De Capitulo generali. Rubrica XI.

Cum Regula dicat, quod generale Capitulum fiat, ubicumque et quandocumque a Ministro generali fuerit ordinatum, statuimus de voluntate generalis Ministri, ne ultra tres annos generale Capitulum differatur , nisi generalis Minister cum generali Capitulo in proximo praecedenti Capitulo pro manifesta necessitate duxerit prolongandum. Item, propter labores Fratrum compatiendos ordinamus, quod generale Capitulum alternatim citra montes et ultra de cetero celebretur, in quacumque Provincia vel loco generalis Minister duxerit ordinandum.

Ad generale Capitulum conveniant Minister quilibet cum uno tantum honesto socio et Custos electus a Custodibus et unus Discretus a provinciali Capitulo electus. Et si alterum istorum mori vel ita infirmari, quod non possit venire, contigerit, alius Custos a Custodibus et alius Discretus a Custodibus et Discretis aliquibus a Ministro vocatis eligatur. Si tamen contingat, aliquem ex praedictis vel aliquos non convenire, nihil eorum quae per Capitulum expedienda sunt, propter hoc omittatur. Si aliquem de venientibus ad Capitulum generale contigerit manifeste impediri, ne veniat: teneantur Fratres reliquum associare de loco ad locum, donec societas occurrerit opportuna. Idem fiat de Fratribus euntibus pro confirmatione provincialis Ministri.

Minister autem provincialis, quando vadit ad Capitulum generale, (Vel alias extra suam Provinciam , vel si infirmatur, quod non possit provinciali Capitulo interesse, instituat Vicarium de consilio Discretorum. Vicarius vero sic institutus a Ministro, si Minister in generali Capitulo absolutus fuerit, vel ipsum interim mori contigerit, remaneat Vicarius auctoritate generalis Ministri, usquequo provinciale Capitulum congregetur. Custos similiter, cum ad generale vadit Capitulum, instituat Vicarium in Custodia de aliquorum suae Custodiae ] consilio Discretorum.

Si vero tempore instantis Capituli usque ad finem eiusdem aliqui alii ad locum Capituli venerint, eis habitus per Guardianum loci vel eius Vicarium auferatur, et a loco Capituli statim cum probationis caputio emittantur, quod debeant per octo dies portare. Quodsi Guardianus vel eius Vicarius talibus sic non fecerint, una die tantum in pane et aqua ieiunent. Idem autem fiat venientibus ad provinciale Capitulum non vocatis. Si qui vero terminum constitutum praevenerat, una die tantum in pane et aqua ieiunent, sedentes in terra coram Fratribus.

Ordinamus, quod generalis Capituli Ded nitores sint Ministri et unus subditus de qualibet Provincia in provinciali Capitulo ad hoc electus. Et dicimus hic subditos omnes sub Ministris provincialibus constitutos, salva tamen generalis Ministri correctione, absolutione, electione et confirmatione, quae secundum Regulam Ministris et Custodibus conceditur. In quo Capitulo Ministri semper per se, si praesentes fuerint, vel per litteras, si absentes, renuntiare teneantur. Quorum renuntiatio a Generali, vel ab eo qui tenet Capitulum loco eius, cum assensu Capituli, si videbitur, admittatur. In omnibus autem memorati Capituli definitionibus sententia plurium indistincte praevaleat et inviolabiliter observetur, excepto, quod in multiplicatione vel divisione Provinciarum sententia duarum partium habeatur: nec ab ea aliquis appellare praesumat.

Congregati igitur Ministri et dicti Custodes feria sexta proxima ante festum Pentecostes, et non prius, quiescant et deliberent usque mane diei sequentis: et tunc, audita Missa, ingressi Capitulum, cantent hymnum: Veni, Creator Spiritus etc., deinde versiculum: Emitte Spiritum tuum: Orationem: Deus, qui corda, usque per Christum Dominum nostrum. Respondetur Amen.

