92 Acta Apostolicæ Sedis - Commentarium Officiale

ILLERDENSIS

Beatificationis seu Declarations Martyrii Servorum Dei Ioannis a Iesu et III So- ciorum Ordinis Carmelitarum Discalceatorum atque Pauli Segalá Solé Sacerdotis Dioecesani († 1936)

DECRETUM SUPER MARTYRIO

« Semper mortificationem Iesu in corpore circumferentes, ut et vita Iesu

in corpore nostro manifestetur. Semper enim nos, qui vivimus, in mortem

tradimur propter Iesum, ut et vita Iesu manifestetur in carne nostra mor-

tali » (2 Cor 4, 10-11).

Haec beati Pauli Apostoli verba altissimum christianorum martyrii mire

enarrant mysterium, quod novissime in Servorum Dei vita Patris Ioannis

a Iesu, fratris Bartholomaei a Passione, Patris Silverii a Sancto Aloysio

Gonzaga, Patris Francisci ab Assumptione et Reverendi Pauli Segalá Solé

consummatur, quorum passio in odium fidei passionis Christi est communi-

catio, qui vitam suam etiamnum in nos pandit et confessionem credentium

aetatibus praesertim magnae societatis eversionis profundique religionis

contemptus, sicut haec sunt quae vivimus tempora, fovet. Qui, enim, pul-

chrum fidei Christo suum praestiterunt testimonium dirae persecutionis

contra religionem catholicam tempore illius, quae dimidia fere quarta vicesi-

mi saeculi decade Hispaniam acriter vastavit, et pro amore eius discrimina

iniuriasque et innocentes poenam usque ad sanguinis effusionem passi sunt.

Huius martyrum catervae caput Pater Ioannes a Iesu est, presbyter

ex Ordine Carmelitarum Discalceatorum, qui in civitate Ausa intra fines

provinciae Barcinonensis die 19 mensis Augusti anno 1917 natus est et

insequenti die ad regenerationis fontem ductus Ioannis Iosephi Thomae

sumpsit nomina. Vota religiosa perpetua apud Ordinem Fratrum Carmelita-

rum Discalceatorum Beatae Mariae Virginis a Monte Carmelo emisit ac die

14 mensis Iunii anno 1930 presbyteratu auctus est. Pro Christi et Ecclesiae

amore una cum socio fratre Bartholomaeo a Passione martyrium passus est.

Hic vero die 4 mensis Septembris anno 1894 in vico Caprilia intra fines pro-

vinciae Tarraconensis ortus est et in ecclesia paroeciali paucis post diebus,

Iosephi imposito nomine, ad baptismalem fontem regeneratus. Anno 1920

Novitiatum Patrum Carmelitarum Theresianorum ingressus est, apud quos

nomen Bartholomaei ei impositum est et die 21 mensis Septembris anno