Dicit ergo : " Et data est illis, " id est, haereticis praecursoribus Antichristi, " data, " permissione Dei, " potestas, " scilicet, nocendi, saeviendi, decipiendi, " sicut habent potestatem scorpiones terrae. "

Nota : Potestas nocendi in scorpione est in cauda, per quam perculit, et venena diflundit. Similiter diabolus per haereticos venenum suae malitiae diffundit, sicut per caudam suam. Isa. IX, 15 : Propheta docens mendacium, ipse est cauda, scilicet diaboli. Item, similes sunt scorpionibus : quia scorpio blanditur in facie, sed occulte cauda percutit. Sic haeretici falsa veris miscent, et vera falsis, ut auditores facilius occulte decipiant, et sic veneno malae doctrinae interficiant. Psal. xiii, 3 : Venenum aspidum sub labiis eorum. Vel, quia per temporalia decipiunt, quae dependent post, sicut cauda. Item, punetura scorpionis primo non sentitur, sed postea punctus occiditur. Sic decepti ab istis primo non sentiunt deceptionem, sed tandem perimuntur. Ezechiel. ii, 6 : Increduli et subversores sunt tecum, et cum scorpionibus habitas.

" Et praeceptum est illis ne laederent foenum terrae, neque omne viride, neque omnem arborem, nisi tantum homines qui non habent signum Dei in frontibus suis. "

Hic ponitur refraenatio potestatis eorum.

Et dicuntur duo. Primo, prohibentur ne laedant beatos. Secundo, permittitur ut laedant malos, ibi, " Nisi tantum homines. D

Prohibentur autem a laesione hominum, primo incipientium, ibi, " Faenum terrae : " secundo, proficientium, ibi, " Neque omne viride : " tertio, perfectorum, ibi, " Neque omnem arborem. "