474 Acta Apostolicae Sedis - Commentarium Officiale

quoniam me, indignum servum suum, elegit ». Tunc summi consilii legati

polliciti sunt se vitae parsuros, dummodo Macometanam amplecteretur re-

ligionem. Quod cum firmiter recusavisset, per publicam viam ductus est

ad supplicium, consaepta undique turba et plagis, alapis ac sputis vexante.

Dum Servus Dei orans procedit, hortantibus iterum inimicis, fidem tamen

christianam deserere noluit, sed eam esse veram salutis viam declaravit

seque in qua natus, in eadem moriturum. Tractus igitur ad locum supplicii

et ita revinctus ut formam crucis ipse adumbraret, carnificibus postremum

impellentibus ut, si quid vitam aestimaret, Macometanus fieret, respondit:

« Christianus ac religiosus sancti Francisci patris mei sum, et sic mori cupio;

atque Deum supplico ut vos illuminet quo Eum citius agnoscere valeatis ».

Qui cum perseverantius oraret invocans nomina Iesu, Beatae Mariae Virgi-

nis et sancti Pauli, cuius illo die Ecclesia recolebat conversionem, extremo

tandem frustrilo pellis abscisso, exclamans ut Iesus in cruce: « In manus

tuas, Pater... », animam efflavit.

Extemplo martyr habitus est a servis christianis, qui ossa eius et pellis

frustrila uti reliquias collegerunt et in terras christianas reduxerunt. Fama

eius martyrii statim ubique christianorum per orbem diffusa est. Anno

MDCCXXXI Ordo Fratrum Minorum Conventualium causam beatificationis in-

choavit. Quae, cum olim intermissa esset, instaurari coepta est tantum anno

MCMLXXXIV. Congregatio de Causis Sanctorum per decretum die III mensis

Iunii anno MCMXCII datum agnovit iuridicam validitatem dioecesanae Inqui-

sitionis, in urbe Sacceri annis MCMXC-MCMXCI expletae. Consultores historici

die IV mensis Martii anno MMIII in Congressu adunati iudicium propitium

de documentis ad martyrium pertinentibus dederunt. Consultores theologi

in Congressu peculiari die XVI mensis Maii anno MMXIII omnes de martyrio

consenserunt, pariterque Patres Cardinales et Episcopi, in Sessione Ordi-

naria coadunati die IV mensis Februarii anno MMXIV. Nos Ipsi exinde die VII

mensis Februarii eiusdem anni facultatem fecimus Congregationi de Causis

Sanctorum ut hac de re Decretum ederet atque decrevimus ut beatificationis

ritus die XII mensis Octobris eiusdem anni Sacceri perficeretur.

Hodie igitur Sacceri de mandato Nostro Venerabilis Frater Noster An-

gelus S.R.E. Cardinalis Amato, S.D.B., Praefectus Congregationis de Causis

Sanctorum, textum Litterarum Apostolicarum legit, quibus Nos Venerabilem

Servum Dei Franciscum Zirano, sodalem Ordinis Fratrum Minorum Con-

ventualium, presbyterum et martyrem, in Beatorum numerum adscribimus: