Unde dicit: " Et in diebus illis, " in quibus alii cadent per hypocrisim, alii per haeresim, alii per violentiam, alii per fraudem, " quaerent homines mortem, " scilicet, corporalem. Glossa, timentes lapsum : quia desiderabunt mori, nimia tribulatione pressi, et taedio vivendi affecti. Sicut Elias, III Regum, XIX, 4, petivit animae suae ut moreretur.

" Et non invenient eam, " Glossa, ut probatiores reddantur, vel etiam propter minores, ne de morte eorum scandalizati desperent, absque consolatoribus remanentes.

" Et desiderabunt mori. " Quasi dicat : Non quocumque modo quaerent, sed magno desiderio. Jerem. VIII, 3 : Eligent magis mortem quam vitam.

" Et fugiet mors ab illis, " ne grex Domini deseratur inter dentes luporum. Beda : " Sicut Cyprianus sub Deciana persecutione conquestus : Volentibus, inquit, mori, non permittebatur occidi. "

" Et similitudines locustarum, similes equis paratis in praelium : et super capita earum tamquam coronae similes auro. "

Supra tetigit concessam potestatem haereticis, hic describit eos multis modis.

Et dicuntur tria. Primo, describuntur a conditionibus quae pertinent ad operationem mali. Secundo, a conditioni- bus quae pertinent ad declinationem boni, ibi, v. 9 : " Et habebant loricas. " Tertio, dicitur in quo habebant potestatem nocendi, ibi, v. 10 : " Et potestas earum. "

In prima parte dicuntur tria. Primo, ponitur desiderium nocendi. Secundo, ponitur causa, ibi, " Et super capita earum. " Tertio, modus et forma, ibi, " Et facies eorum. "