Congregatio de Causis Sanctorum 101

FUNCHALENSIS

Beatificationis et Canonizationis Servae Dei Mariae a Sancto Francisco (in saec.:

Mariae Ioannae Wilson) Fundatricis Congregationis Sororum Sancti Francisci a

Domina Nostra Victoriarum (1840-1916)

DECRETUM SUPER VIRTUTIBUS

« Quantum possumus benefaciamus et multum rogemus, ut in omnibus

glorificetur Deus et adoretur ».

Haec verba Serva Dei Maria a Sancto Francisco instanter filiabus dicti-

tabat suis, sollicitudinem pro regni Dei augmento participans. Maria Ioanna

Wilson mulier pernobilis fuit animi, fecundis moribus amplaquae humani-

tatis doctrina praedita ac multis naturae ditata donis, quae divinae gratiae

auxilio cumulanda curavit. Et anima quoque fuit admodum eucharistica, ad

Beatissimam Mariam Virginem filiali pietate provoluta atque vera soror

Sancti Francisci Assisiensis. Omnis vita eius pacem ubique irradiavit sicut

et fidem Patris caelestis et oblationem Dei voluntati eiusdemque gloriae

ardorem. Pura fuit et hilaris, tacita alacrisque, sedula quasi matercula atque

audax instar prophetae. Innumeris in navitatibus pro pauperibus et aegro-

tis et pueris et senibus atque omnibus evangelici nuntii egenis summopere

molita est et cor habuit vere catholicum et equidem universale: nam, India

eam genuit, Anglia crevit, Europa et Terra Sancta tetigerunt, Materia in-

sula rapuit, quae vere sese universo orbi patuit. Quisquis ipsi obvius esset,

bonitatis suae vi in eundem exundabat.

Serva Dei die 3 mensis Octobris anno 1840 in civitate vulgo Hurryhur

intra fines Mysuriae regionis in India ex anglis religiosis institutis funditus

informatis parentibus claris natalibus orta est. Insequenti die 18 eiusdem

mensis Octobris ad baptismalem fontem in Ecclesia anglicana regenerata

est. Matre praemature mortua, anno 1842 pater eam patruorum in Anglia

curis commisit. Iam inde a pueritia Maria Ioanna studio una ac religioni,

in qua singularem quandam coluit pietatem, prompta fuit. Probitas naturae,

amor veritatis, exquisitio simplicitatis, lectio ac meditatio Sacrae Scripturae

et prudens moderatio presbyteri ex Ordine Sanctissimi Redemptoris eam

tractim ad catholicam verterunt fidem, cuius doctrinae summam perceperat

unitatem.