538 Acta Apostolicae Sedis - Commentarium Officiale

VICENTINA

Beatificationis et Canonizationis Servi Dei Ottorini Zanon Sacerdotis Dioecesani Fundatoris Congregationis Piae Societatis a Sancto Caietano (1915-1972)

DECRETUM SUPER VIRTUTIBUS

« Oportet magnam sibi cogitandi agendique rationem proponere atque ad

assequendam eam totis viribus contendere. Haec ratio in vita mea fuit: cog-

noscere et diligere Iesum aliosque impellere ut Eum cognoscant et diligant ».

Haec Servi Dei Ottorini Zanon verba vehementer et simpliciter de-

monstrant peculiare ipsius ingenium spirituale necnon vitae decursum, quae

unioni divinae et pastorali missioni plane dedita est.

Servus Dei natus est Vicetiae die 9 mensis Augusti 1915. Familia eius,

paupertatis et dolorum experta, fide simplici et forti ornata fuit; eius in-

doles alacer, intellegentia praedita, sollers et valde ad religionem propensa.

Iam a pueritia Deum animadvertit eum ad sacerdotale munus vocare. Anno

1927 seminarium dioecesanum ingressus est. Proximo anno mater eius in

gravem morbum incidit, sed in peregrinatione ad Lapurdensem Specum

divinitus ad sanitatem reversa est. Quod factum iuveni Ottorino fuit magna

Dei experientia, Maria intercedente. Quapropter ille toto corde persecutus

est formationis iter, in quo indolem gravem simulque laetam ostendit, cum

conspicuis humanis et spiritualibus virtutibus. Ad presbyterorum ordinem

accessit die 26 mensis Maii anno 1940.

Primum ad paroeciam Araceli Vicetiae missus est. In extremae inopiae

et depravationis adiunctis, Ottorinus magno cum studio pueros collegit in

paroeciae theatri cella. Cuius conversationis fama divulgata est et multi

adulescentuli ad petendum eius auxilium venerunt. Ex hac prima optione

pastorali Institutum Sancti Caietani ortum est pro iuvenum formatione, ad

laborem exercendum. Quos hortabatur ut apostoli in operariorum mundo

fierent, viventes « cum Christo in corde, in familia, in opere ». Hoc fuit

initium futurae Piae Societatis a Sancto Caietano, communitatis religiosae

quae constat de presbyteris et diaconis. In tantam spiritualem et ecclesialem

renovationem multos laicos traxit et constituit in Amicorum Piae Societatis

a Sancto Caietano coetum necnon instituit "sorores in diaconia", mulieres

sacratas, vocatas ut essent diaconalis praesentia muliebris in pastorali ser-

vitio una cum religiosis et laicis.