536 Acta Apostolicae Sedis - Commentarium Officiale

exemplar missionale et oecumenicum excitabatur, praecipue per orationem

continuam pro unione omnium christianorum. Anno 1899 per decretum

dioecesanum Congregatio approbata est.

Anno 1910 Serva Dei, post apostolicam visitationem, e munere antistitae

generalis exonerata est et ei imponebatur, ut domum magnam Sancti Sixti

Veteris relinqueret. Illa interiori pace et humilitate et oboedientia heroica

ecclesiasticae voluntati praestitit. Permissionem petivit, ut in chorum acce-

deret una cum aliquibus Sororibus et per orationem Te Deum gratiam Domino

tribulationis suae redderet. Per epistulam exhortata est Congregationem, ut

servaretur maxima submissa oboedientia erga ecclesiasticam auctoritatem et

ut moniales viverent in concordia, quaerentes semper bonum pro Instituto

tollentesque omne odium vel indignationem.

Exinde Serva Dei in domu pagi Ceglie Messapica in Apulia, longe a

Roma, vixit. Sanctus Hannibal Maria Di Francia eius spiritualis moderator

et custos omnium eius memoriarum et eiusdem missionalis et oecumenici

adflatus olim fuit. Exhortatus est eam, ut ad rerum aeternarum sublimiora

quam maxime mentem adverteret una cum suis propriis cogitatis et mis-

sionali desiderio pro Russia infundens ei pacem et tranquillitatem.

Mortali e vita, ex Cena Domini rediens die 9 mensis Aprilis anno 1914,

demigravit. Ab anno 1939 mortales corporis reliquiae servantur capitulari

in aula coenobii Santi Sixti Veteris.

Ob famam sanctitatis, Uriae a die 10 mensis Septembris anno 1985 ad

diem 8 mensis Aprilis anno 1986 Inquisitio dioecesana celebrata est, cuius

validitas iuridica ab hac Congregatione de Causis Sanctorum probata est

decreto diei 10 mensis Octobris anno 1986. Exarata Positione, die 17 mensis

Iunii anno 2014 Peculiaris Consultorum Theologorum Congressus habitus

est, qui, positivo cum exitu, disceptavit an Serva Dei virtutes heroicas

exercuisset. Patres Cardinales et Episcopi Ordinaria in Sessione congregati

die 2 mensis Iunii anno 2015, me Angelo Cardinale Amato praesidente,

Servam Dei virtutes theologales, cardinales et adnexas heroicum in modum

exercuisse agnoverunt.

Facta demum de hisce omnibus rebus Summo Pontifici Francisco per

subscriptum Cardinalem Praefectum accurata relatione, Sanctitas Sua, vota

Congregationis de Causis Sanctorum excipiens rataque habens, hodierno

die declaravit: Constare de virtutibus theologalibus Fide, Spe et Caritate

tum in Deum tum in proximum, necnon de cardinalibus Prudentia, Iustitia,