CAPUT XXVIII. De virtute intellectiva separabili.

Intellectus separabilis assignantur differentiae secundum duos modos. Unus est secundum differentiam naturae, secundum

quod distinguitur virtus intellectiva per intellectum possibilem et agentem. Alius modus est secundum differentiam ordinis : et secundum hoc sunt duae differentiae virtutis intellectivae, scilicet intellectus superior et inferior, sive ratio superior et inferior. Quantum ad divisionem primam, nota quod duplex est natura intellectus. Una est quasi materialis, alia formalis. Una est possibilis ut tabula nuda ab omni pictura, sed susceptibilis omnium picturarum, et nullam habens actu : et haec est intellectus possibilis. Alia vero agens, ut lumen : est enim intelligibile lumen primae veritatis nobis per naturam impressum semper agens, sicut lux semper irradians, de quo Psal. : Signatum est super nos lumen, etc. , et se habet ad species intelligibiles manifestandas, sicut lux ad colores, sicut dicunt Philosophi.