Unde dicit : " Et cum aperuisset sigillum secundum, " id est, Passionem consummatam ostendisset ipsa rei exhibitione, quae clausa erat sub lege, " audivi secundum animal. " Per hoc animal secundum intelligitur Lucas, qui agit specialiter de Passione, et per hoc intelligitur totus ordo Praedicatorum qui tempore martyrum Passionem Domini praedicavit.

Et dicit : " Secundum animal, " non tempore, sed ordine videndi. " Dicens: Veni, " accedendo, " et vide, " diligenter attendendo. " Veni " de prosperitate Ecclesiae, "et vide " ejus adversitatem. Vel, sicut accepisti gaudium de prosperitate, ita sumas cautelam de adversitate.

" Et exivit alius equus rufus: et qui sedebat super illum, datum est ei ut sumeret pacem de terra, et ut invicem se interficiant : et datus est ei gladius magnus. "

Hic dicit quid viderit. Et dicuntur tria. Primo, describit corpus diaboli, id est, equum. Secundo, ipsum diabolum, ibi, " Et qui sedebat. " Tertio, posse suum, ibi, " Datum est ei, etc. " .