812 Acta Apostolicae Sedis - Commentarium Officiale

ACTA CONGREGATIONUM

CONGREGATIO DE CAUSIS SANCTORUM

GAUDISIENSIS

Beatificationis et Canonizationis Servae Dei Margaritae a Sacro Corde Iesu (in

saeculo: Virginiae de Brincat) Fundatricis Congregationis Sororum Franciscalium

a Corde Iesu (1862-1952)

DECRETUM SUPER VIRTUTIBUS

« Amorem amemus! qui non amatur latens, amemus amorem! Quem et

amantes, ut a quovis ametur patens ubicumque, curemus amorem ».

Cuius filia fuit devota fidelisque assecla, qui ardorem caritatis cumulavit

in animo atque a Deo sese « amore deperire » quaeritavit, sancti Francisci

Assisiensis spiritum Mater Margarita a Sacro Corde cumulate effinxit et

in eadem sententia nihil aliud fecit quam ipsius Seraphici Patris suspirium

resultare illud: « Amorem amemus! ».

Quod conversationis eius cardo fuit summaque spiritualitatis et apos-

tolatus radix. Nam, flamma caritatis opera Instituti ab ea fundati summo-

pere inflavit eiusdemque, ut victima amoris et expiationis fieret, intimius

suffulsit voluntatem.

Serva Dei die 28 mensis Novembris anno 1862 in parvulo vico Kercem

ad insulam Gaulum archipelagi Melitensis ex operosa agricolarum familia

christiana pietate admodum informata nata est. Ad regenerationis fontem

eodem die ortus ducta, Virginiae Iosephae Mariae Ioannae sumpsit nomina.

Die 15 mensis Aprilis anno 1871, sacramentum Confirmationis et aliquibus

diebus post Primam Communionem recepit. Iam inde ab adulescentia adeo

vocationem ad vitam virginis sacratae sponsae Christi percepit, ut quattuor-

decim modo annos nata a confessario iam voti castitatis private profitendi

haberet licentiam, quod initium fuit super viam perfectionis.