Acta Apostolicae Sedis - Commentarium Officiale786

ineffabili dono quod mundus dare nequit. Institui possunt festa, non autem

gaudium. Secundum Scripturam gaudium est fructus Spiritus Sancti (cfr.

Gal 5, 22), quod nobis concedit ingredi in Verbum et efficere ut divinum

Verbum in nos ingrediatur, fructus ferens pro vita aeterna. Verbum Dei in

virtute Spiritus Sancti nuntiantes, communicare volumus etiam fontem veri

gaudii, non brevis et fugacis, sed gaudii quod provenit e persuasione solum

Dominum Iesum verba vitae aeternae habere (cfr. Io 6, 68).

«Mater Verbi et Mater laetitiae »

124. Haec intima coniunctio inter Verbum Dei et gaudium plane in ipsa

Dei Matre proponitur. Recordemur effatum sanctae Elisabeth: « Beata, quae

credidit, quoniam perficientur ea, quae dicta sunt ei a Domino » (Lc 1, 45).

Maria est beata quoniam habet fidem, quia credidit, atque hac in fide accepit

in proprio sinu Verbum Dei ut illud mundo traderet. Gaudium a Verbo

exceptum, nunc dilatari potest in omnes qui in fide se mutari sinunt a

Verbo Dei. Evangelium secundum Lucam duobus in locis ostendit nobis hoc

mysterium audiendi et gaudendi. Iesus affirmat: « Mater mea et fratres mei hi

sunt, qui verbum Dei audiunt et faciunt » (8, 21). Atque prae exclamatione

cuiusdam e turba mulieris, quae vult extollere ventrem qui portavit eum et

ubera quae aluerunt eum, Iesus revelat secretum veri gaudii: « Quinimmo

beati, qui audiunt verbum Dei et custodiunt! » (11, 28). Iesus Mariae veram

magnitudinem ostendit, aperiens sic etiam unicuique nostrum facultatem

illam beatitudinem adipiscendi quae nascitur e Verbo accepto et perfecto.

Quapropter in omnium christianorum memoriam referimus nostram perso-

nalem et communitariam consuetudinem cum Deo pendere ab incremento

nostrae familiaritatis cum divino Verbo. Mentem denique Nostram vertimus

ad omnes homines bonae voluntatis, etiam ad eos qui deflexerunt ab Ecclesia,

qui fidem reliquerunt vel numquam salutis nuntium audiverunt. Unicuique

Dominus dicit: « Ecce sto ad ostium et pulso. Si quis audierit vocem meam

et aperuerit ianuam, introibo ad illum et cenabo cum illo et ipse mecum »

(Apc 3, 20).

Singuli igitur dies nostri informentur oportet renovato occursu cum

Christo, Verbo Patris carne facto: Ipse est in principio et in fine, « et omnia

in ipso constant » (Col 1, 17). Silentium teneamus ut Verbum Domini

audiamus et meditemur, ut illud per actionem efficacem Spiritus Sancti