Acta Francisci Pp. 459

II

Servis Dei Theophilo Fernández de Legaria Goñi et IV Sociis Presbyteris Professis Congregationis Sacrorum Cordium (PICPUS), Beatorum Martyrum honores decernuntur.

FRANCISCUS PP.

Ad perpetuam rei memoriam. - « Maiorem hac dilectionem nemo habet,

ut animam suam quis ponat pro amicis suis » ( Io 15, 13).

Theophilus Fernández de Legaria Goñi et IV socii martyres fuerunt

sacerdotes religiosi ex Congregatione Sacrorum Cordium Iesu et Mariae,

anno MDCCC condita a Iosepho Maria (Petro) Coudrin et Henrica Aymer de

la Chevalerie. Petrus Coudrin, iuvenis adhuc sacerdos, Pictavae degens,

praebuerat se apostolum audacem et heroicum inter ingentes eversionis

Francogallicae perturbationes. Ipse eodem spiritu imbuit omnes sodales

suae Congregationis, ita ut filii eius Theophilus, Isidorus, Gundisalvus,

Helladius et Marius eandem fortitudinem animi ceperint et eo ardentius

vixerint usque ad professionem fidei in Iesu Christo per martyrium, quod

evenit tempore religiosae persecutionis in Hispania inter annos trigesimum

et quadragesimum vigesimi saeculi.

Hi martyres sunt:

1. Theophilus Fernández de Legaria Goñi (Beniaminus), SS.CC., natus

in Torralba del Rio, Navarrae, die V mensis Iulii anno MDCCCXCVIII.

Licentiam in Philosophia Salmanticae necnon doctoris titulum in

Theologia apud Pontificiam Universitatem Gregorianam Romae adeptus,

confundator et consiliarius fuit Fraternitatis Sancti Isidori, constitutae a

Doctoribus et Laureatis in Litteris et Scientiis, quae consociatio erecta est

ad doctrinam religiosam solidandam. Deinde Moderator exstitit Seminarii

Maioris Sacrorum Cordium Scorialensis, quo in officio iuvenes religiosos

parabat ad occurrendum turbulenta advenienti periodo: « Oportet nos, filii

eius, heroicum boni Patris fundatoris nostri animum in hereditate accipia-

mus. Licet veniant dies nefandi, firmi maneamus in fide eamque semper

servemus ». Manuballista necatus est in Piedra del Mochuelo, in regione

Scorialensi, die XI mensis Augusti anno MCMXXXVI. Postrema protulit verba:

« Pro Deo ac pro pace meae patriae morior ».