Acta Apostolicae Sedis - Commentarium Officiale772

« caritas iustitiaque erga omnes, potissimum erga pauperes ».338 Numquam est

obliviscendum « amorem - caritatem - semper fore necessarium, in iustiore

quoque societate ... si quis de amore vult se subtrahere, prolabitur ad se ab

homine velut homine eximendum ».339 Cohortamur itaque omnes fideles ad

saepe meditandum caritatis hymnum, scriptum a Paulo Apostolo, qui et ad

se eius inspiratione imbuantur: « Caritas patiens est, benigna est caritas, non

aemulatur, non agit superbe, non inflatur, non est ambitiosa, non quaerit,

quae sua sunt, non irritatur, non cogitat malum, non gaudet super iniquita-

tem, congaudet autem veritati; omnia suffert, omnia credit, omnia sperat,

omnia sustinet. Caritas numquam excidit » (1 Cor 13, 4-8).

Proximi amor, in Dei amore fundatus, efficere debet ut continenter tum

ut singuli tum ut ecclesialis, localis et universalis communitas operemur.

Sanctus Augustinus asserit: « Haec summa est, ut intelligatur Legis et

omnium divinarum Scripturarum plenitudo et finis esse dilectio ... Quisque

igitur Scripturas divinas vel quamlibet earum partem intellexisse sibi

videtur, ita ut eo intellectu non aedificet istam geminam caritatem Dei et

proximi, nondum intellexit ».340

Dei Verbi nuntius et iuvenes

104. Synodus peculiarem in modum de divino Verbo novis generationi-

bus nuntiando cogitavit. Iuvenes iam nunc sunt activa Ecclesiae membra

cuiusque sunt futura aetas. Ii saepenumero ad Dei Verbum audiendum pro-

pendere reperiuntur atque sincerum desiderium Iesum cognoscendi habent.

Etenim iuventutis aetate vehementer ac sincere de propriae vitae sensu et

de propriae exsistentiae destinatione interrogationes emergunt. Interrogatio-

nibus his Deus tantum veram responsionem praebere valet. Haec cura, iuve-

nibus conversa, manifesti nuntii studium secum fert; iuvenes adiuvare debe-

mus ut fiduciam familiaritatemque erga sacram Scripturam adipiscantur,

quae veluti nautica pyxis sit, quaeque cursum persequendum demonstret.341

Idcirco testibus et magistris ii indigent, qui cum iis ambulent eosque dirigant

ad amandum et vicissim Evangelium maxime cum aequalibus communican-

dum, dum ipsi veri credibilesque fiunt praecones.342

338 Propositio 11. 339 Benedictus XVI, Litt. enc. Deus caritas est (25 Decembris 2005), 28: AAS 98 (2006), 240. 340 De doctrina christiana, I, 35, 39 - 36, 40: PL, 34, 34. 341 Cfr. Benedictus XVI, Nuntius occasione XXI Diei Internationalis Iuventuti dicati 2006 (22

Februarii 2006), AAS 98 (2006), 282-286. 342 Cfr. Propositio 34.