QUAESTIO II.

Utrum parvuli baptizati recipiant effectum Baptismi?

Alens. 4. part. quaest. 17. m. 2. D. Thom. D. Bonavent. Richard. et alii citati pro quaest, praeced.

Ad secundum sic proceditur, et arguitur quod parvuli baptizati non recipiunt effectum Baptismi, quia talis effectus est gratia; parvuli non recipiunt gratiam, quia non infunditur sine fide, quia sine fide impossibile est placere Deo, ut habetur Hebr. 11. sed parvuli non recipiunt fidem. Quod probo, primo, auctoritate Apostoli Rom. 10. Fides est ex auditu; parvuli non possunt sic accipere fidem. Secundo, probo ratione, quia habens habitum, potest uti eo cum voluerit non impeditus: parvulus baptizatus cum venerit ad usum rationis, non potest uti habitu fidei, quia non potest exire in actum credendi articulos fidei. . Et confirmatur istud, quia habens habitum se habet aliter ad actum, quam non habens, aliquo enim modo habitus se habet ad actum, et secundum illum modum differt habens a non habente; sed parvulus baptizatus nullo modo aliter se habet ad actum credendi, quam si non fuisset baptizatus, quia si baptizatus nutriatur inter infideles, et ab eis doceatur, similiter acquiescet errori eorum, sicut alius non baptizatus ; si etiam non baptizatus nutritur inter fideles, et in lege eorum doceatur, similiter acquiescet illi legi, sicut aliquis baptizatus. Si ergo nullo modo aliter se habet ad actum credendi baptizatus, quam non baptizatus, nullo modo habet habitum fidei.

Si vero respondeatur, quod habitus acquisitus aliquo modo se habet ad actum, non sic autem infusus. Contra hoc, et ad confirmationem principalis argumenti, quia si Deus infunderet alicui habitum Geometriae concurrentibus sibi rationibus terminorum Geometralium, posset ex illo habitu assentire veritatibus Geometricis: ergo a simili in proposito, ex fide infusa, si adesset, posset habens assentire occurrentibus rationibus terminorum, et ita apprehensa ratione mortui et resurrectionis, posset aliquis assentire huic veritati, mortui resurgent, cujus oppositum experimur.

Tandem confirmatur propositum, quia cum habitus det aliquam facilitatem et delectationem in opere, ex secundo Ethicor. nullus autem facilius, nec delectabilius operatur contra habitum suum quam secundum eum ; sed parvulus baptizatus postquam fuerit adultus, facilius dissentit a credibilibus quam consentiat, ut experimur: ergo, etc.

Item ad principale : nullus recipit gratiam a Deo, nisi aliquo modo sibi conjungatur, nam actualiter averso, et omnino indisposita, Deus non dat gratiam. Prima autem conjunctio ad Deum fit per fidem ; ergo non habenti illam, non datur gratia ; parvulus non habet eam ante Baptismum: ergo non datur ei in Baptismo.

Contra, Augustinus in Enchiri dio :A parvulo recenter nato, usque ad decrepitum, sicut nullus prohibetur a Baptismo, ita nullus est qui non moriatur peccato in Baptismo; sed nullus moritur peccato, nisi recipiat gratiam ; ergo, etc.