96. De sancto Turiano.

In 1. Vesperis.

Ad Magnificat.

A. Exsultet Sion inclita

Pro filiorum gloria,

Quorum gaudet perpetuo

Turianus consortio,

Piis occurrat precibus

Sua festa colentibus.

Ad Matutinum.

Invitatorium.

Adoremus Christum regem,

Aeternum pontificem,

Cui Turianus placitum

Libavit sacrificium.

In 1. Nocturno.

Antiphonae.

1. Ecclesiae murus

Christo moderante futurus,

Gente Britannorum

Turianus suscipit ortum.

2. Hic puer ex utero

succensus amore superno,

Sponte reliquit opes

et quos habuit genitores.

3. Plura philosophico

de fonte bibens opulento,

Musica quem monstrat,

nec cantum nosse recusat.

4. Grammatica doctum,

praedulci voce melodum

Praesul Dolensis

sibi foedere nectit amoris.

5. Egregium juvenem

morum probitate cluntem

Omnimodis decorat

studiis coelestibus ornat.

6. In cunctis humilem

placido sub pectore mitem

Gratia coelestis

facit elucescere signis.

Responsoria.

1. Praedo furens plures

incendit praesulis aedes,

Sed veniam meruit

cum facti poenituisset,

V. Damna ferens illi

terretur coelitus hostis.

2. Orat vir sanctus,

reus in se ne moriatur,

Impetrat et spatium

vitae melioris ad usum ;

V. O pictas justi

bona retribuens inimicis.

In 2. Nocturno.

Antiphonae.

1. Christi magnificum

praesul Dolensis amicum

Ordinibus decorat,

coelesti dogmate format.

2. Adspirante Deo,

pariter poscente popello

Laude sibi dignum

succedere fecit alumnum.

3. Pontificale decus

merito virtutis adeptus

Coepit apostolicis

passim clarescere signis.

4. Ad verbum fidei

curantur coelitus aegri,

Auditus surdis

redit et lux pristina caecis.

5. Antistes orans

revocat de morte puellam,

Reddit et attonitum

Christo praeconia vulgus,

6. Pontificis cineres

exstingunt coelitus ignes,

Corpus et assumpti

radiat per signa patroni.

Responsoria.

1. Dulcis amice Dei,

patuit cui janua coeli,

Exorans Christum

nobis aperi paradisum,

V. Quem contemplaris,

cujus vultu satiaris.

2. Speciali visione

insignitus pontifex,

Arcam vidit testamenti

deferri ab angelis,

Quia erat arca legis

templum sancti spiritus,

V. Adhuc manens carne mundo,

sed in coelis animo.

3. Sancte Dei, precibus

nostros dissolve reatus,

Qui plerumque reis

veniam pius obtinuisti,

V. Erige labentes,

confirma deficientes.

4. O quam magnifice

coelum petis, o Turiane,

Ad coenam regis

tamquam conviva fidelis

Invitatus ades,

resonant coelestia laudes,

V. Ad deitatis opes

post hujus lucis agones.

In 3. Nocturno.

Ad Cantica.

1, Coelica cum sanctis

depromens cantica laudis

Collaudat sanctus

Dominum Sabaoth Turianus.

Responsoria.

1. Pontificale decus

linquens humilis Turianus

Sub patre Leufredo

monachatur in ordine sacro,

V. Magnificus praesul

pro Christo pauper et exsul.

2. Praepositus sceptrum

Michael retinens animarum

Pontificis sacra

residens apparuit ulna,

V. Angelicum signando virum

mundo crucifixum.

3. O senator paradisi,

coeli lampas aurea,

Surge, pater, offer Deo

laudum sacrificia,

Quae pro tuae sanctitatis

reddimus memoria;

V. Serva, sancte, gregem

tibi laudum vota ferentem.

In Laudibus.

Antiphonae.

1. Sanctus primaevo

semper Turianus ab aevo

Actibus et verbis

testis fuit omnipotentis.

2. Hymnos laetitiae

persolvens nocte dieque,

Cantat cum Seraphim

ter sanctus nunc trinitati.

3. Excubiis crebro

detentus amore superno,

Coeli deliciis

felix exsultat opimis.

4. Praesulibus sanctis,

qui dant praeconia laudis,

Adjunctus, merito

gaudet benedicere Christo.

5. Laudant ecclesiae

sanctorum te sine fine,

Rex Deus, in sanctis

qui mira potens operaris.

Ad. Benedictus.

A. Ave, praesul, Dei vultum

contemplans cum angelis,

Quem ex parte tectus carne

meruisti cernere,

Funde preces apud ipsum

pro nobis assidue.

In 2. Vesperis.

Ad Magnificat.

A. O pater Turiane,

dulcis in memoria,

Sed cum Christo jam perenni

dulcior in gloria,

Quibus ipse jucundaris

inter coeli vernulas,

Fac, ut ad coelestis agni

admittamur epulas.