ligatos

Religatos exportaret

Et ad sua reportaret;

V. Sicut amans cum amante

Hic cum illis ambulante

Loquens illos et reduxit

Ad sua loca et perduxit.

3. Gloria, Christe, tuo

tibi resonet in Leonhardo,

Quem facis tecum

sanctis regnantibus aequum,

Quos iam aequasti

gaudentibus et sociasti,

V. Virtutum floribus

floreat semper in caelestibus.

In 3. Nocturno.

Antiphonae.

1. Leonhardus habitavit

In deserto, quem amavit,

Corde quaerens impolluto,

Sub cuius triumphabat scuto.

2. Vitam petiit sempiternam,

Pro qua eremi hic cavernam

Subiit cum fratre Liphardo

Saecli spreto gaudio.

3. Hic accepit gratiam

A Domino sempiternam

Cum Christo regnans in gloria

Saeculorum saecula.

Responsoria.

1. Sancte pater Leonharde

Et confessor venerande,

Tu pro nobis intercede,

Ne damnemur, tua mercede,

Et ut nostra peccamina

Caelestis deleat medicina,

V. Qui pro nomine Iesu Christi

Desertum locum subiisti,

Tuo nobis precamine

Digneris nunc succurrere.

2. Leonhardus vas solidum.

Vas auro adornatum

Omni lapide pretioso,

Rivum vitae propinans populo,

Stola se cinxit gloriae

In virtutum perpetratione,

V. Ut effulgens

est effectus ignis

Et ut redolens

tus in aestatis tempore.

3. Sicut leo Leonhardus

Decoratus virtutibus,

Leo fortis est et prudens,

Clamans atque ignem timens,

Sic Leonhardus corde fortis,

Nulla timens mala mortis

Prudens Satanae vias clausit,

Per quas multos hic seducit,

Christum petens voce clamat

Et defunctis vitam donat;

V. Timens ignem cupiditatis,

Mundanae quoque vanitatis,

Artam viam concupivit,

Thesauros datos dum con-

tempsit.

In Laudibus.

Antiphonae.

1. Beatus vir Leonhardus

Triumphat laureatus,

Post palmam victoriae

Sinu receptus Abrahae.

2. Hic est sanctus Leonhardus,

Cuius vita sideribus

Clarior nobis nunc relucet,

Qui ad Christum nos conducet.

3. Christus ipsum decoravit,

Signis multis exornavit,

Catenatus religatur,

Et defunctus suscitatur.

4. Ad cuius tumulum currunt

Surdi, muti et recurrunt

Sani Christum collaudantes

Et hunc sanctum venerantes.

5. Pater bone, miserere,

Morbos nostros tu scis vere.

Supplicante tibi plebe

Corde toto in hae aede.

Ad Benedictos.

A. Benedictus es, Domine,

Qui Leonhardi animae

Dum et caeli confers gaudia,

Glorificas in terris sua membra,

Dum e specu, quo latuit,

Caelestis virtus emicuit.

In 2. Vesperis.

Ad Magnificat.

A. O caelestis norma vitae,

Doctor et dux Leonharde,

Qui cum Christo exsultas

Thronis in caelestibus,

Gregem, pastor alme, serva

Sanctaque prece corrobora,

Via caelos clarescente

Fac te duce penetrare,

Ut tnnc Christum speculare

Possimus feliciter.