Postea tractent de statu et correctione generalis Ministri hoc modo. Minister generalis in primis coram omnibus se accuset: post haec egrediatur. Quo egresso, Guardianus loci, assumtis secum aliquot discretis Fratribus de conventu, dictos Ministros cum Custodibus in conclavi recludat, ita quod nullatenus exire valeant, nec ullo modo alimenta aliqua ministrentur, donec providerint, ut oportet, circa statum generalis Ministri. Et ad hoc tam includentes quam inclusi firmiter teneantur. Itaque si quis contra fecerit, excommunicatus sit ipso facto.

Processus inclusorum sit talis. Minister provincialis illius Provinciae, in qua Capitulum celebratur, vel si ipse defuerit, Custos eius requirat in publico a singulis per ordinem, si quid habent dicere de excessibus vel insufficientia generalis Ministri; qui etiam Minister, cum generalis Minister interesse nequiverit, Capitulum teneat loco eius, et singuli teneantur bona fide accusare ipsum, de quibus reputaverint incusandum. Quodsi aliquae accusationes notabiles proponantur, dictus provincialis Minister, vel Custos cum duobus Discretis, quos ex praesentibus sibi ad hoc assumet, diligenter conscribant. Quas postquam conscripserint et mox in medium recitaverint, eidem revocato audientia concedatur. Et eodem egresso, iterum super accusationibus et excusationibus communis collatio habeatur. Qua peracta, praedicti Disquisitores singulorum vota sicut in electione facienda publice perquirant, utrum eis appareat , dictum generalem Ministrum esse corrigendum tantum, vel etiam penitus amovendum. Quibus conscriptis et mox in medium recitatis, iuxta sententiam maioris partis medietate omnium ad correctionem eius vel amotionem procedatur hoc modo. Si tantum corrigendus fuerit, per Ministros et Custodes ibidem continuo corrigatur. Si vero penitus fuerit amovendus, praedicli tres Disquisitores eidem revocato seorsum et secreto prius suadeant voluntariam cessionem, et si incontinenti non cesserit, habeatur nihilominus pro amoto: ac statim, ipso foras egresso et ostio, ut prius, firmiter obserato, ad electionem alterius procedatur, ita ut in mane diei sequentis habeat Ordo alium generalem Ministrum praesentem, vel absentem.

Feria secunda post Pentecostes mane cantatur Missa de Spiritu sancto: qua cantata, intrent Fratres locum Capituli, et fiat sermo Fratribus in communi. Quo completo, recitetur numerus Fratrum defunctorum a tempore generalis Capituli proximo praeteriti, pro quibus dicatur Psalmus De profundis, in fine Requiem aeternam. Pater noster. Et ne nos. A porta inferi. Requiescant in pace. Domine exaudi. Dominus vobiscum. Oratio: Absolve.

Numerus autem Fratrum ibidem recitatus ad singulas Provincias deferatur, ut in singulis provincialibus Capitulis modo simili absolvantur. Post hoc litterae praesentandae praesententur, et recommendalitiae in fine Capituli legantur, et respondeatur de quibus fuerit respondendum. Hinc omnes, qui non debent interesse Capitulo, exeant.

Nullus Religiosus alterius Religionis vel professionis nullusque saecularis cuiuscumque ordinis, dignitatis vel vitae tractatibus Capituli admittatur.

Missi ad excusandum Fratres, qui non venerint, audiantur. Deinde fiat collatio super iis quae de Proyinciis ad Capitulum sunt transmissa, et provideatur per generalem Ministrum et Deflnitores de singulis, ut oportet, de correctione corrigendorum et ordinatione ordinandorum. Et quaeratur diligenter, qualiter Regula et statuta generalis Capituli in singulis Provinciis fuerint custodita. Provideatur etiam de lectoribus, praedicatoribus, de mittendis inter Saracenos et alios infideles, de mittendis de una Provincia in aliam ad manendum, de novis Provinciis capiendis et ministrationibus distinguendis et hujusmodi.

In fine assignetur locus, in quo sequens Capitulum celebretur. Et fiat communis confessio et absolutio, perseverantibus benedictio, apostatis anathematizatio. Postea cantetur: Te Deum laudamus, versiculus: Confirma hoc Deus, Oratio: Actiones nostras, in fine: per Christum. Similis solemnitas in fine provincialis Capituli observetur.